પ્રાઈમ ન્યૂઝ ઇન્ફૉ
ઓનલાઈન જોબના નામે સાયબર ફ્રોડ
ખંભાળિયામાં 23 વર્ષીય યુવતીને ઓનલાઈન ટીચરની નોકરી અપાવવાની લાલચ આપી છેતરપિંડી
HR વિભાગમાંથી બોલતો હોવાનો દાવો
અજાણ્યા શખ્સે pwhiring.comના HRમાંથી વાત કરતો હોવાનું જણાવી યુવતીને વિશ્વાસમાં લીધી
રજીસ્ટ્રેશનથી ઈન્શ્યોરન્સ સુધી વસૂલ્યા રૂપિયા
નોકરીના અલગ-અલગ ચાર્જના નામે યુવતી પાસેથી ઓનલાઈન પૈસા પડાવ્યા
કુલ ₹56,649ની ઓનલાઈન છેતરપિંડી
અલગ-અલગ UPI ID પર ટ્રાન્જેક્શન કરાવી યુવતી સાથે સાયબર ફ્રોડ
ખંભાળિયા પોલીસે ગુનો નોંધી તપાસ શરૂ કરી
BNS 318(2), 319(2) અને IT Act 66(C), 66(D) હેઠળ અજાણ્યા આરોપી સામે કાર્યવાહી
જામનગર અપડેટ્સ: દેવભૂમિ દ્વારકા જિલ્લાના ખંભાળિયામાં ઓનલાઈન ટીચરની નોકરી અપાવવાના બહાને યુવતી પાસેથી હજારો રૂપિયા પડાવી લેવાનો સાયબર ફ્રોડનો બનાવ સામે આવ્યો છે. અજાણ્યા શખ્સે કંપનીના HR વિભાગમાંથી બોલતો હોવાની ઓળખ આપી યુવતીને નોકરીની લાલચ આપી અલગ-અલગ ચાર્જના નામે કુલ ₹56,649 ઓનલાઈન ટ્રાન્જેક્શન કરાવી લીધા હતા.
પોલીસ ફરિયાદ મુજબ ખંભાળિયાની રામનાથ સોસાયટી, ગાયત્રી મંદિર પાસે રહેતી 23 વર્ષીય અંજલીબેન વિનયભાઈ ચોક્સીને અજાણ્યા શખ્સે મોબાઈલ નંબર પરથી ફોન કર્યો હતો. આરોપીએ પોતે pwhiring.comના HR વિભાગમાંથી વાત કરતો હોવાનું જણાવી ઓનલાઈન ટીચરની જોબ અંગે યુવતી સાથે વાતચીત શરૂ કરી હતી.
આરોપીએ સામાન્ય ફોન કોલ ઉપરાંત વોટ્સએપ મારફતે પણ સંપર્ક કરી યુવતીને વિશ્વાસમાં લીધી હતી. ત્યારબાદ નોકરી માટે અલગ-અલગ ફી ભરવાની વાત કરી યુવતી પાસેથી પ્રથમ રજીસ્ટ્રેશન ફીના નામે ₹1,999, ત્યારબાદ લેપટોપ અને કંપનીની સિસ્ટમના નામે ₹8,650, તેમજ લેપટોપ ઈન્શ્યોરન્સ સહિત અન્ય ચાર્જના નામે અલગ-અલગ રકમની માંગણી કરી હતી.
યુવતીએ આરોપીની વાત પર વિશ્વાસ કરી અલગ-અલગ UPI ID પર ઓનલાઈન ટ્રાન્જેક્શન કરી કુલ ₹56,649 ચૂકવ્યા હતા. જોકે બાદમાં સમગ્ર મામલો નોકરી અપાવવાના બહાને કરાયેલી છેતરપિંડી હોવાનું સામે આવતા ખંભાળિયા પોલીસ મથકમાં ફરિયાદ નોંધાવવામાં આવી છે.
આ મામલે ખંભાળિયા પોલીસ સ્ટેશનમાં ભારતીય ન્યાય સંહિતાની કલમ 318(2), 319(2) તથા આઈટી એક્ટની કલમ 66(C), 66(D) મુજબ ગુનો નોંધાયો છે.
પોલીસે અજાણ્યા આરોપી સામે ગુનો નોંધી તપાસ હાથ ધરી છે. હાલ આરોપીની ધરપકડ બાકી છે અને સમગ્ર સાયબર છેતરપિંડીમાં ઉપયોગમાં લેવાયેલા મોબાઈલ નંબર, વોટ્સએપ સંપર્ક, UPI ID તથા નાણાકીય ટ્રાન્જેક્શનની વિગતોના આધારે તપાસ આગળ વધારવામાં આવી રહી છે.
