જામનગર અપડેટ્સ: જામનગર શહેરમાં ગરબીના આયોજનને લઈને ચાલી રહેલા વિવાદમાં હવે જામ રાજવી પરિવારના જામ સાહેબ શત્રુશલ્યસિંહજીએ સત્તાવાર અને સ્પષ્ટ પ્રતિક્રિયા આપી છે. અંબા વિજય હોસ્પિટલ માટેના પ્લોટમાં ગરબી કરાવવાની યોજના વિરુદ્ધ ગઈકાલે શહેર ભાજપા પ્રમુખ સહિતના અગ્રણીઓએ એસ.પી. અને કલેક્ટર સમક્ષ ગરબીનું આયોજન ન થાય તથા મંજૂરી ન અપાય તેવી માંગ સાથે આવેદનપત્ર આપી રજૂઆત કરી હતી, જેના સંદર્ભમાં જામસાહેબે આ નિવેદન જાહેર કર્યું છે.
જામસાહેબ શત્રુશલ્યસિંહજીના નિવેદનના મુખ્ય મુદ્દાઓ:
આંદોલન અને વ્યવસ્થા અંગે: જામસાહેબે જણાવ્યું હતું કે આંદોલન કરવાની રજૂઆત સત્ય હોઈ શકે, પરંતુ ગામમાં સો જેટલી જગ્યાઓ પર ગરબીઓ રમાય છે અને ત્યાં પણ આ જ પ્રકારની તકલીફો હોય છે. જો આ જ કારણ હોય તો આખા ગામમાં બધે જ ઠેકાણે ગરબીઓ બંધ થવી જોઈએ, માત્ર અહીં જ કેમ?
સમય અને પાર્કિંગની વિશેષ વ્યવસ્થા: ગરબીઓ સવારના ૪ વાગ્યા સુધી ચાલતી હોવાના મુદ્દે જામસાહેબે સ્પષ્ટ સૂચના આપી છે કે આ ગરબી રાત્રે ૧૧:૩૦ વાગ્યા સુધીમાં જ સંપૂર્ણપણે પૂરી થઈ જવી જોઈએ. તેમજ વાહન પાર્કિંગ માટે આ પ્લોટમાં જ વિશાળ જગ્યા રાખવાની સૂચના આપવામાં આવી છે જેથી ટ્રાફિક કે પાર્કિંગની કોઈ સમસ્યા ન સર્જાય.
હિન્દુ વિસ્તારમાં વિરોધ પર આશ્ચર્ય: જામસાહેબે આશ્ચર્ય વ્યક્ત કર્યું છે કે જે વિસ્તારમાં મોટાભાગે હિન્દુ રહેવાસીઓ છે, ત્યાં જ જો ગરબી સામે વાંધો હોય તો તે ખૂબ જ આશ્ચર્યજનક છે. તેમણે લોકોને અપીલ કરી છે કે તેઓ પોતાના વિચારો પર ચાલે અને બીજા મતલબી લોકોના દોરવાયા ન ચાલે.
યોજના અંગે સ્પષ્ટતા: અંતમાં જામસાહેબે સ્પષ્ટ કર્યું કે આ યોજનાની કલ્પના તેમની પોતાની નથી અને તેઓ પોતે તે કરતા નથી, પરંતુ તેમને લાગ્યું કે જામનગર શહેર આખા માટે આ યોજના ખૂબ જ સુંદર અને કરવાલાયક છે, જેના માટે તેમણે માત્ર પરવાનગી આપી છે. હવે તેમને આમાં વચમાં પડવાની કોઈ ઈચ્છા નથી અને આ મામલો કર્તાહર્તા, વાંધો લેનારાઓ અને સરકારી અધિકારીઓએ સાથે મળીને નિકાલ કરવાનો રહેશે.
