જામનગર અપડેટ્સ: દેવભૂમિ દ્વારકા જિલ્લાના ખંભાળીયા ખાતે આવેલી વિશેષ પોક્સો અદાલતે એક સીમાચિહ્નરૂપ ચુકાદો આપતાં, સગીરાના બીભત્સ ફોટા સોશિયલ મીડિયા પર વાયરલ કરી ખંડણી માંગવાના ગંભીર ગુનામાં બે નરાધમોને કડક સજા ફટકારી છે. ટેકનિકલ પુરાવા અને મજબૂત દલીલોના આધારે નામદાર કોર્ટે બંને આરોપીઓને ૪ વર્ષની સખત કેદ અને રૂ. ૨.૫૦ લાખના મંગીન દંડનો હુકમ કર્યો છે.
ચકચારી બનાવની શું હતી સમગ્ર ઘટના?
ગત તારીખ ૨૪ ફેબ્રુઆરી ૨૦૨૪ ના રોજ ભરાણા ગામની એક સગીર વયની કિશોરીના કેટલાક બીભત્સ ફોટાઓ મેળવીને આરોપીઓએ એક વોટ્સએપ (WhatsApp) ગ્રૂપ બનાવ્યું હતું. આ ગ્રૂપમાં સગીરાના ફોટા શેર કરી, આરોપીઓએ ભોગ બનનાર પાસે ખંડણીની માંગણી કરી હતી. એટલું જ નહીં, જો ખંડણી નહીં આપવામાં આવે તો ફોટા અને વીડિયો સોશિયલ મીડિયા પર વાયરલ કરી બદનામ કરી દેવાની ગંભીર ધમકીઓ પણ આપી હતી. આ મામલે ગત તારીખ ૦૩ માર્ચ ૨૦૨૪ ના રોજ સાયબર ક્રાઈમ પોલીસ સ્ટેશનમાં વિધિવત ફરિયાદ નોંધાઈ હતી.જેના આધારે પોલીસે જે તે સમયે બંને આરોપીઓને પકડી પાડી કાયદાકીય કાર્યવાહી કરી જેલ હવાલે કર્યા હતા.
સજા પામેલા આરોપીઓની વિગત
1. અકરમ હુસેનભાઈ સાંજી
2. અકબર હુસેનભાઈ સાંજી
(બંને રહે. ખુશનુમા એપાર્ટમેન્ટ, તીન બત્તી, રાંદેર, સુરત. મૂળ રહે. બી-૧૭૨, સબરી નગર, વેડ દરવાજા, સુરત શહેર)
પોલીસની તપાસ અને કાયદાકીય કાર્યવાહી
સાયબર ક્રાઈમ પોલીસ સ્ટેશનના પોલીસ ઇન્સ્પેક્ટરશ્રી ડી.એચ.ભટ્ટ, પી.આઈ. પી.પી. બ્રહ્મભટ્ટ અને પોલીસ હેડ કોન્સ્ટેબલ પબુભાઈ ધારાભાઈ ગઢવી સહિતની ટીમે ગુનાની ઊંડાણપૂર્વક અને ઝીણવટભરી તપાસ હાથ ધરી હતી. પોલીસે ટેકનિકલ સર્વેલન્સ અને મજબૂત વૈજ્ઞાનિક પુરાવાઓ એકત્ર કરી સમય મર્યાદામાં નામદાર કોર્ટ સમક્ષ ચાર્જશીટ રજૂ કરી હતી.
આ કેસ દેવભૂમિ દ્વારકા જિલ્લાના મે. એડી. સેશન્સ જજ સાહેબશ્રી એસ.જી. મન્સૂરી સાહેબની (વિશેષ પોક્સો અદાલત) કોર્ટમાં ચાલ્યો હતો. જેમાં સરકારી વકીલશ્રી ભગીરથસિંહ એસ. જાડેજાએ ધારદાર દલીલો અને સચોટ ટેકનિકલ પુરાવા રજૂ કર્યા હતા, જેના આધારે કોર્ટે આરોપીઓને કસૂરવાર ઠેરવ્યા હતા અને ગુનેગારોને ૪ વર્ષની કેદની સજા તથા રૂ. ૨,૫૦,૦૦૦/- નો દંડ ભરવાનો આદેશ કરવામાં આવ્યો છે.
