જામનગર અપડેટ્સ, જામનગર: જામનગર જિલ્લા ફરિયાદ અને સંકલન સમિતિની બેઠકમાં જામજોધપુર-લાલપુર વિસ્તારના લોકપ્રિય ધારાસભ્ય શ્રી હેમંતભાઈ ખવાએ સ્થાનિક વહીવટી તંત્રની શિથિલતા સામે આકરા પ્રહારો કર્યા હતા. તેમણે તંત્રને આડે હાથ લેતા જણાવ્યું કે, અધિકારીઓ માત્ર સરકારી યોજનાઓના ખાતમુહૂર્ત કરવા અને ફોટા પડાવવામાં મસ્ત છે, જ્યારે વાસ્તવિક સ્થિતિમાં જનતા ભારે હાલાકી ભોગવી રહી છે.” ધારાસભ્યએ છેવાડાના માનવી સુધી યોજનાઓના લાભ પહોંચાડવા માટે વિવિધ સરકારી વિભાગો સમક્ષ ધારદાર રજૂઆતો કરી હતી.
વિકાસ કાર્યો અને આવાસ યોજનામાં વિલંબ અંગે સવાલો
બેઠકમાં ધારાસભ્યએ વર્ષ ૨૦૨૪માં DMF (ડિસ્ટ્રિક્ટ મિનરલ ફાઉન્ડેશન) અંતર્ગત મંજૂર થયેલા કામો બે વર્ષ પછી પણ શરૂ ન થતાં તંત્રની પોલ ખોલી હતી. આ ઉપરાંત, પ્રધાનમંત્રી આવાસ યોજના હેઠળ જામજોધપુર નગરપાલિકામાં ૫૩૦ અરજીઓમાંથી માત્ર ૩૦૮ આવાસ મંજૂર થયા છે. બાકીના આવાસો ખાનગી કન્સલ્ટન્ટ એજન્સીની બેદરકારીને કારણે અટકેલા હોવાથી, હેમંત ખવાની કડક સૂચના બાદ નગરપાલિકા દ્વારા એજન્સીને ‘કારણ દર્શક નોટિસ’ પાઠવવામાં આવી છે. લાલપુરના મુરીલા ગામે નવી મંજૂર થયેલી સોસાયટીમાં પીવાના પાણીની વિકટ સમસ્યા અંગે કલેક્ટરે સ્થળ તપાસના આદેશ આપ્યા છે.
ચોમાસા પૂર્વેની તૈયારીઓ અને ગ્રામીણ પ્રશ્નો
ચોમાસાની પૂર્વતૈયારીઓ અંગે PGVCL વિભાગ પાસે વિગતો માંગતા જણાવાયું હતું કે, બંને તાલુકામાં ૧૧૧ કિલોમીટરના વીજ વાયરો બદલવા, ૩૪૭ નવા પોલ ઊભા કરવા અને ૪૩ ખેતીવાડી ફીડરોમાં મોટા પાયે વૃક્ષોનું ટ્રીમિંગ કરવાનું આયોજન હાથ ધરાયું છે. લાલપુરના વાવડી ગામે ૧૨૫૦ જેટલા પશુધન માટે ગૌચરની અછત હોવાથી સરકારી ખરાબાની જમીનમાંથી ગૌચર નીમ કરવા રજૂઆત કરાઈ હતી. જામજોધપુર-લાલપુર વિસ્તારમાં નવા મંજૂર થયેલા ચેકડેમોના કામો પણ તાત્કાલિક શરૂ કરવા તેમણે તાકીદ કરી હતી.
ધારાસભ્યની સક્રિયતાને કારણે નીચે મુજબના મહત્વના પ્રશ્નોનો નિકાલ આવ્યો છે
ખેડૂતોની રકમ વસૂલાત: જામજોધપુર તાલુકાના ૨૧ ખેડૂતોને કુલ રૂ. ૩૩,૫૦,૫૭૦ ની રકમ રેવન્યુ રાહે વસૂલાત કરી ચૂકવવા કાર્યવાહી ગતિમાં છે.
સાયબર ફ્રોડ: નવી વેરાવળના ખેડૂત અર્જણભાઈ ડાંગરાના ખાતામાંથી છેતરપિંડીથી ઉપડી ગયેલા રૂ. ૬૪,૨૦૦ પરત અપાવવા લીડ બેંક મેનેજરને આદેશ કરાયા છે.
વિધવા સહાય: ટેકનિકલ એરરના કારણે એક વર્ષથી અટકેલી જસાપર ગામના કાંતાબેન વિસાણીની વિધવા સહાયનો પ્રશ્ન ઉકેલાયો છે.
અંતમાં, ધારાસભ્ય હેમંત ખવાએ અધિકારીઓને ટકોર કરી હતી કે ગ્રામ સભાઓ માત્ર ફોટોગ્રાફી પૂરતી સીમિત ન રાખી, ત્યાં રજૂ થતા પ્રશ્નોનું જિલ્લા પંચાયત દ્વારા સાચું ફોલોઅપ લેવામાં આવે. આમ, સંકલન સમિતિના માધ્યમથી તેમણે સ્થાનિક વહીવટી તંત્રને જનતા પ્રત્યે વધુ જવાબદાર બનાવવાનો પ્રશંસનીય પ્રયાસ કર્યો છે.
