ન્યૂઝ ઇન્ફો
• લાલપુર તાલુકાના જોગવડના રામદૂતનગર વિસ્તારમાં પોલીસનો દરોડો
• 23.85 ગ્રામ ઓપીએટ, કિંમત ₹4.77 લાખ જપ્ત
• ડ્રગ્સ કેસમાં 3 શખ્સોની ધરપકડ
• મોબાઇલ, રોકડ અને વજનકાંટા સહિત ₹4.94 લાખનો મુદ્દામાલ કબજે
• ડ્રગ્સ સપ્લાય કરનાર એક શખ્સ ફરાર; પોલીસની તપાસ ચાલુ
જામનગર અપડેટ્સ : જામનગર જિલ્લાના લાલપુર તાલુકાના જોગવડ ગામની સીમમાં મેઘપર (પડાણા) પોલીસે કેફી માદક પદાર્થના જથ્થા અંગે મળેલી બાતમીના આધારે દરોડો પાડી ત્રણ શખ્સોને ઝડપી લીધા છે. પોલીસની કાર્યવાહી દરમિયાન ભાડાની ઓરડીમાંથી 23.85 ગ્રામ ઓપીએટ (હેરોઈન, મોર્ફીન, કોડીન) મળી આવ્યું હતું.
પોલીસના જણાવ્યા મુજબ, તા. 10 સપ્ટેમ્બર 2026ના રોજ બપોરે 2:17 વાગ્યે જોગવડ ગામની સીમમાં રામદુતનગર વિસ્તારમાં, રિલાયન્સ ટાઉનશીપની દિવાલ પાસે આવેલા જયેશભાઈ ઉનડકટના ઓરડાઓ પૈકી ઓરડી નંબર 11માં કાર્યવાહી કરવામાં આવી હતી.
દરોડા દરમિયાન પોલીસે **જશવંતસિંઘ રતનસિંઘ (ઉં.45), થોમસ રણજીત મસીહ (ઉં.30) અને જગમીતસિંઘ સરબજીતસિંઘ (ઉં.32)**ને ઝડપી લીધા હતા. ત્રણેય હાલ જોગવડ સીમ વિસ્તારમાં ભાડેથી રહેતા હોવાનું પોલીસ ફરિયાદમાં નોંધાયું છે અને તેઓ મૂળ પંજાબના જુદા-જુદા જિલ્લાઓના રહેવાસી હોવાનું જણાવાયું છે.
₹4.77 લાખની કિંમતનો ઓપીએટનો જથ્થો
પોલીસે આરોપીઓ પાસેથી કુલ 23.85 ગ્રામ ઓપીએટનો જથ્થો, જેની અંદાજિત કિંમત ₹4,77,000 હોવાનું નોંધાયું છે, કબજે કર્યો હતો. આ ઉપરાંત બે મોબાઈલ ફોન ₹10,000, એક વજનકાંટો ₹500 અને રોકડા ₹6,940 મળી કુલ ₹4,94,440નો મુદ્દામાલ કબજે કરવામાં આવ્યો છે.
પોલીસ ફરિયાદ મુજબ આરોપીઓએ કોઈપણ કાયદેસર પાસ-પરમિટ વિના કેફી માદક પદાર્થનો જથ્થો મેળવી વેચાણના હેતુથી ભાડાની ઓરડીમાં રાખ્યો હતો. આ સમગ્ર પ્રવૃત્તિમાં આરોપીઓએ એકબીજાને મદદગારી કરી હોવાનો આક્ષેપ ફરિયાદમાં કરવામાં આવ્યો છે.
પંજાબનો શખ્સ ફરાર
આ કેસમાં જગરૂપસિંઘ, રહે. સકતરા ગામ, તા. પટ્ટી, જી. તરણતારણ, પંજાબને ફરાર આરોપી તરીકે દર્શાવવામાં આવ્યો છે. પોલીસે તેની શોધખોળ શરૂ કરી છે. સાથે જ આ નેટવર્કમાં અન્ય કોઈ વ્યક્તિની સંડોવણી છે કે કેમ તે દિશામાં પણ તપાસ હાથ ધરવામાં આવી રહી છે.
આ મામલે મેઘપર (પડાણા) પોલીસ સ્ટેશનમાં N.D.P.S. એક્ટની કલમ 8(C), 21(B) અને 29 મુજબ ગુનો નોંધવામાં આવ્યો છે. સમગ્ર કાર્યવાહી અને આગળની તપાસ પોલીસ દ્વારા હાથ ધરવામાં આવી રહી છે.
