પ્રાઈમ ઇન્ફૉ:
- દેશમાં ત્રીજો રેન્ક: જામનગરની 21 વર્ષીય શિવા નિલેશભાઈ ત્રિવેદીએ SSC (ટેકનિકલ) વુમન-67 એન્ટ્રીમાં ઓલ ઇન્ડિયા મેરિટ લિસ્ટમાં ત્રીજો રેન્ક મેળવ્યો, બેંગલોરમાં 268 ઉમેદવારોમાંથી ટોપ-4 માં સ્થાન મેળવ્યું.
- OTA ગયામાં ટ્રેનિંગ: તે 5 ઓક્ટોબરથી બિહારના ગયા ખાતેની ઓફિસર્સ ટ્રેનિંગ એકેડેમી (OTA)માં લેફ્ટનન્ટ તરીકે તાલીમ શરૂ કરી છે.
- નોકરી ઠુકરાવી દેશસેવા: વડોદરાની પારુલ યુનિવર્સિટીમાંથી એરોનોટિકલ એન્જિનિયરિંગ કર્યા બાદ મલ્ટિનેશનલ કંપનીની નોકરીની ઓફર ઠુકરાવીને સેનામાં જોડાવાનું પસંદ કર્યું.
- NCC એર વિંગનો અનુભવ: કોલેજમાં NCC એર વિંગમાં રહીને સોર્ટી ઉડાડવાનો પ્રત્યક્ષ અનુભવ મેળવ્યો હતો, જે SSB પરીક્ષા પ્રથમ પ્રયાસમાં પાસ કરવામાં મદદરૂપ બન્યો.
- માતાનો સંદેશ: માતા અને સરકારી વકીલ દીનાબેન ત્રિવેદીએ કહ્યું – પરિવારમાં સંઘર્ષ છતાં શિવાએ મહેનતથી સિદ્ધિ મેળવી, વાલીઓએ બાળકોને તેમની રુચિ મુજબ પ્રોત્સાહન આપવું જોઈએ.
જામનગર માટે ગૌરવ અને પ્રેરણારૂપ સમાચાર સામે આવ્યા છે. શહેરની દીકરી શિવા નિલેશભાઈ ત્રિવેદીએ માત્ર 21 વર્ષની ઉંમરે ભારતીય સેનામાં લેફ્ટનન્ટ તરીકે પસંદગી મેળવીને જામનગરનું નામ દેશભરમાં રોશન કર્યું છે. શિવાએ શોર્ટ સર્વિસ કમિશન (ટેકનિકલ) વુમન-67 એન્ટ્રી હેઠળ ઓલ ઇન્ડિયા મેરિટ લિસ્ટમાં ત્રીજો રેન્ક પ્રાપ્ત કર્યો છે. તે આગામી તા. 5 ઓક્ટોબરથી બિહારના ગયા ખાતે આવેલી પ્રતિષ્ઠિત ઓફિસર્સ ટ્રેનિંગ એકેડેમી (OTA) માં પોતાની લશ્કરી તાલીમ શરૂ કરશે.
શિવા ત્રિવેદીનું આ સપનું નાનપણથી જ હતું. તેણે વડોદરાની જાણીતી પારુલ યુનિવર્સિટીમાંથી એરોનોટિકલ એન્જિનિયરિંગમાં અભ્યાસ પૂર્ણ કર્યો છે. એન્જિનિયરિંગ પૂર્ણ થયા બાદ અનેક મલ્ટિનેશનલ કંપનીઓ તરફથી લાખોના પગારની નોકરીની ઓફર મળી હતી, પરંતુ શિવાએ તે તમામ ઓફરોને ઠુકરાવી દીધી અને દેશસેવાનો માર્ગ પસંદ કર્યો. આ તેના દેશપ્રેમ અને મક્કમ મનોબળનું ઉત્તમ ઉદાહરણ છે.
આ સફળતા મેળવવા માટે શિવાએ ત્રણેય સેનાઓ – આર્મી, નેવી અને એરફોર્સમાં અરજી કરી હતી. તેની પસંદગી પ્રક્રિયા બેંગ્લોર ખાતે યોજાઈ હતી. સાઉથ ઝોનમાંથી કુલ 268 ઉમેદવારોમાંથી અંતિમ 4 માં તેનો સમાવેશ થયો હતો, જેમાં પણ તે પ્રથમ ક્રમે રહી હતી. અંતે ઓલ ઇન્ડિયા મેરિટ લિસ્ટમાં ત્રીજો રેન્ક મેળવીને તેણે પોતાની કાબેલિયત સાબિત કરી છે.
શિવાની આ સફળતા પાછળ તેના કોલેજકાળની મહેનત પણ જવાબદાર છે. કોલેજ દરમિયાન તે NCC એર વિંગમાં સક્રિય હતી અને ત્યાં તેણે સોર્ટી ઉડાવવાનો પ્રત્યક્ષ અનુભવ પણ મેળવ્યો હતો. તેના બહેને જણાવ્યા મુજબ, નાનપણથી જ તેનું લક્ષ્ય ડિફેન્સ ફોર્સમાં ઓફિસર બનવાનું હતું. ટેકનિકલ ફિલ્ડનું ઊંડું જ્ઞાન, કરંટ અફેર્સ અને જનરલ અવેરનેસ પરની મજબૂત પકડને કારણે તેણે યુપીએસસી સમકક્ષ ગણાતી અત્યંત અઘરી SSB ઇન્ટરવ્યૂ પરીક્ષા પ્રથમ જ પ્રયાસમાં પાસ કરી લીધી હતી.
રોજ સવારે વહેલા ઉઠીને રોડ પર દોડવાની પ્રેક્ટિસ, ફિટનેસ અને શારીરિક તાલીમ માટેની તેની મહેનત આજે તસવીરોમાં પણ સ્પષ્ટપણે દેખાય છે.
શિવાની માતા અને સરકારી વકીલ દીનાબેન ત્રિવેદીએ આ અંગે વાત કરતાં જણાવ્યું હતું કે, પરિવારમાં અનેક સંઘર્ષો વચ્ચે પણ શિવાએ પોતાની સખત મહેનત અને લગનથી આ સિદ્ધિ હાંસલ કરી છે. તેમણે સમાજના તમામ વાલીઓને અપીલ કરી છે કે તેઓ પોતાના બાળકોને તેમની રુચિ અને સપના મુજબ આગળ વધવા માટે પ્રોત્સાહન આપે.
જામનગરની આ દીકરીએ માત્ર પોતાના પરિવારનું જ નહીં, પરંતુ સમગ્ર જામનગર અને ગુજરાતનું ગૌરવ વધાર્યું છે. તેની આ સફર આવનારી પેઢીની અનેક દીકરીઓ માટે પ્રેરણાસ્ત્રોત બનશે. જામનગર અપડેટ્સ પરિવાર તરફથી લેફ્ટનન્ટ શિવા ત્રિવેદીને ઉજ્જવળ ભવિષ્ય માટે ખૂબ ખૂબ શુભેચ્છાઓ.
