જામનગર અપડેટ્સ: દેવભૂમિ દ્વારકા જિલ્લાના યાત્રાધામ દ્વારકાથી ઓખા જતા હાઇવે રોડ પર એક ગંભીર અકસ્માતની ઘટના સામે આવી છે. વરવાળા ગામ પાસે હાઇવે પર કોઈ પણ જાતની લાઈટ કે રેડિયમ સિગ્નલ વિના અડચણરૂપ રીતે પાર્ક કરેલા ટ્રક પાછળ બુલેટ અથડાતાં બે યુવાનોને ગંભીર ઈજાઓ પહોંચી છે. આ મામલે દ્વારકા પોલીસ મથકમાં ટ્રક ચાલક વિરુદ્ધ ગુનો દાખલ કરવામાં આવ્યો છે.
હાઇવે પર યમદૂત બનીને ઉભેલા ટ્રક સાથે બુલેટ અથડાયું
મળતી માહિતી મુજબ, દ્વારકા તાલુકાના વરવાળા ગામે દૂધલી તળાવ પાસે રહેતા ૧૮ વર્ષીય રેહાન જુમાભાઈ ઢોકી અને તેમના મિત્ર (સાહેદ) પોતાની બુલેટ મોટરસાયકલ (નંબર: GJ-37-AA-8692) લઈને રૂપેણ બંદરથી વરવાળા તરફ જઈ રહ્યા હતા. આ દરમિયાન ગત તારીખ ૦૫ જુલાઈ ૨૦y૨૬ ના રોજ રાત્રિના આશરે આઠેક વાગ્યાના સુમારે, દ્વારકા-ઓખા હાઇવે પર વરવાળા ગામ પાસે આવેલા પાસ્તા પેટ્રોલ પંપ સામે એક ટ્રકે ભારે બેદરકારી દાખવી હતી.
કેમ સર્જાયો અકસ્માત, બંને ઘાયલો હોસ્પીટલમાં
ટ્રક (નંબર: GJ-25-T-6831) ના ચાલકે પોતાનું વાહન હાઇવે રોડ પર અન્ય વાહનોને અડચણરૂપ થાય અને માનવ જિંદગી જોખમાય તે રીતે પાર્ક કરી રાખ્યું હતું. એટલું જ નહીં, રાત્રિના સમયે હાઇવે પર પાર્ક કરેલા આ ટ્રકની પાછળ કોઈ રેડિયમ પટ્ટી કે લાઈટ સિગ્નલ પણ ચાલુ રાખવામાં આવ્યા ન હતા. જેના કારણે અંધારામાં બુલેટ સવાર યુવાનોને ટ્રક ન દેખાતાં, બુલેટ સીધું જ ટ્રકના પાછળના ભાગે ધડાકાભેર અથડાયું હતું. આ ભયાનક અકસ્માતમાં બુલેટ સવાર રેહાન ઢોકી અને તેના મિત્રને શરીરે ગંભીર ફેક્ચર તેમજ માથાના ભાગે હેમરેજ જેવી જીવલેણ ઈજાઓ પહોંચી હતી. હાલ બંને ભોગ બનનાર યુવાનો હોસ્પિટલમાં સારવાર હેઠળ છે.
આ અકસ્માત અંગે ભોગ બનનાર રેહાન જુમાભાઈ ઢોકીએ હોસ્પિટલમાંથી જ દ્વારકા પોલીસ મથકે ફરિયાદ જાહેર કરી હતી. દ્વારકા પોલીસ સ્ટેશનમાં બી.એન.એસ. કલમ ૨૮૫, ૧૨૫(એ), ૧૨૫(બી) તથા એમ.વી. એક્ટ કલમ ૧૭૭ મુજબ ગુનો નોંધાયો છે, દ્વારકા પોલીસ સ્ટેશનના હેડ કોન્સ્ટેબલ ધરણાંતભાઈ કારુભાઈ માડમે ગુનો દાખલ કર્યો છે. અકસ્માત સર્જી વાહન મૂકી નાસી છૂટેલા ટ્રક ચાલકને ઝડપી પાડવા માટે હેડ કોન્સ્ટેબલ દુષ્યંતસિંહ દશરથસિંહ ઝાલાએ આગળની કાયદેસરની તપાસ હાથ ધરી છે.
