જામનગર જિલ્લાના લાલપુર તાલુકાના પડાણા ગામે એન.ડી.પી.એસ. એક્ટ હેઠળ નોંધાયેલા ગુનામાં મેઘપર (પડાણા) પોલીસે હેરોઈન ડ્રગ્સ સાથે ત્રણ પરપ્રાંતીય મજૂરોને ઝડપી પાડ્યા છે. પોલીસે કુલ રૂ.1,42,110નો મુદ્દામાલ કબજે કરી વધુ તપાસ હાથ ધરી છે.
પોલીસમાંથી પ્રાપ્ત વિગતો મુજબ, મેઘપર (પડાણા) પોલીસ સ્ટેશનમાં પાર્ટ-બી ગુ.ર.નં. 0604/2026 હેઠળ એન.ડી.પી.એસ. એક્ટની કલમ 8(સી), 21(બી) અને 29 મુજબ ગુનો નોંધાયો છે. આ કેસમાં તા. 8 માર્ચ 2026ના રોજ બપોરે 1:42 વાગ્યે થાણાથી દક્ષિણ દિશામાં અંદાજે ત્રણ કિલોમીટર દૂર પડાણા ગામે પાણીના ટાંકા પાસે આવેલી દિનેશભાઈ મઢવીની રહેણાંક ઓરડી પર રેઇડ કરવામાં આવી હતી.
રેઇડ દરમિયાન પોલીસે પ્રભશેરસીંગ સવેદરસીંગ (ઉ.વ.35), શેરસીંગ ઉર્ફે શેરા ગુરદેવસીંગ (ઉ.વ.40) અને દિલબાગસીંગ બચ્ચનસીંગ (ઉ.વ.44) નામના ત્રણ શીખ સમાજના પરપ્રાંતીય મજૂરોને ઝડપી પાડ્યા હતા. ત્રણેય હાલ પડાણા ગામે રહેતા હતા અને મૂળ પંજાબ રાજ્યના અમૃતસર તથા ગુરદાસપુર જિલ્લાના રહેવાસી હોવાનું જાણવા મળ્યું છે. આ ઉપરાંત મનાસીંગ નામના ચોથા આરોપીની સંડોવણી સામે આવી છે, જે હાલ ફરાર હોવાનું પોલીસ તપાસમાં બહાર આવ્યું છે.
પોલીસ તપાસમાં ખુલ્યું છે કે આરોપી પ્રભશેરસીંગે મનાસીંગ પાસેથી ગેરકાયદેસર રીતે હેરોઈન (ઓપિયમ ડેરિવેટિવ્ઝ) ખરીદી લાવી હતી અને પડાણા તથા આસપાસના વિસ્તારોમાં રહેતા પરપ્રાંતીય મજૂરોને છૂટક વેચાણ કરવા માટે આરોપી નંબર 1થી 3એ પોતાના કબજામાં રાખી હતી. રેઇડ દરમિયાન પોલીસે કુલ 6.23 ગ્રામ હેરોઈન, જેની કિંમત રૂ.1,24,600 થાય છે, જપ્ત કર્યું હતું.
આ ઉપરાંત આરોપીઓ પાસેથી ચાર મોબાઇલ ફોન (રૂ.15,500), એક ઇલેક્ટ્રિક સેલવાળો નાનો વજન કાંટો (રૂ.500) અને રોકડા રૂ.1,510 મળી આવ્યા હતા. આમ કુલ રૂ.1,42,110નો મુદ્દામાલ કબજે કરવામાં આવ્યો છે.
આ સમગ્ર કાર્યવાહી મેઘપર (પડાણા) પોલીસ સ્ટેશનના એ.એસ.આઈ. વિરેન્દ્રસિંહ ચંદુભા જાડેજાના માર્ગદર્શન હેઠળ હાથ ધરવામાં આવી હતી. જ્યારે ગુનો નોંધી આગળની તપાસ સીકકા પોલીસ સ્ટેશનના પોલીસ ઇન્સ્પેક્ટર ડી.બી. પટેલને સોંપવામાં આવી છે.
પોલીસ હાલ ફરાર આરોપી મનાસીંગને ઝડપી પાડવા માટે શોધખોળ ચલાવી રહી છે અને ડ્રગ્સ સપ્લાયની કડી ક્યાં સુધી પહોંચે છે તે દિશામાં પણ તપાસ આગળ વધારવામાં આવી રહી છે.
