સમગ્ર વિશ્વમાં ૦૮ માર્ચના દિવસે આંતરરાષ્ટ્રીય મહિલા દિવસની ઉજવણી કરવામાં આવે છે, ત્યારે જામનગર ખાતે સાંસદ પૂનમબેન માડમના અધ્યક્ષસ્થાને આજરોજ આંતરરાષ્ટ્રીય મહિલા દિવસની ઉજવણી કરવામાં આવી. શહેર જીલ્લામાં રાષ્ટ્રીય અને સ્થાનિક સ્તરે પ્રસંસનીય કામગીરી કરનાર મહિલાઓનું સન્માન કરવામાં આવ્યું હતું.
આંતરરાષ્ટ્રીય મહિલા દિવસ નિમિત્તે જામનગરમાં સ્થાનિક સાંસદ અને અન્ય મહાનુભાવોના હસ્તે વિવિધ ક્ષેત્રમાં વિશિષ્ટ સિદ્ધિ મેળવનાર મહિલાઓને સન્માનિત-પુરસ્કૃત કરવામાં આવ્યા. જેમાં રમતગમત ક્ષેત્રે રણજી ટ્રોફી વિજેતા છ મહિલા ખેલાડીઓ તથા અન્ય રમતમાં રાષ્ટ્રીય તેમજ રાજ્યકક્ષાએ સિદ્ધિ મેળવનાર મેળવનાર મહિલાઓને તેમજ સામાજિક ક્ષેત્રે, સાંસ્કૃતિક ક્ષેત્રે, મહિલા કલ્યાણ અને સેવા ક્ષેત્રમાં વિશેષ પ્રદાન આપનાર મહિલાઓને સન્માનિત કરવામાં આવ્યા હતા.
આ અવસરે સાંસદએ કહ્યું હતું કે, પ્રધાનમંત્રી નરેન્દ્રભાઈ મોદીએ મહિલા સશક્તિકરણ, મહિલા સુરક્ષા અને મહિલાઓની દરેક ક્ષેત્રમાં ભાગીદારી માટે અનેરું યોગદાન આપ્યું છે. ગુજરાતના મુખ્યમંત્રી સમયથી મહિલાઓને સર્વ ક્ષેત્રમાં આગળ લાવવાની પ્રધાનમંત્રી નરેન્દ્રભાઈ મોદીની નેમને વર્તમાન મુખ્યમંત્રીએ પણ આગળ ધપાવી છે.
સાંસદએ ઉમેર્યું હતું કે, સામાન્ય રીતે કોઈ પણ ક્ષેત્રમાં મહિલાઓએ પુરુષોની સાપેક્ષમાં પોતાની ક્ષમતા પુરવાર કરવા વધુ શ્રમ કરવો પડે છે ત્યારે સમાજની માનસિકતા બદલે અને આજની નારીને કરવા પડતા સંઘર્ષો આવતીકાલની નારીને ન કરવા પડે એવા સમાજનું નિર્માણ કરવાની અપીલ પણ સાંસદે કરી હતી.
નાના ભૂલકાઓની યશોદામાતા રૂપ આંગણવાડી કાર્યકરોને માતા યશોદા એવોર્ડ અને પુરસ્કારથી નવાજવામાં તેમજ બેટી બચાવો બેટી પઢાવો રંગોળી સ્પર્ધાના વિજેતાઓને અને વ્હાલી દીકરી યોજના તથા ગંગા સ્વરૂપા યોજનાના લાભાર્થીઓને મંજુરી હુકમો એનાયત કરવામાં આવ્યા હતા.
તદુપરાંત સખી વન સ્ટોપ સેન્ટર, અભયમ ૧૮૧ની ટીમ, પોલીસ બેઝ્ડ સપોર્ટ સિસ્ટમની ટીમ અને જિલ્લાના ઉત્કૃષ્ટ કામગીરી કરનાર વિવિધ સખીમંડળોના બહેનોને તેમના ઉત્કૃષ્ટ યોગદાન બદલ પ્રોત્સાહિત કરવામાં આવ્યા હતા. આંતરરાષ્ટ્રીય દીકરી દિવસ ઉજવણીના કાર્યક્રમમાં લોકોને રાજ્ય સરકારની વિવિધ યોજનાલક્ષી માહિતી મળે અને તેઓ તેનો લાભ લે તે માટે વિવિધ યોજનાના સ્ટોલ તેમજ જામનગર ડેન્ટલ કોલેજની ટીમ દ્વારા મહિલાઓને ઓરલ હેલ્થ વિશે જાગૃત કરી, ડેન્ટલ ચેકઅપ કેમ્પનું આયોજન કરવામાં આવ્યું હતું.
