જામનગર અપડેટ્સ: જામનગરના સૌથી ચર્ચિત ગુજસીટોક (GUJCTOC) કેસમાં મોટો વળાંક આવ્યો છે. ગુજરાત હાઈકોર્ટે જામનગર મહાનગરપાલિકાના કોર્પોરેટર અલ્તાફ ખફી સહિત કુલ 4 આરોપીઓના શરતી જામીન મંજૂર કર્યા છે. આ નિર્ણયથી આરોપી પક્ષને મોટી રાહત મળી છે અને શહેરના રાજકીય વર્તુળોમાં ભારે ચર્ચા જાગી છે.
જામનગર પોલીસ દ્વારા થોડા મહિના પહેલા સંગઠિત ગુનાખોરીને ડામવા માટેના સૌથી કડક કાયદા – ગુજરાત કંટ્રોલ ઓફ ટેરેરિઝમ એન્ડ ઓર્ગેનાઇઝ્ડ ક્રાઇમ એક્ટ (GUJCTOC) હેઠળ આ ગુનો નોંધવામાં આવ્યો હતો.
આ કેસમાં હાલ ચાર વ્યક્તિઓને જામીન
- અલ્તાફ ખફી (કોર્પોરેટર)
- ઓસમાણ ખફી
- સુફિયાન પટણી
- શાહિદ ઈમ્તિયાઝ ખફી
આરોપીઓ દ્વારા સૌપ્રથમ જામનગર સેશન્સ કોર્ટમાં જામીન અરજી કરવામાં આવી હતી, પરંતુ ગુજસીટોક જેવી ગંભીર કલમ હોવાને કારણે નીચલી અદાલતે જામીન ફગાવી દીધા હતા. ત્યારબાદ આરોપીઓએ ગુજરાત હાઈકોર્ટમાં જામીન અરજી દાખલ કરી હતી.
ગઈકાલે હાઈકોર્ટમાં સુનાવણી દરમિયાન બચાવ પક્ષના વકીલોએ દલીલ કરી હતી કે, આરોપીઓનો કોઈ સંગઠિત ગુનાહિત ઈતિહાસ નથી, તેઓ સ્થાનિક છે અને તપાસમાં સંપૂર્ણ સહકાર આપવા તૈયાર છે. લાંબી દલીલો સાંભળ્યા બાદ નામદાર હાઈકોર્ટે ચારેય આરોપીઓને શરતી જામીન પર છોડવાનો હુકમ કર્યો છે.
પ્રાથમિક માહિતી મુજબ, કોર્ટે જામીન આપતી વખતે પાસપોર્ટ જમા કરાવવો, દર અઠવાડિયે પોલીસ સ્ટેશનમાં હાજરી આપવી અને સાક્ષીઓને પ્રભાવિત ન કરવા જેવી કડક શરતો મૂકી છે.
ઉલ્લેખનીય છે કે ગુજસીટોક એક્ટ હેઠળ જામીન મળવા અત્યંત મુશ્કેલ હોય છે. ત્યારે હાઈકોર્ટના આ નિર્ણયને કાયદા નિષ્ણાતો મહત્વનો ગણી રહ્યા છે. હવે આગામી દિવસોમાં આ કેસની ટ્રાયલ જામનગરની સ્પેશિયલ ગુજસીટોક કોર્ટમાં ચાલશે. પોલીસ તપાસ યથાવત રહેશે.
