જામનગર અપડેટ્સ કલ્યાણપુર: દેવભૂમિ દ્વારકા જિલ્લાના કલ્યાણપુર તાલુકામાં તસ્કરો બેફામ બન્યા હોય તેવી સ્થિતિ સર્જાઈ છે. એક તરફ ભાટવડીયા ગામમાં રહેણાંક મકાનમાં ઘરફોડ ચોરીની ઘટના સામે આવી છે તો બીજી તરફ રણજીતપુર ગામની સીમમાં આવેલા ઓપેરા સોલાર પ્લાન્ટમાંથી કિંમતી કોપર કેબલની ચોરી થતાં પોલીસમાં બે અલગ-અલગ ગુના નોંધાયા છે. બંને બનાવોમાં મળીને અંદાજે રૂ. 3.71 લાખથી વધુની મિલકત ચોરાઈ હોવાનું સામે આવ્યું છે.
પહેલી ઘટનામાં ભાટવડીયા ગામના ખેડૂત બાબુભાઈ કેશાભાઈ સોનગરાના રહેણાંક મકાનમાં તા. 20 જુલાઈના રોજ સવારે 8 વાગ્યાથી સાંજે 6:15 વાગ્યાની વચ્ચે અજાણ્યા તસ્કરે મકાનના ઉપરના નળીયા ઉંચકીને અંદર પ્રવેશ કર્યો હતો. બાદમાં રૂમમાં રાખેલી પતરાની ટાંકીમાં મુકેલી લાલ રંગની થેલીમાંથી રૂ. 1.80 લાખની રોકડ રકમ તથા આધાર કાર્ડ ચોરી કરી ફરાર થઈ ગયો હતો. આ બનાવ અંગે કલ્યાણપુર પોલીસે ભારતીય ન્યાય સંહિતાની સંબંધિત કલમો હેઠળ ગુનો નોંધી તપાસ શરૂ કરી છે.બીજી ઘટનામાં રણજીતપુર ગામની સીમમાં ચામુંડ માતાજીના મંદિર નજીક આવેલા ઓપેરા સોલાર પ્લાન્ટને અજાણ્યા તસ્કરોએ નિશાન બનાવ્યો હતો. ફરિયાદ મુજબ સોલાર પ્લાન્ટના એસ.સી.બી. મોડ્યુલમાંથી આવતો 6 એમએમનો અંદાજે 7,870 મીટર લાંબો કોપર કેબલ, જેની અંદાજિત કિંમત રૂ. 1,91,250 થાય છે, તેની ચોરી કરવામાં આવી હતી. આ મામલે પણ કલ્યાણપુર પોલીસ સ્ટેશનમાં ભારતીય ન્યાય સંહિતા હેઠળ ગુનો નોંધાયો છે.
બંને બનાવોમાં હાલ સુધી કોઈ આરોપીની ધરપકડ થઈ નથી. પોલીસે અલગ-અલગ ટીમો દ્વારા તસ્કરોની ઓળખ મેળવવા માટે તપાસનો ધમધમાટ શરૂ કર્યો છે. વારંવાર બની રહેલી ચોરીની ઘટનાઓને કારણે કલ્યાણપુર પંથકમાં લોકોમાં ચિંતાનું વાતાવરણ ફેલાયું છે અને રાત્રિ પેટ્રોલિંગ વધુ સઘન કરવાની માંગ ઉઠી રહી છે
