જામનગર અપડેટ્સ: જામનગર જિલ્લાના મોટી ખાવડી વિસ્તારમાં એલપીજી ગેસ ટેન્કર ચાલકોને ગેરકાયદેસર રીતે અટકાવી ધમકી અને ઉઘરાણી કર્યાની ગંભીર ઘટના સામે આવી છે. ભારત પેટ્રોલિયમ કોર્પોરેશન લિમિટેડ (BPCL) ના ચીફ મેનેજરની ફરિયાદના આધારે મેઘપર (પડાણા) પોલીસ સ્ટેશનમાં ત્રણ શખ્સો સામે ગુનો નોંધાતા ઔદ્યોગિક વિસ્તારમાં ચકચાર મચી ગઈ છે.
પોલીસ ફરિયાદ મુજબ, તા. 14 મે 2026ના રોજ સવારે 9:30 થી બપોરે 1:00 વાગ્યા દરમિયાન મોટી ખાવડી પાસે શિવ હોટલ નજીક આ બનાવ બન્યો હતો. ફરિયાદી તરીકે BPCL જામનગરના ચીફ મેનેજર કે. સંધિલકુમાર કૃષ્ણમૂર્તિ (ઉ.વ. 55) એ નોંધાવ્યું હતું કે, LPG ગેસ ભરવા જતા ટેન્કરના ડ્રાયવરો અને ખલાસીઓને કેટલાક શખ્સોએ ગેરકાયદેસર રીતે રોક્યા હતા.ફરિયાદ અનુસાર, આરોપીઓ કિશોરસિંહ જાડેજા, જુવાનસિંહ અને મહેન્દ્રસિંહે ટેન્કર ચાલકોને જાનથી મારી નાખવાની ધમકી આપી હતી તેમજ ગાળો આપી ભયનો માહોલ ઊભો કર્યો હતો. વધુમાં ત્રણ ટેન્કરના ડ્રાયવરોને મૃત્યુના ભયમાં મૂકી બળજબરીપૂર્વક બિલ્ટી, ડીઓ લેટર, સીસીએફ જેવા દસ્તાવેજો અને પ્રતિ ટેન્કર રૂ. 2000 જેટલી રોકડ રકમ પડાવી લીધી હોવાનો આક્ષેપ કરવામાં આવ્યો છે.
ઘટનાને લઈને BPCL તંત્રમાં પણ ચિંતા ફેલાઈ છે, કારણ કે ઔદ્યોગિક વિસ્તારોમાં ગેસ ટેન્કરોની અવરજવર દરમિયાન સુરક્ષા અત્યંત મહત્વપૂર્ણ માનવામાં આવે છે. પોલીસના જણાવ્યા મુજબ આ સમગ્ર મામલે કાવતરું રચી ગુનો આચરાયો હોવાની દિશામાં પણ તપાસ ચાલી રહી છે.મેઘપર (પડાણા) પોલીસ સ્ટેશનમાં ભારતીય ન્યાય સંહિતા-2023ની કલમ 61, 308(પ), 126(ર), 351(3) અને 352 હેઠળ ગુનો નોંધવામાં આવ્યો છે. પોલીસ ઇન્સ્પેક્ટર પી.ટી. જયસ્વાલના માર્ગદર્શન હેઠળ આગળની તપાસ હાથ ધરાઈ છે. આ બનાવે ફરી એકવાર ઔદ્યોગિક પરિવહન સાથે જોડાયેલા ડ્રાયવરો અને ખલાસીઓની સુરક્ષાને લઈને પ્રશ્નો ઊભા કર્યા છે.
