જામનગર અપડેટ્સ, અમરેલી: અમરેલી જિલ્લાના સાવરકુંડલા રૂરલ પોલીસ સ્ટેશનમાં ફરજ બજાવતા આસિસ્ટન્ટ સબ ઇન્સ્પેક્ટર (ASI) શ્યામભાઇ અનંતરાય બગડાને લાંચ રૂશ્વત વિરોધી બ્યુરો (ACB)એ રૂ. ૫,૦૦૦ની લાંચ લેતા રંગેહાથ ઝડપી પાડ્યા છે. દારૂનો અગાઉ બંધ થઈ ગયેલો ધંધો ફરી શરૂ કરાવવા અને ખોટા કેસો કરવાની ધમકી આપી પોલીસકર્મીએ લાંચની માંગણી કરી હતી.
ઘટનાની વિગત: આ કેસના જાગૃત નાગરિક (ફરિયાદી) અગાઉ દેશી દારૂનો ધંધો કરતા હતા, પરંતુ લાંબા સમયથી તેમણે આ ગેરકાયદે પ્રવૃત્તિ સંપૂર્ણપણે બંધ કરી દીધી હતી. તેમ છતાં સાવરકુંડલા રૂરલ પોલીસ સ્ટેશનમાં કાર્યરત ૩૯ વર્ષીય ASI શ્યામભાઇ અનંતરાય બગડા (રહે. હાથસણી રોડ, સાવરકુંડલા) દ્વારા ફરિયાદી પર દારૂનો ધંધો ફરી શરૂ કરવા દબાણ કરવામાં આવતું હતું. જો ધંધો શરૂ ન કરે તો ખોટા કેસોમાં ફસાવી દેવાની ધમકી આપીને ASI દ્વારા ₹૧૦,૦૦૦ની લાંચની માંગણી કરવામાં આવી હતી.
ફરિયાદી અને આરોપી વચ્ચે થયેલી રકઝકના અંતે લાંચની રકમ ₹૫,૦૦૦ નક્કી થઈ હતી. જોકે, ફરિયાદી લાંચ આપવા તૈયાર ન હોવાથી તેમણે ભ્રષ્ટાચાર સામે અવાજ ઉઠાવવા ACBના ટોલ-ફ્રી નંબર ૧૦૬૪ પર સંપર્ક સાધ્યો હતો અને ત્યારબાદ અમરેલી ACB પોલીસ સ્ટેશન ખાતે વિધિવત ફરિયાદ નોંધાવી હતી.
ACBનું સફળ ટ્રેપ ઓપરેશન: ફરિયાદના આધારે અમરેલી ACB પોલીસ સ્ટેશનના ઇન્ચાર્જ પોલીસ ઇન્સ્પેક્ટર શ્રી ટી.એસ. રીઝવી તથા તેમની ટીમ દ્વારા ૨૦ ઓગસ્ટના રોજ છટકાનું આયોજન કરવામાં આવ્યું હતું.
સાવરકુંડલા તાલુકાના ઓળીયા ગામની સીમમાં, નેસડી જવાના કાચા માર્ગે આવેલી ઝવેરભાઇ પટેલની વાડીના ઝાંપા પાસે ગોઠવાયેલા આ છટકામાં આરોપી ASI શ્યામભાઇ બગડા ફરિયાદી પાસેથી લાંચ પેટે નક્કી થયેલી ₹૫,૦૦૦ની રકમની માંગણી કરી સ્વીકારતા જ ACBની ટીમે તેમને સ્થળ પરથી રંગેહાથ ઝડપી લીધા હતા.
ACB દ્વારા લાંચની પૂરેપૂરી ₹૫,૦૦૦ની રકમ રિકવર કરી, આરોપી ASI વિરુદ્ધ ભ્રષ્ટાચાર નિવારણ અધિનિયમ હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે.
