પ્રાઈમ ઇન્ફૉ :
ઘટના અને સ્થળ: જામનગરના સિક્કા વિસ્તારમાં આવેલી રાધાસ્વામી સોસાયટીમાં વહેલી સવારે નંબર પ્લેટ વગરની કારમાં આવેલા પાંચ શખ્સોએ એક પરિવાર પર હથિયારો વડે હુમલો કર્યો.
હુમલાનું મુખ્ય કારણ: ફરિયાદીના માતાએ સિક્કા નગરપાલિકાની ચૂંટણીમાં ઉમેદવારી નોંધાવતા, તે બાબતની જૂની અદાવત રાખીને આરોપીઓએ આયોજનબદ્ધ રીતે હુમલો કર્યો હતો.
હથિયારો અને ઇજાઓ: આરોપીઓ લાકડાના ધોકા, લોખંડના પાઇપ અને છરી સાથે આવ્યા હતા; જેનાથી ફરિયાદીને માથામાં, તેના ભાઈને ગાલ પર (છરીથી) અને અન્ય એક વ્યક્તિના હાથમાં ફ્રેક્ચર જેવી ગંભીર ઇજાઓ પહોંચી હતી.
તોડફોડ અને ધમકી: હુમલાખોરોએ બેફામ ગાળો આપી, જાનથી મારી નાખવાની ધમકી આપી અને ફરિયાદીની બલેનો કારના કાચ તોડીને મોટું નુકસાન કર્યું હતું.
પોલીસ કાર્યવાહી: સિક્કા પોલીસે તમામ ૫ આરોપીઓ (ભરત, કરણ, મુકેશ, અર્જુન અને ભરત ઉર્ફે ટકો) વિરુદ્ધ BNS અને હથિયારબંધીના ભંગ (જી.પી. એક્ટ) હેઠળ ગંભીર કલમો લગાવી ગુનો નોંધ્યો છે.
જામનગર અપડેટ્સ: જામનગર જિલ્લાના સિક્કા વિસ્તારમાં નગરપાલિકાની ચૂંટણીમાં ઉમેદવારી પત્રક ભરવા જેવી બાબતે જૂની અદાવત રાખીને એક પરિવાર પર ૫ શખ્સોએ જીવલેણ હુમલો કર્યાની ઘટના પ્રકાશમાં આવી છે. હુમલાખોરોએ લાકડાના ધોકા, લોખંડનો પાઇપ અને છરી જેવા ઘાતક હથિયારો વડે હુમલો કરીને ગંભીર ઇજાઓ પહોંચાડી હતી અને કારમાં તોડફોડ કરી જાનથી મારી નાખવાની ધમકી આપી હતી. આ સમગ્ર મામલે સિક્કા પોલીસ સ્ટેશનમાં પાંચેય આરોપીઓ વિરુદ્ધ ભારતીય ન્યાય સંહિતા (BNS) ની વિવિધ કલમો હેઠળ ગુનો નોંધવામાં આવ્યો છે.
પ્રાપ્ત વિગતો અનુસાર, સિક્કાની રાધાસ્વામી સોસાયટી, ગાયત્રી મંદિર પાસે રહેતા અને અભ્યાસ કરતા ૨૦ વર્ષીય તુષારભાઈ હસમુખભાઈ પરમારના માતા બીનાબેને સિક્કા નગરપાલિકાની ચૂંટણીમાં ઉમેદવારી પત્રક ભર્યું હતું. આ બાબત મુંગણી ગામના આરોપી મુકેશ મંગાભાઈ પરમારને પસંદ ન હોવાથી, તેણે અગાઉ ફરિયાદીના પિતા સાથે બોલાચાલી અને ઝઘડો કર્યો હતો. આ બાબતની અદાવત રાખીને તા. ૧૫/૧૦/૨૦૨૬ ના રોજ સવારે ૦૭:૦૫ કલાકે ૫ આરોપીઓ ગેરકાયદેસર મંડળી રચીને નંબર પ્લેટ વગરની સફેદ કલરની ગ્લાઝા કારમાં ધસી આવ્યા હતા.
આરોપીઓ ભરત મેહુલભાઈ પરમાર, કરણ તુલશીભાઈ પરમાર, મુકેશ મંગાભાઈ પરમાર, અર્જુનભાઈ તુલશીભાઈ પરમાર અને ભરત ઉર્ફે ટકો પરમાર (તમામ રહે. મુંગણી ગામ, જામનગર) હથિયારો સાથે આવ્યા હતા. જેમાં આરોપી કરણ પરમારે ફરિયાદી તુષારભાઈને માથા અને ગરદનના ભાગે લાકડાના ધોકાથી માર માર્યો હતો. જ્યારે આરોપી ભરત પરમારે લોખંડના પાઇપ વડે સાહેદને ડાબા હાથની કલાઈ પર ગંભીર માર મારીને ફ્રેક્ચર કર્યું હતું. વધુમાં, આરોપી મુકેશ પરમારે ફરિયાદીના ભાઈ પર છરી વડે હુમલો કરતા તેને જમણા ગાલ પર ઇજા પહોંચી હતી, જેમાં બે ટાંકા લેવા પડ્યા હતા.
આરોપીઓએ ગાળો ભાંડી, જાનથી મારી નાખવાની ધમકીઓ આપી હતી અને ફરિયાદીની બલેનો કારના પાછળના કાચ લાકડાના ધોકા વડે તોડી નાખીને નુકસાન પહોંચાડ્યું હતું. હુમલો કર્યા બાદ તમામ આરોપીઓ હથિયારબંધીના જાહેરનામાનો ભંગ કરીને નાસી છૂટ્યા હતા. આ મામલે એ.એસ.આઈ. કે.બી. લોખીલ અને સી.ટી. પરમાર દ્વારા ભારતીય ન્યાય સંહિતા (BNS) ની કલમ- ૧૧૭(૨), ૧૧૮(૧), ૧૧૫(૨), ૩૨૪(૪), ૩૫૨, ૩૫૧(૨), ૧૮૯(૨), ૧૮૯(૪), ૧૯૦, ૧૯૧(૩) તથા જી.પી. એક્ટ કલમ ૧૩૫(૧) મુજબ ગુનો નોંધીને આગળની કાયદેસરની કાર્યવાહી હાથ ધરવામાં આવી છે.
