જામનગર અપડેટ્સ, જામનગર:
શહેરના ધરારનગર વિસ્તારમાં પીજીવીસીએલ (PGVCL)ના કર્મચારી પોતાની કાયદેસરની ફરજ પર હતા ત્યારે એક શખ્સે આવી “મોડા કેમ આવ્યા” તેમ કહી બોલાચાલી કરી, ઝાપટ મારી તેમજ હાથ મરડી નાખી ફરજમાં રુકાવટ કર્યાનો બનાવ સામે આવ્યો છે. આ મામલે સિટી ‘સી’ ડિવિઝન પોલીસે આરોપી વિરુદ્ધ ગુનો નોંધી કાયદેસરની કાર્યવાહી હાથ ધરી છે.
પોલીસ સૂત્રો પાસેથી મળતી વિગત અનુસાર, જામનગરમાં શરુ સેક્શન રોડ, સત્યમ હોટલ સામે, સરદાર પટેલ સોસાયટી શેરી નં. ૨ માં આવેલા નીલકંઠ રેસીડેન્સી ફ્લેટ નં. ૩૦૧ માં રહેતા દિનેશભાઈ રૂગનાથભાઈ બારૈયા (ઉ.વ. ૪૮) પીજીવીસીએલમાં નોકરી કરે છે. ગત તા. ૨૯/૦૮/૨૦૨૬ના રોજ બપોરે આશરે ૩:૦૦ વાગ્યાના સુમારે તેઓ ધરારનગર પાવર હાઉસ, ત્રણ માળીયા આવાસની પાછળ, સાત નાલા પાસે ખોડિયાર પોલીસ ચોકી બીટ વિસ્તારમાં પોતાની કાયદેસરની ફરજ પર કામ કરી રહ્યા હતા.
તે દરમિયાન જામનગરના રહેવાસી ખીમાજી જાડેજા નામના શખ્સે ત્યાં આવી દિનેશભાઈ સાથે તકરાર શરૂ કરી હતી અને “મોડા કેમ આવો છો?” તેમ કહી અપશબ્દો બોલ્યા હતા. ઉશ્કેરાયેલા આરોપીએ દિનેશભાઈને મોઢા પર ઝાપટ મારી દીધી હતી તેમજ તેમનો હાથ મરડી નાખી સામાન્ય ઈજા પહોંચાડી હતી. આ રીતે આરોપીએ પીજીવીસીએલ કર્મચારી પર હુમલો કરી તેમની કાયદેસરની સરકારી ફરજમાં રુકાવટ કરી હતી.
બનાવ અંગે દિનેશભાઈ બારૈયાએ સિટી ‘સી’ ડિવિઝન પોલીસ મથકમાં ફરિયાદ નોંધાવતાં પોલીસે આરોપી ખીમાજી જાડેજા વિરુદ્ધ ભારતીય ન્યાય સંહિતા (BNS)ની કલમ ૧૨૧(૧), ૨૨૧ અને ૨૯૬(બી) હેઠળ ગુનો (ગુ.ર.નં. ૧૧૨૦૨૦૦૨૨૬૧૫૪૨/૨૦૨૬) નોંધી આગળની તપાસ પીએસઆઈ કે. એચ. ચાવડાએ હાથ ધરી છે.
