જામનગર અપડેટ્સ :જોડીયા જામનગર જિલ્લાના જોડીયામાં અગાઉ ક્રિકેટ રમવા બાબતે થયેલી સામાન્ય બોલાચાલીએ, લોહિયાળ વળાંક લીધો છે. જોડીયાના મોટોવાસ વિસ્તારમાં રહેતા ૨૧ વર્ષીય સોહીલભાઇ અબ્દુલભાઇ ગંઢ નામના યુવાન પર જૂની અદાવતનો ખાર રાખી ત્રણ શખ્સોએ છરી વડે જાનથી મારી નાખવાના ઇરાદે હુમલો કરતા સમગ્ર પંથકમાં ચકચાર મચી ગઈ છે.
ઘટનાની વિગતો મુજબ, ગત રમજાન મહિનામાં દરગાહના ગ્રાઉન્ડમાં ક્રિકેટ રમવા બાબતે ફરિયાદી સોહીલભાઈ અને આરોપી સાહિલ ઇદ્રીશભાઈ વચ્ચે બોલાચાલી થઈ હતી. આ બાબતનો ખાર રાખી, ગઈકાલ રાત્રે જ્યારે સોહીલભાઈ તેમના મિત્રો સાથે ઘરે જતા હતા, ત્યારે આરોપીએ રસ્તામાં મોટરસાયકલ આડું રાખી ઝઘડો શરૂ કર્યો હતો. ત્યારબાદ સાહિલ ઇદ્રીશભાઈ, ઇદ્રીશભાઈ અને હમજાભાઇ નામના ત્રણ શખ્સો ફરિયાદીના ઘરે પહોંચ્યા હતા. ત્યાં ફરિયાદીના દાદી સાથે બોલાચાલી કરી રહેલા આરોપીઓએ સોહીલ બહાર આવતા જ તેને પકડી લીધો હતો અને સાહિલે પોતાની પાસે રહેલી છરી વડે સોહીલની છાતીના જમણા ભાગે ઊંડો ઘા ઝીંકી દીધો હતો.
આ હુમલામાં સોહીલભાઈને ગંભીર ઇજાઓ પહોંચતા તેમને તાત્કાલિક સારવાર અર્થે ખસેડવામાં આવ્યા છે. જોડીયા પોલીસે આ મામલે ભારતીય ન્યાય સંહિતા ૨૦૨૩ ની કલમ ૧૦૯(૧) (હત્યાનો પ્રયાસ), ૩૫૨, ૩૫૧(૩), ૫૪ તથા જી.પી. એક્ટ ૧૩૫(૧) મુજબ ગુનો નોંધ્યો છે. ઉલ્લેખનીય છે કે, જામનગર કલેક્ટર દ્વારા બહાર પાડવામાં આવેલા હથિયારબંધીના જાહેરનામાનો પણ આ કેસમાં ભંગ થયો છે. હાલ જોડીયા પોલીસ સ્ટેશનના પી.આઈ. પી.એન. ખાચરના માર્ગદર્શન હેઠળ પોલીસની ટીમે ત્રણેય આરોપીઓ વિરુદ્ધ કાર્યવાહી શરૂ કરી છે અને ફરાર આરોપીઓને ઝડપી લેવા ચક્રો ગતિમાન કર્યા છે. એક સામાન્ય રમતની બાબત જ્યારે જીવલેણ હુમલા સુધી પહોંચે ત્યારે તે સમાજ માટે ચિંતાનો વિષય બન્યો છે.
