જામનગર અપડેટ્સ : જામનગર તાલુકાના ચેલા ગામ નજીક ગાય અચાનક આડી ઉતરી આવતા મોટરસાયકલ સાથે અથડાતા ગંભીર અકસ્માત સર્જાયો હતો. અકસ્માતમાં મોટરસાયકલ પર સવાર ૨૧ વર્ષીય યુવકને માથાના ભાગે ગંભીર ઈજા થતાં જી.જી. હોસ્પિટલમાં સારવાર માટે ખસેડાયો હતો, જ્યાં સારવાર દરમિયાન તેનું મોત નિપજ્યું હતું. અકસ્માતમાં તેના સાથે સવાર અન્ય બે યુવકોને પણ ઈજાઓ પહોંચી હતી.
પ્રાપ્ત વિગતો મુજબ, તા.૧૧ ઓગસ્ટ ૨૦૨૬ના રોજ સવારે આશરે ૧૧:૪૫ વાગ્યાના અરસામાં અમિત હમીરભાઈ સોલંકી, ઉંમર ૨૧ વર્ષ, તથા તેના મિત્રો રાહુલ, ઉંમર ૨૦ વર્ષ અને વિજય, ઉંમર ૧૯ વર્ષ, મોટરસાયકલ નં. GJ-10-DS-7210 પર સવાર થઈને ચેલા તરફ જઈ રહ્યા હતા. રાહુલને ચેલા વિઝન ખાતે મૂકવા માટે ત્રણેય મિત્રો નીકળ્યા હતા.
દરમિયાન ચેલા ગામથી એસ.આર.પી. કેમ્પથી થોડે આગળ રોડ પર અચાનક એક ગાય આડી ઉતરી આવી હતી. ગાય અચાનક રસ્તા પર આવી જતા મોટરસાયકલ ગાય સાથે અથડાઈ હતી. અકસ્માતના પગલે ત્રણેય સવારો મોટરસાયકલ સહિત રોડની વચ્ચે આવેલા ફૂટપાથ સાથે અથડાયા હતા.
અકસ્મતમાં અમિત સોલંકીને માથાના ભાગે ગંભીર ઈજા પહોંચી હતી, જ્યારે તેના મિત્રો રાહુલ અને વિજયને પણ શરીરના વિવિધ ભાગે ઈજાઓ થઈ હતી. ત્રણેયને તાત્કાલિક સારવાર માટે જામનગરની જી.જી. હોસ્પિટલમાં ખસેડવામાં આવ્યા હતા.
જોકે, અમિત સોલંકીની હોસ્પિટલમાં સારવાર ચાલી રહી હતી તે દરમિયાન તેનું મોત નિપજ્યું હતું. અમિત સોલંકી મૂળ જામનગર જિલ્લાના જોડિયા તાલુકાના બેરાજા (ફલ્લા) ગામનો રહેવાસી હતો અને હાલ દરેડ ગામની મુરલીધર-૫ સ્વાસ્તિક સોસાયટીમાં પરિવાર સાથે રહેતો હતો. તે અભ્યાસ કરતો હોવાનું પોલીસ નોંધમાં જણાવાયું છે.
આ બનાવ અંગે પંચ બી ડિવિઝન પોલીસ સ્ટેશનમાં ભારતીય નાગરિક સુરક્ષા સંહિતા (BNSS)ની કલમ ૧૯૪ મુજબ UD નં. ૧૪/૨૦૨૬ નોંધવામાં આવ્યો છે. પોલીસે અકસ્માતની સમગ્ર ઘટના અંગે તપાસ હાથ ધરી છે.
અકાળે થયેલા આ અકસ્માતમાં ૨૧ વર્ષીય યુવકનું મોત થતાં પરિવારજનોમાં શોકની લાગણી ફેલાઈ છે. પોલીસ દ્વારા અકસ્માતના સંજોગો અંગે વધુ તપાસ હાથ ધરવામાં આવી રહી છે.
