પ્રાઈમ ઇન્ફૉ
- કાલાવડમાં જમીનના દસ્તાવેજ મામલે અલ્પેશ દોંગા સહિત પાંચ સામે ફરિયાદ
- નાણાકીય મુશ્કેલીનો ગેરલાભ લઈ 3% માસિક વ્યાજે ઉઘરાણીનો આક્ષેપ
- ખેતીની જમીનના દસ્તાવેજ અલગ-અલગ વ્યક્તિના નામે કરાવ્યાનો ફરિયાદમાં ઉલ્લેખ
- જાનથી મારી નાખવાની ધમકી આપી HDFC બેન્કનો કોરો ચેક પડાવી લીધાનો આક્ષેપ
- અલ્પેશ દોંગા અને તેની ટોળકી સામે એક જ પોલીસ સ્ટેશનમાં અગાઉ પણ બે ફરિયાદો નોંધાઈ હતી
જામનગર અપડેટ્સ કાલાવડ તાલુકાના માખાકરોડ ગામની ખેતીની જમીનના દસ્તાવેજ મામલે રાજકોટના પાંચ વ્યક્તિઓ સામે કાલાવડ ટાઉન પોલીસ સ્ટેશનમાં ગંભીર કલમો હેઠળ ફરિયાદ નોંધાઈ છે. ફરિયાદમાં નાણાકીય મુશ્કેલીનો ગેરલાભ લઈ માસિક 3 ટકા વ્યાજે નાણાંની ઉઘરાણી, જમીનના દસ્તાવેજો કરાવી લેવાની સાથે જાનથી મારી નાખવાની ધમકી આપી કોરો ચેક પડાવી લેવાના આક્ષેપો કરવામાં આવ્યા છે.
પોલીસ ફરિયાદ મુજબ, જાન્યુઆરી 2022થી જુલાઈ 2022 દરમિયાન ફરિયાદી ધનજીભાઈ હીરાભાઈ મોરીને આરોપી અલ્પેશભાઈ દોંગાએ રાજકોટ ખાતે આવેલી પોતાની ‘પટેલ ઇન્વેસ્ટમેન્ટ’ ઓફિસે બોલાવ્યા હતા. ફરિયાદીની કાલાવડ તાલુકાના માખાકરોડ ગામની ખેતીની જમીન નવા રેવન્યુ સર્વે નંબર 102 (જૂના રેવન્યુ સર્વે નંબર 102/પૈકી 3), હે.આ.ચો.મી. 1-22-61 એટલે કે આશરે 3 એકર 1 ગુંઠા જમીનને સિક્યુરિટી પેટે રાખવાના નામે દસ્તાવેજ કરાવવામાં આવ્યો હોવાનો ફરિયાદમાં ઉલ્લેખ છે.
ફરિયાદમાં વધુ આક્ષેપ મુજબ, આરોપીઓએ ફરિયાદી પાસેથી 3 ટકા માસિક વ્યાજે નાણાં આપવાના બહાને કુલ રૂ.48,000ની વ્યાજની રકમ વસૂલ કરી હતી. ત્યારબાદ ફરિયાદીની ઉપરોક્ત ખેતીની જમીનનો દસ્તાવેજ આરોપી ભારતીબેન રમેશભાઈ પરસાણાના નામે કરાવી લેવામાં આવ્યો હોવાનો આક્ષેપ છે. ઉપરાંત, આરોપી અમીતભાઈ પટેલે ફરિયાદીને જાનથી મારી નાખવાની ધમકી આપી HDFC બેન્કનો એક કોરો ચેક બળજબરીથી મેળવી લીધો હોવાનો પણ ફરિયાદમાં આક્ષેપ કરવામાં આવ્યો છે.
ફરિયાદ મુજબ, ત્યારબાદ અમીતભાઈ પટેલ અને નીમેષભાઈ બાબુભાઈ રામાણીએ ફરિયાદીને અગાઉ કરાવેલો જમીનનો દસ્તાવેજ રદ કરાવી આપવાની ખાતરી આપી હતી. જોકે, જમીનનો દસ્તાવેજ રદ કરાવવાના બદલે ફરીથી આ જમીનનો દસ્તાવેજ આરોપી બાબુભાઈ નરશીભાઈ રામાણીના નામે કરાવવામાં આવ્યો હોવાનો આક્ષેપ છે. ફરિયાદીનો આક્ષેપ છે કે તમામ આરોપીઓએ પરસ્પર એકબીજાની મદદગારીથી પૂર્વઆયોજિત કાવતરું રચી નાણાકીય મુશ્કેલીનો ગેરલાભ લીધો અને જમીનના દસ્તાવેજો પોતાના અથવા અન્ય વ્યક્તિના નામે કરાવી લીધા. આજદિન સુધી જમીનનો દસ્તાવેજ રદ ન કરાવી ફરિયાદી સાથે વિશ્વાસઘાત કરવામાં આવ્યો હોવાનો પણ ફરિયાદમાં ઉલ્લેખ છે.
આ મામલે કાલાવડ ટાઉન પોલીસે અલ્પેશભાઈ ગોપાલભાઈ દોંગા, અમીતભાઈ પટેલ, નીમેષભાઈ બાબુભાઈ રામાણી, બાબુભાઈ નરશીભાઈ રામાણી અને ભારતીબેન રમેશભાઈ પરસાણા વિરુદ્ધ ભારતીય દંડ સંહિતાની કલમ 409, 386, 506(2), 120(B), 34 તેમજ ગુજરાત નાણા ધિરધાર અધિનિયમની કલમ 5, 39 અને 42 મુજબ ગુનો નોંધી વધુ તપાસ હાથ ધરી છે.
નોંધ: ઉપરોક્ત વિગતો પોલીસ ફરિયાદમાં કરવામાં આવેલા આક્ષેપો અને નોંધાયેલા ગુનાના આધારે છે; આરોપો અંગેનો અંતિમ નિર્ણય તપાસ તથા ન્યાયિક પ્રક્રિયા બાદ થશે.
