પ્રાઈમ ઇન્ફૉ
• જામનગરના નાઘેડી GIDCમાં સ્ટેટ મોનીટરીંગ સેલનો દરોડો, વિદેશી દારૂની હેરાફેરીનો પર્દાફાશ
• 10,409 બોટલ વિદેશી દારૂ, કિંમત રૂ.37.21 લાખનો જથ્થો કબજે કરાયો
• દારૂ સહિત કુલ રૂ.1.37 કરોડથી વધુનો મુદ્દામાલ પોલીસના કબજામાં
• દિપક ઉર્ફે અટાપટુ અને યુવરાજસિંહ ચુડાસમાની ધરપકડ, મુખ્ય આરોપી સહિત અન્યની શોધખોળ
• પ્લાસ્ટીકના દાણાના બોક્સની આડમાં દારૂ લાવવામાં આવ્યો હોવાનો પોલીસનો આક્ષેપ, પંચ બી ડિવિઝનમાં ગુનો નોંધાયો
જામનગર અપડેટ્સ : જામનગરના નાઘેડી GIDC વિસ્તારમાં સ્ટેટ મોનીટરીંગ સેલની ટીમે દરોડો પાડી વિદેશી દારૂની હેરાફેરીનો પર્દાફાશ કર્યાનો પોલીસ ફરિયાદમાં ઉલ્લેખ છે. પ્લાસ્ટીકના દાણાના બેગની આડમાં ગુજરાતમાં પ્રતિબંધિત વિદેશી દારૂનો જથ્થો લાવવામાં આવ્યો હોવાના આક્ષેપ સાથે પોલીસે બે શખ્સોની ધરપકડ કરી છે, જ્યારે મુખ્ય આરોપી સહિત અન્ય 9 આરોપીઓની શોધખોળ હાથ ધરવામાં આવી છે. સમગ્ર કાર્યવાહીમાં દારૂ, વાહનો, મોબાઇલ, રોકડ સહિત કુલ રૂ.1,37,58,491નો મુદ્દામાલ કબજે કરાયો હોવાનું પોલીસ દ્વારા જણાવાયું છે.
પોલીસ ફરિયાદ મુજબ તા. 4 ઓક્ટોબર 2026ના વહેલી સવારે 4:35 વાગ્યે નાઘેડી ગામના GIDC વિસ્તારમાં ખુલ્લા જાહેર રોડ પર દરોડો પાડવામાં આવ્યો હતો. આ કાર્યવાહી સ્ટેટ મોનીટરીંગ સેલ, ગુજરાત રાજ્ય, ગાંધીનગર દ્વારા કરવામાં આવી હતી.
10,409 બોટલનો જથ્થો મળી આવ્યો
દરોડા દરમિયાન પોલીસે વિદેશી દારૂની નાની-મોટી કુલ 10,409 બોટલો કબજે કરી હતી. આ દારૂની કુલ કિંમત રૂ.37,21,848 હોવાનું પોલીસ ફરિયાદમાં જણાવાયું છે. આ ઉપરાંત દારૂની હેરાફેરીમાં ઉપયોગમાં લેવાયેલા વિવિધ વાહનો સહિત અન્ય મુદ્દામાલ પણ કબજે કરવામાં આવ્યો હતો.
પોલીસે ટાટા કંપનીનો બંધ બોડી ટ્રક RJ-14-GT-6136, કિંમત રૂ.20 લાખ, તેમજ અશોક લેલન બડા દોસ્તનાં બે વાહનો GJ-10-TY-0384 અને GJ-36-V-7210, પ્રત્યેકની કિંમત રૂ.7 લાખ, કબજે કર્યા છે. ઉપરાંત બે ટુ-વ્હીલર, ચાર મોબાઇલ ફોન અને રૂ.12,030 રોકડ પણ કબજે કરવામાં આવી છે.
દારૂ છુપાવવા પ્લાસ્ટીકના દાણાના બોક્સનો ઉપયોગ થયાનો આક્ષેપ
ફરિયાદમાં જણાવ્યા મુજબ ટ્રકમાં KEI Industries Limitedના ઇનવોઈસ મુજબ પ્લાસ્ટીકના દાણાના 24 બોક્સ, જેની કિંમત રૂ.65,24,113 હોવાનું નોંધાયું છે, તેની આડમાં દારૂનો જથ્થો લઈ જવામાં આવ્યો હોવાનો પોલીસનો આક્ષેપ છે. આ ઉપરાંત પીળા રંગની એક તાલપત્રી પણ કબજે કરવામાં આવી છે.
બેની ધરપકડ, મુખ્ય આરોપી સહિત અન્યની શોધખોળ
દરોડા દરમિયાન દિપક ઉર્ફે અટાપટુ જમનાદાસ જેઠવાણી (ઉં.વ.35), રહે. જામનગર અને યુવરાજસિંહ કાળુભા ચુડાસમા (ઉં.વ.27), રહે. નાઘેડી પોલીસને મળી આવતા બંનેની ધરપકડ કરવામાં આવી છે.
જ્યારે પોલીસ ફરિયાદ મુજબ રામ ઉર્ફે રામકો જીવાભાઈ મોઢવાડીયાને વિદેશી દારૂનો જથ્થો મંગાવનાર મુખ્ય આરોપી તરીકે દર્શાવવામાં આવ્યો છે. તેના ઉપરાંત કાના જીવાભાઈ મોઢવાડીયા, ઈરફાન કાસમ કાટેલીયા, જિજ્ઞેશ ઉર્ફે જીગો વિનોદ ખિચડા, ટ્રકના ડ્રાઈવર અસ્પાક, ક્લીનર રાહુલ રઝાક તથા સંબંધિત વાહનોના માલિકો સહિત અન્ય આરોપીઓની ધરપકડ બાકી હોવાનું પોલીસ ફરિયાદમાં જણાવાયું છે.
સંગઠિત રીતે દારૂની હેરાફેરીનો આક્ષેપ
પોલીસ ફરિયાદ મુજબ તમામ આરોપીઓએ એકબીજાના મેળાપીપણામાં ગુજરાતમાં પ્રતિબંધિત વિદેશી દારૂનું કટીંગ અને વેચાણ કરવા માટે કાવતરું રચ્યું હોવાનો આક્ષેપ છે. તેમજ દારૂની ગેરકાયદેસર પ્રવૃત્તિમાં સંગઠિત રીતે સંડોવણી હોવાના આક્ષેપ હેઠળ ગુજરાત નશાબંધી અધિનિયમની વિવિધ કલમો ઉપરાંત ભારતીય ન્યાય સંહિતા-2023ની કલમ 111(2)(બી), 111(3) અને 111(4) હેઠળ ગુનો નોંધવામાં આવ્યો છે.
પંચ બી ડિવિઝન પોલીસ સ્ટેશનમાં ગુ.ર.નં.11202046261187/2026 હેઠળ ગુનો નોંધાયો છે. સમગ્ર મામલે હવે ફરાર આરોપીઓની શોધખોળ સહિત વધુ તપાસ હાથ ધરવામાં આવી રહી છે. પોલીસ તપાસમાં અન્ય કોઈ વ્યક્તિની સંડોવણી સામે આવે છે કે કેમ તે પણ તપાસનો વિષય છે.
