જામનગર અપડેટ્સ: જામનગર જિલ્લા સહિત રેન્જમાં આવતા તમામ જિલ્લાઓના તમામ પોલીસ સ્ટેશનના ડી-સ્ટાફની વિગતો રેન્જ આઇજી ઓફિસ દ્વારા માંગવામાં આવતા ડી સ્ટાફમાં ફરજ બજાવતા અમુક ડી સ્ટાફ પોલીસકર્મીઓમાં ફફડાટ ફેલાયો છે. રાજકોટ વિભાગના નાયબ પોલીસ મહાનિરીક્ષકની કચેરી તરફથી આ અંગે જામનગર સહિત સંબંધિત જિલ્લાઓના પોલીસ અધિકારીઓને પત્ર પાઠવવામાં આવ્યો છે.
પત્રમાં પોલીસ સ્ટેશન ખાતે ડી-સ્ટાફ તરીકે ફરજ બજાવતા દરેક પોલીસ અધિકારી/કર્મચારીની માહિતી નિર્ધારિત કોષ્ટકમાં ભરી મોકલવા જણાવાયું છે. તેમાં પોલીસ અધિકારી અથવા કર્મચારીનું નામ, વર્તમાન હોદ્દો તથા ડી-સ્ટાફ તરીકેની ફરજમાં નિમણૂક થયાનો સમયગાળો જેવી વિગતોનો સમાવેશ થાય છે.
આ ઉપરાંત સંબંધિત પોલીસ અધિકારી કે કર્મચારીના કોઈ સગા સંબંધીઓ ગુનેગાર, બુટલેગર અથવા હિસ્ટ્રીશીટર છે કે કેમ ? તે અંગે પણ સ્પષ્ટ માહિતી માગવામાં આવી છે. જો આવા કોઈ સગા સંબંધીઓ હોય તો તેમના નામ અને સંબંધિત પોલીસ કર્મચારી/અધિકારી સાથેનો સંબંધ પણ દર્શાવવાનો રહેશે.
ઉલ્લેખનીય છે જામનગર શહેરના ત્રણ ડિવિઝનમાં ફરજ બજાવતા ડી સ્ટાફના પોલીસ કર્મચારીઓ સામે ગુપ્ત રીતે આઈજી સુધી ફરિયાદો પહોંચી હોવાની વિગતો સૂત્રો માંથી જાણવા મળી છે ઉપરાંત અમુક કર્મચારીઓ મલાઈ તારવી અધિકારીઓબી ગુડ બુકમાં હોવાના આક્ષેપો પણ થઈ રહ્યા છે, જ્યારે અમુક ડી સ્ટાફ કર્મીઓના સગા સબંધીઓ પોલીસ દફતરે નોંધાઈ ચુકયા હોવાની પણ વિગતો છેક ઉપર સુધી પહોંચી હોવાની વિગતો જાણવા મળી છે.
ડી-સ્ટાફ પોલીસ સ્ટેશનની ગુનાખોરી સંબંધિત કામગીરીમાં મહત્વની ભૂમિકા ભજવે છે. આવા સંજોગોમાં રાજકોટ રેન્જ કચેરી દ્વારા એકસાથે તમામ પોલીસ સ્ટેશનના ડી-સ્ટાફની નામવાર વિગતો, વર્તમાન હોદ્દો અને કેટલા સમયથી ડી-સ્ટાફ તરીકે ફરજ બજાવે છે તેની માહિતી મંગાવવામાં આવતા પોલીસ વિભાગમાં આ બાબત ચર્ચાનો વિષય બની છે.
રાજકોટ રેન્જમાં રાજકોટ ગ્રામ્ય, સુરેન્દ્રનગર, જામનગર અને દેવભૂમિ દ્વારકા જિલ્લાનો સમાવેશ થાય છે, ડી-સ્ટાફ પોલીસ સ્ટેશનની ગુનાખોરી સંબંધિત કામગીરીમાં મહત્વની ભૂમિકા ભજવે છે. આવા સંજોગોમાં રાજકોટ રેન્જ કચેરી દ્વારા એકસાથે તમામ તમામ જિલ્લાઓના પોલીસ સ્ટેશનના ડી-સ્ટાફની નામવાર વિગતો, વર્તમાન હોદ્દો અને કેટલા સમયથી ડી-સ્ટાફ તરીકે ફરજ બજાવે છે તેની માહિતી મંગાવવામાં આવતા પોલીસ વિભાગમાં આ બાબત ચર્ચાનો વિષય બની છે.
રાજકોટ રેન્જની કચેરી દ્વારા મોકલાયેલા પત્રમાં જણાવ્યા મુજબ, જિલ્લાના તમામ પોલીસ સ્ટેશન ખાતે ડી-સ્ટાફ તરીકે ફરજ બજાવતા અધિકારી-કર્મચારીઓની માહિતી તૈયાર કરી હાર્ડ કોપી તેમજ સોફ્ટ કોપીમાં મોકલવાની સૂચના આપવામાં આવી છે.
