પ્રાઈમ ઇન્ફૉ:
રોકાણના નામે કરોડોની છેતરપિંડીનો આક્ષેપ
સિક્કામાં રોકાણ કરાવી બમણું વળતર આપવાની લાલચ આપ્યાનો આક્ષેપ
શિપિંગ કંપનીમાં કામ કરતો હોવાનું જણાવી સિગારેટ ઈમ્પોર્ટ-એક્સપોર્ટના વ્યવસાયની વાત કરી
ફરિયાદી અસગર ગફાર પીરજાદા પાસેથી રૂ.12 લાખ સહિત અનેક લોકો પાસેથી રકમ એકત્ર કર્યાનો આક્ષેપ
આશરે 100થી 150 લોકો પાસેથી કુલ રૂ.5 કરોડ જેટલી રકમ લેવાઈ હોવાનો ફરિયાદમાં ઉલ્લેખ
સિક્કા પોલીસે BNS કલમ 316(2) હેઠળ ગુનો નોંધી વધુ તપાસ હાથ ધરી
જામનગર અપડેટ્સ: જામનગર જિલ્લાના સિક્કા ગામમાં રોકાણના નામે મોટી રકમ એકત્ર કરી પરત નહીં આપી વિશ્વાસઘાત કર્યાની ફરિયાદ પોલીસ મથકે નોંધાઈ છે. સિક્કા પોલીસ મથકમાં નોંધાયેલી ફરિયાદ મુજબ, સિક્કાના રહેવાસી સકલેન હસનભાઈ વાઘેરે અસગર ગફાર પીરજાદા સામે ભારતીય ન્યાય સંહિતાની કલમ 316(2) હેઠળ ફરિયાદ નોંધાવી છે.
ફરિયાદમાં જણાવ્યા મુજબ, આરોપી પોતે શિપિંગ કંપનીમાં કામ કરતો હોવાનું જણાવી બહારના સંપર્કો હોવાની વાત કરતો હતો. તેમજ સિગારેટના ઈમ્પોર્ટ-એક્સપોર્ટના વ્યવસાયમાં રોકાણ કરવાથી રોકાણની રકમ સામે બમણું વળતર મળતું હોવાનું કહી લોકોને રોકાણ કરવા માટે પ્રોત્સાહિત કર્યાનો આક્ષેપ છે.
આરોપીએ વધુ મોટા પ્રમાણમાં આ વ્યવસાય કરવા માટે ફંડની જરૂરિયાત હોવાનું જણાવી ઓળખીતા લોકો અને સગા-સંબંધીઓ પાસેથી રકમ રોકાણ કરાવવાની તથા સારું વળતર આપવાની ખાતરી આપી હોવાનું ફરિયાદમાં જણાવાયું છે.
આ રીતે ફરિયાદી પાસેથી આશરે રૂ.12 લાખ લેવામાં આવ્યા હોવાનો આક્ષેપ છે. ઉપરાંત, ગામના અન્ય અનેક લોકો પાસેથી પણ રકમ મેળવી હોવાનું ફરિયાદમાં જણાવાયું છે. પોલીસ ફરિયાદ મુજબ, આશરે 100થી 150 જેટલા લોકો પાસેથી કુલ રૂ.5 કરોડ જેટલી રકમ એકત્ર કરવામાં આવી હોવાનો આક્ષેપ કરવામાં આવ્યો છે.
ફરિયાદમાં વધુમાં જણાવાયું છે કે, આરોપીએ શરૂઆતમાં કેટલાક લોકોને હપ્તા પેટે અમુક રકમ પરત આપી હતી. ત્યારબાદ બાકીની રકમ પરત નહીં આપી, રકમ ઓળવી જઈ ગામ છોડી ભાગી ગયાનો આક્ષેપ કરવામાં આવ્યો છે.
આ મામલે સિક્કા પોલીસ મથકમાં ભારતીય ન્યાય સંહિતાની કલમ 316(2) હેઠળ વિશ્વાસઘાતનો ગુનો નોંધવામાં આવ્યો છે. સમગ્ર મામલે પોલીસે વધુ તપાસ હાથ ધરી છે અને ફરિયાદમાં કરવામાં આવેલા આક્ષેપોની તપાસ બાદ જ સમગ્ર નાણાકીય વ્યવહાર તથા સંડોવાયેલા લોકો અંગે વધુ વિગતો સ્પષ્ટ થશે.
