જામનગર અપડેટ્સ, જામનગર:
શહેરના સેતાવાડ વિસ્તારમાં બાળકોના રમવા બાબતે થયેલા સામાન્ય ઝઘડાએ લોહિયાળ સ્વરૂપ ધારણ કર્યું છે. શેરીમાં રમતા બાળક પર મરચાની ભૂકી ઉડાડવા બાબતે ઠપકો આપવા ગયેલા વૃદ્ધ પર માતાના ઉશ્કેરાટ બાદ પુત્રએ લાકડાના ધોકા વડે હુમલો કરી માથામાં જીવલેણ ઘા મારી હત્યા કરી નાખતાં ચકચાર મચી ગઈ છે. આ મામલે સિટી ‘એ’ ડિવિઝન પોલીસે માતા-પુત્ર સામે હત્યાનો ગુનો નોંધી કાયદેસરની કાર્યવાહી હાથ ધરી છે.
પોલીસ ફરિયાદમાંથી મળતી વિગતો અનુસાર, સેતાવાડ ધર્મના ડેલા સામે રહેતા અને તેલની ઘાણીનો વેપાર કરતા સાદીક ઇબ્રાહીમભાઇ ચાકી (ઉ.વ. ૩૭)નો ભત્રીજો ગત તા. ૨૯/૦૮/૨૦૨૬ના રોજ સાંજે આશરે ૭:૩૦ વાગ્યાની આસપાસ ઘર આગળ રમતો હતો. તે દરમિયાન પડોશમાં રહેતા હવાબેન અસલમભાઇ ઘાચીએ બાળકના શરીર પર મરચાની ભૂકી ઉડાડી તેની સાથે બોલાચાલી શરૂ કરી હતી.
બાળક સાથે થતી આ બોલાચાલી જોઈ સાદીકભાઈના પિતા ઇબ્રાહીમભાઇ ચાકી ત્યાં પહોંચ્યા હતા અને હવાબેનને સમજાવતાં કહ્યું હતું કે, “નાના છોકરાઓને કેમ રમવા દેતા નથી અને હેરાન કરો છો?” આ સાંભળી હવાબેન ઉશ્કેરાઈ ગયા હતા અને “હું તો હેરાન કરવાની જ છું” તેમ કહી ઇબ્રાહીમભાઇ સાથે ઉગ્ર ઝઘડો કરવા લાગ્યા હતા.
આ તકરાર ચાલતી હતી તે દરમિયાન હવાબેનનો પુત્ર અમન અસલમભાઇ ઘાચી ત્યાં દોડી આવ્યો હતો. હવાબેને પોતાના પુત્ર અમનને ઉશ્કેરતાં કહ્યું હતું કે, “આને પૂરો કરી દે!” માતાના કહેવાથી આવેશમાં આવેલા અમન ઘાચીએ લાકડાનો ધોકો લઈ ઇબ્રાહીમભાઇના માથાના પાછળના ભાગે જોરદાર ઘા ઝીંકી દીધો હતો. ગંભીર ઈજા થવાના કારણે ઇબ્રાહીમભાઇ જમીન પર ઢળી પડ્યા હતા અને તેમનું કરુણ મોત નીપજ્યું હતું.
આ બનાવ અંગે સાદીક ઇબ્રાહીમભાઇ ચાકીની ફરિયાદ પરથી સિટી ‘એ’ ડિવિઝન પોલીસ સ્ટેશનના પોલીસ ઇન્સ્પેક્ટર વી. એમ. ડોડીયાએ આરોપી અમન અસલમભાઇ ઘાચી અને હવાબેન અસલમભાઇ ઘાચી વિરુદ્ધ ભારતીય ન્યાય સંહિતા (BNS) ૨૦૨૩ ની કલમ ૧૦૩(૧), ૫૪ તથા જી.પી. એક્ટ કલમ ૧૩૫(૧) હેઠળ હત્યા અને મદદગારીનો ગુનો (ગુ.ર. નં. ૧૧૨૦૨૦૦૮૨૬૧૬૮૪/૨૦૨૬) નોંધી આગળની તપાસ શરૂ કરી છે.
