જામનગર અપડેટ્સ: જામનગર જિલ્લામાં કાયદો અને વ્યવસ્થાને લગતી વિવિધ પ્રકારની ઘટનાઓ સામે આવી છે. એક તરફ મોટી ખાવડીમાં કંપનીની ઓફિસમાંથી લેપટોપની ચોરી અને શહેરના ગુલાબનગર વિસ્તારમાં બાઈક ચોરીની ફરિયાદ નોંધાઈ છે, તો બીજી તરફ શહેર પોલીસે જુગાર અને દારૂના અડ્ડાઓ સામે કાર્યવાહી કરી મહિલાઓ સહિત અનેક લોકોને ઝડપી પાડ્યા છે. આ ઉપરાંત જાંબુડા નજીક આવેલા વેલકમ વોટર પાર્કમાં ન્હાવા ગયેલા 14 વર્ષીય કિશોરના દુઃખદ મોતની ઘટના પણ સામે આવી છે. આવો, નજર કરીએ જામનગર જિલ્લાના વિવિધ પોલીસ મથકોમાં નોંધાયેલા આજના મુખ્ય ગુનાઓ અને પોલીસ કાર્યવાહીઓ પર…
1) મોટી ખાવડીની કંપનીની ઓફિસમાંથી રૂ. 30 હજારથી વધુ કિંમતનું લેપટોપ ચોરાયું, એક શખ્સ ઝડપાયો
જામનગર જિલ્લાના મેઘપર (પડાણા) પોલીસ મથકમાં લેપટોપ ચોરીની ફરિયાદ નોંધાઈ છે. ફરિયાદ મુજબ મોટી ખાવડી સ્થિત શિવમ કોમ્પ્લેક્ષમાં આવેલી ફોર્ચ્યુન હોસ્પિટાલિટી સર્વિસિસની ઓફિસમાંથી ટેબલ પર રાખેલું લેનોવો કંપનીનું આશરે રૂ. 30,423 કિંમતનું લેપટોપ કોઈ શખ્સ ચોરી કરી ગયો હતો. પોલીસે તપાસ દરમિયાન પશ્ચિમ બંગાળના રહેવાસી સુભાદિપ સુભાષ મંડલ (ઉ.વ.20)ને ઝડપી લઈ ભારતીય ન્યાય સંહિતા કલમ 306 હેઠળ ગુનો નોંધી વધુ તપાસ હાથ ધરી છે
2 ) જામનગર : ગુલાબનગરમાંથી રાત્રે પાર્ક કરેલી સ્પ્લેન્ડર બાઈક ચોરાઈ
જામનગર શહેરના ગુલાબનગર વિસ્તારમાં ઘરની બહાર પાર્ક કરેલી હીરો હોન્ડા સ્પ્લેન્ડર મોટરસાયકલની ચોરી થતાં સિટી બી ડિવિઝન પોલીસમાં ફરિયાદ નોંધાઈ છે. પ્રકાશભાઈ જયસુખભાઈ ચૌહાણે નોંધાવેલી ફરિયાદ મુજબ રૂ. 30 હજાર કિંમતની બાઈક અજાણ્યા શખ્સે ચોરી કરી લઈ ગયો હતો. પોલીસે ભારતીય ન્યાય સંહિતાની કલમ 303(2) હેઠળ ગુનો નોંધી ચોરની શોધખોળ શરૂ કરી છે.
3)
દરેડ GIDC પાસે કેબીનમાંથી વિદેશી દારૂનો જથ્થો ઝડપાયો
જામનગરના દરેડ GIDC વિસ્તારમાં પંચકોશી બી ડિવિઝન પોલીસે દરોડો પાડી પરમીટ વગર વિદેશી દારૂનો જથ્થો રાખનાર એક વ્યક્તિને ઝડપી પાડ્યો છે. પોલીસે નાથાલાલ કાનાભાઈ મારૂ પાસેથી રૂ. 2,500 કિંમતની ભારતીય બનાવટની વિદેશી દારૂની 20 બોટલ/ચપટા કબજે કર્યા છે. આરોપી સામે પ્રોહિબિશન એક્ટ હેઠળ ગુનો નોંધાયો છે.
4) જામનગરમાં મહિલાઓ તીનપત્તી રમતી ઝડપાઈ, રૂ. 30,800નો મુદ્દામાલ જપ્ત
સ્વામીનારાયણનગર વિસ્તારમાં જાહેરમાં તીનપત્તી જુગાર રમતી છ મહિલાઓને સિટી બી ડિવિઝન પોલીસે ઝડપી પાડી છે. પોલીસે સ્થળ પરથી રોકડા રૂ. 30,800 તેમજ ગંજીપત્તાના પાનાં કબજે કર્યા છે. તમામ મહિલાઓ સામે ગુજરાત જુગાર ધારા હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.
5) જામનગર: પટેલ કોલોની વિસ્તારમાં વિદેશી દારૂ સાથે ડ્રાઇવર ઝડપાયો
સિટી બી ડિવિઝન પોલીસે પટેલ કોલોની વિસ્તારમાં પેટ્રોલિંગ દરમિયાન એક વ્યક્તિ પાસેથી પરમીટ વગર રાખેલો ભારતીય બનાવટનો વિદેશી દારૂનો જથ્થો ઝડપી પાડ્યો છે. રાજુભા પ્રતાપસિંહ પરમાર પાસેથી રૂ. 12,600 કિંમતની સાત બોટલ કબજે કરવામાં આવી છે. પોલીસે પ્રોહિબિશન એક્ટ હેઠળ ગુનો નોંધી વધુ તપાસ હાથ ધરી છે.
6 ) જામનગર: વેલકમ વોટર પાર્કમાં ન્હાવા ગયેલા 14 વર્ષીય કિશોરનું મોત
જામનગર નજીક જાંબુડા ગામ પાસે આવેલા વેલકમ વોટર પાર્કમાં ન્હાવા ગયેલા 14 વર્ષીય આરવ શિવકુમાર સ્વર્ણકારનું દુઃખદ મોત થયું છે. પરિવારજનોના જણાવ્યા મુજબ ન્હાવા દરમિયાન તેને અચાનક છાતીમાં દુખાવો ઉપડ્યો હતો. સારવાર માટે પ્રથમ CHC અને ત્યારબાદ જી.જી. હોસ્પિટલ લઈ જતાં તબીબોએ તેને મૃત જાહેર કર્યો હતો. પંચકોશી એ ડિવિઝન પોલીસે અકસ્માત મોતનો ગુનો નોંધી મૃત્યુનું ચોક્કસ કારણ જાણવા તપાસ શરૂ કરી છે.
