પ્રાઈમ ઇન્ફૉ :
જામનગરમાં ભેળસેળિયા દૂધ પર મનપાની સર્જિકલ સ્ટ્રાઈક!
વહેલી સવારે 5:30 વાગ્યે ફૂડ શાખાનું આકસ્મિક ચેકિંગ: 45-દિગ્વિજય પ્લોટ વિસ્તારમાં કાર્યવાહી
ટેમ્પો-રિક્ષા મારફતે ડેરીઓમાં સપ્લાય થતા દૂધના વિક્રેતાઓ ઝપટે ચડ્યા
2 ઈન્ફોર્સમેન્ટ અને 8 સર્વેલન્સ સેમ્પલ લેવાયા, ફૂડ સેફ્ટી ઓન વ્હીલ્સ વાનથી સ્થળ પર જ 51 નમૂનાની ચકાસણી
શંકાસ્પદ જણાયેલું 80 લીટર દૂધ તાત્કાલિક સ્થળ પર જ નાશ કરાયું
નાગરિકોના સ્વાસ્થ્ય સાથે ચેડા નહીં ચલાવાય – મનપા ફૂડ શાખા સતર્ક
જામનગર અપડેટ્સ: શહેરમાં નાગરિકોના સ્વાસ્થ્ય સાથે ચેડા કરતા ભેળસેળિયા દૂધના વેપલા સામે જામનગર મહાનગરપાલિકાની ફૂડ શાખાએ લાલ આંખ કરી છે. મળતી માહિતી મુજબ, તારીખ 09-10-2026 ના રોજ વહેલી સવારે 5:30 કલાકે ફૂડ શાખાની ટીમ દ્વારા 45-દિગ્વિજય પ્લોટ અને આસપાસના વિસ્તારોમાં આકસ્મિક ચેકિંગ હાથ ધરવામાં આવ્યું હતું.
આ કાર્યવાહી દરમિયાન ટેમ્પો અને રિક્ષા મારફતે શહેરની વિવિધ ડેરીઓમાં દૂધ સપ્લાય કરતા વિક્રેતાઓને ત્યાં તપાસ કરવામાં આવી હતી. ખાસ કરીને સવારના સમયે આવતું ખુલ્લું દૂધ શંકાસ્પદ જણાતા ફૂડ વિભાગે તાત્કાલિક કાર્યવાહી કરી હતી.
ફૂડ શાખા દ્વારા આ ઝુંબેશ દરમિયાન 2 ઇન્ફોર્સમેન્ટ અને 8 સર્વેલન્સ મળી કુલ 10 સેમ્પલ લેવામાં આવ્યા હતા, જેને વધુ તપાસ માટે લેબોરેટરીમાં મોકલવામાં આવ્યા છે. આ ઉપરાંત ‘ફૂડ સેફ્ટી ઓન વ્હીલ્સ’ વાન દ્વારા સ્થળ પર જ 51 નમૂનાઓની પ્રાથમિક ચકાસણી કરવામાં આવી હતી.
ચકાસણી દરમિયાન શંકાસ્પદ અને હલકી ગુણવત્તાનું જણાયેલું 80 લીટર દૂધ તાત્કાલિક સ્થળ પર જ નાશ કરવામાં આવ્યું હતું. મહાનગરપાલિકાએ જણાવ્યું હતું કે નગરજનોના સ્વાસ્થ્યની રક્ષા કાજે ફૂડ શાખા સદા સજાગ છે અને આ પ્રકારની કાર્યવાહી આગામી દિવસોમાં પણ યથાવત રહેશે.
આ કાર્યવાહીને પગલે ખુલ્લા દૂધનો વેપાર કરતા વેપારીઓમાં ફફડાટ ફેલાયો છે.
