જામનગર અપડેટ્સ જામજોધપુર: જામનગર જિલ્લાના જામજોધપુર તાલુકાના પરડવા ગામમાં જાહેર સ્થળે ગંજીપત્તાના પાનાં વડે પૈસાની હારજીતનો જુગાર રમાતો હોવાની માહિતીના આધારે પોલીસે દરોડો પાડી નવ શખ્સોને ઝડપી પાડ્યા હતા. પોલીસે સ્થળ પરથી રોકડ રકમ સહિતનો મુદ્દામાલ કબજે કરી તમામ સામે જુગારધારા હેઠળ ગુનો નોંધ્યો છે.
પોલીસ ફરિયાદ મુજબ, 20 જુલાઈ, 2026ના રોજ સાંજે આશરે 5:00 વાગ્યે જામજોધપુર પોલીસને મળેલી બાતમીના આધારે પરડવા ગામની ભાણપર સોસાયટી વિસ્તારમાં રહેતા રામભાઈ ગાંગડિયાના ઘરની બહાર આવેલા લીમડાના ઝાડ નીચે દરોડો પાડવામાં આવ્યો હતો. દરોડા દરમિયાન કેટલાક લોકો જાહેરમાં ગંજીપત્તાના 52 પાનાં વડે ‘તીન પત્તી રોન પોલીસ’ નામનો જુગાર રમી પૈસાની હારજીત કરતા ઝડપાઈ ગયા હતા. પોલીસે સ્થળ પરથી રોકડ રૂ. 11,720 તથા ગંજીપત્તાના પાનાં સહિતનો મુદ્દામાલ કબજે કર્યો હતો. આ કેસમાં પોલીસે સવજીભાઈ રૂડાભાઈ વિંઝુડા, પરેશભાઈ વલ્લભભાઈ કટારિયા, ઇસ્માઈલભાઈ મામદભાઈ જખરાણી, રામભાઈ બાબુભાઈ ગાંગડિયા, બાવનજીભાઈ મંગાભાઈ ભટાસણીયા, વિશાલ ગોવિંદભાઈ ગુજરાતી, જલ્પાબેન રામભાઈ ગાંગડિયા, હંસાબેન મુકેશભાઈ ગુજરાતી અને શોભનાબેન દેવાભાઈ ગુજરાતી એમ કુલ નવ આરોપીઓને ઝડપી કાયદેસરની કાર્યવાહી હાથ ધરી છે.
આ બનાવ અંગે જામજોધપુર પોલીસ મથકે તમામ આરોપીઓ સામે જુગારધારા કલમ-12 હેઠળ ગુનો નોંધી વધુ તપાસ શરૂ કરી છે. જાહેર સ્થળે ગેરકાયદે જુગારની પ્રવૃત્તિઓ સામે પોલીસ દ્વારા સતત કાર્યવાહી કરવામાં આવી રહી હોવાનું પણ જાણવા મળ્યું છે.
