જામનગર અપડેટ્સ: જામનગરના પંચકોષી ‘એ’ ડિવિઝન પોલીસ સ્ટેશન વિસ્તારમાં કાયદો અને વ્યવસ્થાને પડકાર ફેંકતી એક ચોંકાવનારી ઘટના સામે આવી છે. પોલીસ જ્યારે પકડેલા વિદેશી દારૂના જથ્થા પર જપ્તીની કાયદેસરની કાર્યવાહી કરી રહી હતી, ત્યારે એક શખ્સે દારૂની બોટલો લૂંટવાનો પ્રયાસ કર્યો હતો અને રોકવા જતાં પોલીસ અધિકારી પર હુમલો કરી દીધો હતો. આ મામલે પોલીસે ગુનો નોંધી આગળની તપાસ હાથ ધરી છે.
શું છે સમગ્ર ઘટના?
મળતી માહિતી મુજબ, પંચકોષી ‘એ’ ડિવિઝન પોલીસની ટીમ દ્વારા વિદેશી (ઇંગ્લિશ) દારૂની બોટલો ભરેલી એક ઇનોવા કાર પકડી પાડવામાં આવી હતી. પોલીસ સ્ટાફ આ ઇનોવા કારમાંથી દારૂનો જથ્થો જપ્ત કરવાની પોતાની કાયદેસરની ફરજ બજાવી રહ્યો હતો. દરમિયાન દેવરાજભાઇ દિનેશભાઇ ગોહીલ (રહે. ખીમરાણા ગામ, તા.જિ. જામનગર) નામના શખ્સે પોલીસની આ કાર્યવાહીમાં હસ્તક્ષેપ કર્યો હતો. આરોપીએ ઇનોવા કારમાંથી ઇંગ્લિશ દારૂની બોટલો લૂંટવાનો પ્રયાસ કર્યો હતો.
પોલીસ અધિકારી નિર્મલસિંહ પર હુમલો
જ્યારે ફરજ પરના અનાર્મ એ.એસ.આઈ. નિર્મળસિંહ ભરતસિંહ જાડેજા (બ.નં-૮૦૬) એ આરોપી દેવરાજને લૂંટ કરતા રોક્યો અને તેને પકડવાનો પ્રયત્ન કર્યો, ત્યારે આરોપીએ ઉશ્કેરાઈ જઈને એ.એસ.આઈ. નિર્મળસિંહને છાતીના ભાગે કોણી મારી દીધી હતી. આ હુમલામાં પોલીસ અધિકારીને મૂંઢ ઇજાઓ પહોંચી હતી. ફરજ પર રહેલા અન્ય પોલીસ કર્મચારીઓએ તાત્કાલિક મામલો થાળે પાડ્યો હતો.આ ચકચારી ઘટના અંગે અનાર્મ એ.એસ.આઈ. નિર્મળસિંહ જાડેજાએ પંચકોષી ‘એ’ ડિવિઝન પોલીસ મથકમાં સત્તાવાર ફરિયાદ નોંધાવી છે. પોલીસે આરોપી દેવરાજભાઇ ગોહીલ વિરૂદ્ધ ભારતીય ન્યાય સંહિતા (BNS) ૨૦૨૩ ની કલમ-૧૨૧(૧) (સરકારી કર્મચારીને ફરજમાં રૂકાવટ અને હુમલો) તથા કલમ-૩૦૯(૫) (લૂંટની કોશિશ) મુજબ ગુનો નોંધી તેની અટકાયત કરવાની તજવીજ શરૂ કરી છે.
