જામનગર અપડેટ્સ: જામનગર શહેરના મોરકંડા રોડ પર આવેલા રબાની પાર્ક વિસ્તારમાં પતિએ ચારિત્ર્ય અંગે શંકા-વહેમ રાખીને પત્ની પર તલવાર વડે જીવલેણ હુમલો કર્યાની ઘટના સામે આવી છે. હુમલામાં મહિલાને માથા, ગળા, બંને હાથ અને ડાબા કાન સહિતના ભાગોમાં ગંભીર ઇજાઓ પહોંચી હોવાનું પોલીસ ફરિયાદમાં જણાવાયું છે. આ બનાવ અંગે સીટી ‘એ’ ડિવિઝન પોલીસ સ્ટેશનમાં હત્યાના પ્રયાસ સહિતની કલમો હેઠળ ગુનો નોંધવામાં આવ્યો છે.
પોલીસ ફરિયાદ મુજબ, ફરિયાદી નશીમબેન વગીંડાની 32 વર્ષીય પુત્રી રેશમાબેનના લગ્ન હબીબ હસનભાઈ મજબુલ સાથે થયા છે. પતિ હબીબ પત્નીના ચારિત્ર્ય અંગે વારંવાર શંકા-વહેમ કરતો હોવાના કારણે રેશમાબેન રીસાઈને પોતાના ઘરે જતી રહી હતી. જોકે, ચાર દિવસ પહેલાં પરિવારજનો દ્વારા સમાધાન કરાવવામાં આવતા રેશમાબેન ફરી પોતાના પતિ સાથે રહેવા માટે પરત આવી હતી.
ફરિયાદમાં જણાવ્યા પ્રમાણે, 19 ઓગસ્ટના રોજ રબાની પાર્ક શેરી નંબર-1, મોરકંડા રોડ ખાતે આવેલા આરોપીના ભાડાના મકાનમાં ફરી એક વખત પત્નીના ચારિત્ર્ય અંગે શંકા-વહેમને લઈને બંને વચ્ચે બોલાચાલી થઈ હતી. આ દરમિયાન હબીબ એકદમ ઉશ્કેરાઈ ગયો હોવાનો આક્ષેપ છે.
આરોપીએ તલવાર વડે પત્ની રેશમાબેન પર હુમલો કરી માથા, ગળા, બંને હાથ અને ડાબા કાન પર આડેધડ ઘા માર્યા હોવાનું ફરિયાદમાં જણાવાયું છે. હુમલો એટલો ગંભીર હતો કે મહિલાના મોઢાની અંદરના બે દાંત પણ પડી ગયા હતા. પોલીસ ફરિયાદ મુજબ, આરોપીએ પત્નીની હત્યા કરવાના પ્રયાસ સાથે તેને ગંભીર ઇજાઓ પહોંચાડી હતી.
બનાવ બાદ આરોપી સ્થળ પરથી નાસી ગયો હોવાનું પોલીસ ફરિયાદમાં નોંધાયું છે. ઘટનાની જાણ થતાં પોલીસ દ્વારા કાર્યવાહી હાથ ધરવામાં આવી હતી.
સીટી ‘એ’ ડિવિઝન પોલીસ સ્ટેશનમાં હબીબ હસનભાઈ મજબુલ સામે ભારતીય ન્યાય સંહિતા-2023ની કલમ 109(1), 118(1), 118(2) તથા જી.પી. એક્ટની કલમ 135(1) હેઠળ ગુનો નોંધવામાં આવ્યો છે. પોલીસે સમગ્ર બનાવ અંગે વધુ તપાસ હાથ ધરી છે અને આરોપીને ઝડપી પાડવા સહિતની કાર્યવાહી શરૂ કરી છે.
