જામનગર અને દેવભૂમિ દ્વારકા જિલ્લામાં શુક્રવારે પોલીસ દફતરે નોંધાયેલ જુદા જુદા બનાવોને સમાચાર રૂપે અહીં પ્રસ્તુત કર્યા છે
દ્વારકા : આરંભડા ગામમાં યુવાને ગળાફાંસો ખાઈ ટૂંકાવ્યું આયુષ્ય
દુઃખદ ઘટના: દેવભૂમિ દ્વારકા જિલ્લાના મીઠાપુર પોલીસ સ્ટેશન હેઠળ આવતા આરંભડા ગામના કૃષ્ણનગરમાં 40 વર્ષીય અભુભા અરજણભા માણેક નામના યુવાને ગળાફાંસો ખાઈ આપઘાત કરી લીધો છે. આપઘાતનું કારણ: પ્રાથમિક વિગત મુજબ મરણજનારના એકાદ વર્ષ પહેલાં છૂટાછેડા થઈ ગયા હતા અને નવી સગાઈ ન થતાં એકલવાયું જીવન જીવી રહ્યા હતા, જેનું મનમાં લાગી આવતા આ અંતિમ પગલું ભર્યું હોવાનું સામે આવ્યું છે. સારવાર દરમિયાન મોત: યુવાને ગત તારીખ 2 જુલાઈના રોજ ગળાફાંસો ખાધો હતો, જે બાદ ગંભીર હાલતમાં સારવાર દરમિયાન તારીખ 6 જુલાઈના રોજ તેમનું કરુણ મોત નીપજ્યું હતું. પોલીસ ફરિયાદ: આ સમગ્ર મામલે મરણજનારના ભાઈ કરશનભા અરજણભા માણેક દ્વારા તારીખ 10 જુલાઈના રોજ મીઠાપુર પોલીસ મથકે બનાવની જાણ કરવામાં આવી છે.
કાનૂની તપાસ શરૂ: મીઠાપુર પોલીસે ભારતીય નાગરિક સુરક્ષા સંહિતા (BNSS)-2023ની કલમ 194 હેઠળ અકસ્માત મોતનો ગુનો નોંધી, હેડ કોન્સ્ટેબલ લખમણભાઇ દેવાભાઇ લગારીયાએ આગળની કાયદેસરની તપાસ હાથ ધરી છે.
1) જામનગરમાં દેશી દારૂની ભઠ્ઠી પર દરોડો, મહિલા બુટલેગર સામે ગુનો
જામનગર શહેરના જાગૃતિનગર વિસ્તારમાં સીટી સી ડિવિઝન પોલીસની સર્વેલન્સ સ્ક્વોડે દરોડો પાડી એક મહિલા બુટલેગર વિરુદ્ધ પ્રોહિબિશન એક્ટ હેઠળ ગુનો નોંધ્યો છે. પોલીસે સ્થળ પરથી અંદાજે ૧૫ લિટર દેશી દારૂ, ૯૦ લિટર આથો તેમજ દારૂ બનાવવાના સાધનો મળી કુલ રૂ. ૫,૪૦૦નો મુદ્દામાલ કબજે કર્યો હતો. આરોપી મહિલા ફરાર હોવાનું નોંધાયું છે અને તેની શોધખોળ હાથ ધરવામાં આવી છે.
2) વિકાસ ગુહ રોડ પરથી રૂ. 21 હજારનો વિદેશી દારૂ ઝડપાયો
સીટી બી ડિવિઝન પોલીસે વિકાસ ગુહ રોડ વિસ્તારમાં જાહેર સ્થળેથી એક યુવકને ભારતીય બનાવટના વિદેશી દારૂના ૭૦ ક્વાર્ટર સાથે ઝડપી પાડ્યો છે. પોલીસે આશરે રૂ. ૨૧ હજારનો દારૂ કબજે કરી પ્રોહિબિશન એક્ટ હેઠળ ગુનો નોંધી વધુ તપાસ શરૂ કરી છે.
3) નાગના રોડ સ્મશાન પાછળથી દારૂના જથ્થા સાથે યુવક ઝડપાયો
જામનગરના નાગના રોડ સ્મશાન પાછળ પોલીસે દરોડો પાડી ગૌતમ ઉર્ફે ગટ્ટી રમેશભાઈ પરમારને વિદેશી દારૂના જથ્થા સાથે ઝડપી પાડ્યો છે. પોલીસે રૂ. ૧૫,૬૦૦નો મુદ્દામાલ કબજે કરી પ્રોહિબિશન એક્ટ હેઠળ કાર્યવાહી હાથ ધરી છે.
4) જામજોધપુરના ગીંગણી ગામે વર્લી મટકાનો જુગાર રમાડતો શખ્સ ઝડપાયો
જામજોધપુર પોલીસ દ્વારા ગીંગણી ગામે સ્કૂલ નજીક દરોડો પાડી જાહેરમાં વર્લી મટકાનો જુગાર રમાડતા એક શખ્સને ઝડપી પાડવામાં આવ્યો છે. પોલીસે રોકડ રકમ, આંકડાવાળી ચિઠ્ઠી અને અન્ય સામગ્રી કબજે કરી જુગારધારા હેઠળ ગુનો નોંધ્યો છે.
5) લાલપુર નજીક તીનપત્તીનો જુગાર રમતા ત્રણ શખ્સ ઝડપાયા
લાલપુર પોલીસ દ્વારા રીઝપર ગામ નજીક નવાપરા સીમ વિસ્તારમાં દરોડો પાડી તીનપત્તીનો જુગાર રમતા ત્રણ શખ્સોને ઝડપી પાડવામાં આવ્યા છે. પોલીસે રૂ. ૧૦,૧૮૦ રોકડ અને ગંજીપત્તાના પાના કબજે કરી જુગારધારા હેઠળ ગુનો નોંધ્યો છે.
6) રિક્ષા ભટકાવવાની બાબતે બોલાચાલી બાદ મારામારી, ચાર સામે ગુનો
જામનગરના ટીટોડીવાડી વિસ્તારમાં રિક્ષા અને મોટરસાયકલ ભટકાવવાની બાબતે થયેલી બોલાચાલી બાદ મારામારીનો બનાવ બન્યો હતો. ફરિયાદના આધારે ચાર વ્યક્તિઓ સામે ભારતીય ન્યાય સંહિતાની વિવિધ કલમો તેમજ જીપી એક્ટ હેઠળ ગુનો નોંધાયો છે. પોલીસે વધુ તપાસ હાથ ધરી છે.
7) કાલાવડ નાકા બહાર વિદેશી દારૂ સાથે મજૂર ઝડપાયો
સીટી એ ડિવિઝન પોલીસે કાલાવડ નાકા બહાર સતવારા સમાજ સામે જાહેર રોડ પરથી એક વ્યક્તિને ચાર બોટલ વિદેશી દારૂ સાથે ઝડપી પાડ્યો છે. પોલીસે અંદાજે રૂ. ૨ હજારનો મુદ્દામાલ કબજે કરી પ્રોહિબિશન એક્ટ હેઠળ ગુનો નોંધ્યો છે.
8) ધ્રાફા ગામે 17 વર્ષીય કિશોરનું ગળેફાંસો ખાઈ મોત
જામજોધપુર તાલુકાના ધ્રાફા ગામે ૧૭ વર્ષીય કિશોરે પોતાના ઘરે ગળેફાંસો ખાઈ જીવન ટૂંકાવ્યાનો બનાવ સામે આવ્યો છે. શેઠવડાળા પોલીસે અકાળ મોતની નોંધ કરી ઘટનાનું કારણ જાણવા તપાસ શરૂ કરી છે. પ્રાથમિક માહિતી મુજબ મોત પાછળનું કારણ હજુ સુધી સ્પષ્ટ થયું નથી.
