જામનગર અપડેટ્સ દ્વારકા: દેવભૂમિ દ્વારકા જિલ્લામાં ઓખા-દ્વારકા હાઇવે પર હિટ એન્ડ રનની ગંભીર ઘટના સામે આવી છે. પુરઝડપે અને બેદરકારીપૂર્વક દોડતી અજાણ્યા કારના ચાલકે રસ્તા કિનારે ઉભેલા દંપતીને અડફેટે લેતા મહિલાનું ઘટનાસ્થળે ગંભીર ઇજાઓના કારણે મોત નિપજ્યું હતું, જ્યારે પુરુષને પગમાં ફ્રેક્ચર થતાં સારવાર માટે ખસેડવામાં આવ્યો હતો. બનાવ બાદ કારચાલક વાહન સાથે ફરાર થઈ ગયો હતો.
પોલીસ ફરિયાદ મુજબ, જામનગરના દરબારગઢ વિસ્તારમાં રહેતા **રોહિતભાઈ રવજીભાઈ સોલંકી (ઉં.વ. 25)**એ દ્વારકા પોલીસ મથકે ફરિયાદ નોંધાવી છે. ફરિયાદમાં જણાવાયું છે કે, તેમની શાળી સંગીતાબેન રાજુભાઈ કોસ્તી અને શાઢુ મનીષભાઈ દેવાભાઈ જોગસિયા મોટરસાયકલ પર દ્વારકા દર્શન કરવા ગયા હતા.
19 જુલાઈ, 2026ની રાત્રે આશરે 10 વાગ્યે તેઓ ઓખા મઢી ગામથી આગળ ટોલગેટ પહેલાં દ્વારકા-પોરબંદર હાઇવે પર પહોંચ્યા હતા. તે દરમિયાન બંને મોટરસાયકલ રસ્તાની બાજુમાં ઉભી રાખીને બાથરૂમ માટે ઊભા હતા. એ સમયે દ્વારકા તરફથી પુરઝડપે આવી રહેલી એક અજાણ્યા ફોરવ્હીલ કારના ચાલકે બેદરકારીપૂર્વક વાહન હંકારી બંનેને જોરદાર ટક્કર મારી હતી. અકસ્માતમાં મનીષભાઈ જોગસિયાના ડાબા પગમાં ફ્રેક્ચર થયું હતું, જ્યારે સંગીતાબેનને માથા, ચહેરા અને શરીરના અન્ય ભાગોમાં ગંભીર ઇજાઓ પહોંચતાં તેમનું મોત નિપજ્યું હતું. અકસ્માત સર્જ્યા બાદ કારચાલક કોઈ મદદ કર્યા વગર સ્થળ પરથી ફરાર થઈ ગયો હતો.
આ બનાવ અંગે દ્વારકા પાર્ટ-એ પોલીસ મથકે અજાણ્યા કારચાલક સામે ભારતીય ન્યાય સંહિતા (BNS)ની કલમ 281, 125(બી), 106(1) તેમજ મોટર વાહન અધિનિયમની કલમ 177 અને 184 હેઠળ ગુનો નોંધી વધુ તપાસ શરૂ કરી છે. કેસની તપાસ પોલીસ સબ ઇન્સ્પેક્ટર પાયલબેન કારાભાઈ ડાંગર ચલાવી રહ્યા છે. પોલીસ દ્વારા અકસ્માત સ્થળની આસપાસના CCTV ફૂટેજ, ટેક્નિકલ પુરાવા અને અન્ય માહિતીના આધારે ફરાર કારચાલકની ઓળખ કરી તેને ઝડપી પાડવા માટે તજવીજ હાથ ધરવામાં આવી છે.
