જામનગર અપડેટ્સ: જામનગરની ભાગોળે આવેલા અતિ વ્યસ્ત એવા ઠેબા ચોકડી વિસ્તારમાં મોડી રાત્રે એક કાળમુખા ટ્રકે ભારે ધમાકો મચાવ્યો હતો. એક બેફામ ગતિએ આવી રહેલા ટ્રક ચાલકે સ્ટેયરીંગ પરથી કાબૂ ગુમાવતા માર્ગ પરથી પસાર થઈ રહેલા એક મોટરસાયકલ, બે લક્ઝુરિયસ કાર અને એક મારુતિ ઈકો વાન સહિત એકસાથે પાંચ વાહનોને અડફેટે લઈને કચડ્યા હતા. આ સીરિયલ અકસ્માતને પગલે હાઈવે પર મોડી રાત્રે ચીસાચીસ અને અફરાતફરીનો માહોલ સર્જાયો હતો.
એક પછી એક વાહનોનો કચ્ચરઘાણ વળ્યો
આ બનાવની પ્રાપ્ત વિગતો અનુસાર, ઠેબા ચોકડી પાસેથી પસાર થઈ રહેલા એક ભારે માલવાહક ટ્રકે આગળ જઈ રહેલા વાહનોને પાછળથી ધડાધડ ઠોકર મારી હતી. આ અકસ્માત એટલો ભયાનક હતો કે વાહનોનો કચ્ચરઘાણ વળી ગયો હતો.અકસ્માતમાં હીરો મોટરસાયકલ (નંબર: GJ-10-BK-9293) ના ચાલકને ગંભીર ઈજાઓ પહોંચતા લોહીલુહાણ હાલતમાં તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યો છે.
લક્ઝરી કારોને ભારે નુકસાન
અકસ્માતમાં કાળા રંગની હ્યુન્ડાઈ ક્રેટા કાર (નંબર: GJ-10-EH-9291) ના આગળના ભાગના ફુરચા ઉડી ગયા હતા. જ્યારે સિલ્વર કલરની મારુતિ બ્રેઝા કાર (નંબર: GJ-10-DR-6733) નો પાછળનો આખો ભાગ દબાઈ ગયો હતો અને કાચ તૂટી ગયા હતા. આ ઉપરાંત સફેદ રંગની મારુતિ ઓમ્ની/ઈકો વાનને પણ સાઈડમાંથી ભારે નુકસાન પહોંચ્યું હતું. સદનસીબે કારમાં સવાર મુસાફરોનો આબાદ બચાવ થયો હતો.
હાઈવે પર ટ્રાફિક જામ, પોલીસે ટ્રક ચાલકને દબોચ્યો
એકસાથે પાંચ વાહનો વચ્ચે સર્જાયેલા આ હિંસક અકસ્માતના પગલે ઠેબા ચોકડી પર બંને બાજુ વાહનોની લાંબી કતારો લાગી ગઈ હતી અને મોટો ટ્રાફિક જામ સર્જાયો હતો. ઘટનાની જાણ થતાં જ જામનગર સિટી એ ડિવિઝન પોલીસનો કાફલો ઘટનાસ્થળે દોડી ગયો હતો. પોલીસે ક્રેન અને સ્થાનિક લોકોની મદદથી વાહનોને રોડની સાઈડમાં કરાવી ટ્રાફિક હળવો કર્યો હતો. પોલીસે અકસ્માત સર્જનાર ટ્રક ચાલકની ઘટનાસ્થળેથી જ અટકાયત કરી લીધી છે અને તેની વિરુદ્ધ ગુનો નોંધી કાયદેસરની કાર્યવાહી હાથ ધરી છે.
ઠેબા ચોકડી ડેથ ઝોન બની: ઓવરબ્રિજ બનાવવાની લોકમાંગ
આ અકસ્માતને પગલે સ્થાનિક રહીશો અને વાહનચાલકોમાં ભારે રોષ જોવા મળી રહ્યો છે. સ્થાનિકોના જણાવ્યા મુજબ, જામનગરની ઠેબા ચોકડી પાસે અવારનવાર નાના-મોટા ગંભીર અકસ્માતો સર્જાય છે અને આ વિસ્તાર હવે ‘ડેથ ઝોન’ બની રહ્યો છે. ટ્રાફિકનું ભારણ સતત વધી રહ્યું હોવાથી અહીં તાત્કાલિક ધોરણે ફ્લાયઓવર (ઓવરબ્રિજ) બનાવવામાં આવે તે અત્યંત જરૂરી બન્યું છે. તંત્ર દ્વારા વહેલી તકે આ અંગે પગલાં લેવામાં આવે તેવી લોકમાંગ ઉગ્ર બની છે.
