જામનગર અપડેટ્સ : શહેરના ગુલાબનગર વિસ્તારમાં આવેલા મોહનનગર આવાસમાં મકાન ખાલી કરાવવા જેવી નજીવી બાબતે બે પાડોશી પરિવારો વચ્ચે ઉગ્ર બોલાચાલી બાદ હિંસક અથડામણ થઈ હતી. આ બનાવમાં પથ્થર, લોખંડના પાઈપ અને લાકડાના ધોકા વડે હુમલો કરવામાં આવ્યો હતો, જેમાં બંને પક્ષના લોકોને ઈજાઓ પહોંચી છે. સીટી એ ડિવિઝન પોલીસે બંને પક્ષની ફરિયાદ નોંધી તપાસ હાથ ધરી છે.
પ્રથમ ફરિયાદ: મકાન ખાલી કરવાનું કહેતા પરિવારે હુમલો કર્યો
પ્રકાશભાઈ હિતેશભાઈ મહેતા (ઉં.વ. ૨૫) દ્વારા નોંધાવવામાં આવેલી ફરિયાદ મુજબ, તેમણે આરોપી હાર્દિકભાઈ પારેખને થોડા સમય પહેલા મકાન ભાડે અપાવ્યું હતું. આ મકાન ખાલી કરવાનું કહેતા આરોપીઓને તે ગમ્યું ન હતું. તારીખ ૩૦/૦૪/૨૦૨૬ની રાત્રે આરોપી હાર્દિક કિશોરભાઈ પારેખ, ઋષિ પારેખ અને પારુલબેન ઉર્ફે પાયલ પારેખે પ્રકાશભાઈની માતા સાથે ગાળાગાળી કરી હતી.
પ્રકાશભાઈ નીચે આવતા પારુલબેને તેમને માથામાં પથ્થર માર્યો હતો, જ્યારે હાર્દિકે લોખંડના પાઈપથી કમરના ભાગે અને ઋષિએ લાકડાના ધોકાથી વાસા તથા પગના ભાગે માર માર્યો હતો. આ હુમલામાં પ્રકાશભાઈને માથામાં ત્રણ ટાંકા આવ્યા છે અને કમરના ભાગે ફ્રેક્ચર જેવી ગંભીર ઈજાઓ પહોંચી છે. પોલીસે હથિયારબંધીના જાહેરનામાના ભંગ સહિતની કલમો હેઠળ ગુનો નોંધ્યો છે.
બીજી ફરિયાદ: મકાન બાબતે પૂછવા જતાં માર માર્યો અને બટકું ભર્યું
સામા પક્ષે પારુલબેન ઉર્ફે પાયલ હાર્દિકભાઈ પારેખ (ઉં.વ. ૩૭) દ્વારા પણ વળતી ફરિયાદ નોંધાવવામાં આવી છે. તેમની ફરિયાદ મુજબ, પ્રકાશભાઈના ભાઈ સાગર મહેતાએ તેમને ભાડે મકાન અપાવ્યું હતું. આ મકાન ખાલી કરવા બાબતે જ્યારે તેઓ વાતચીત કરવા ગયા, ત્યારે સામા પક્ષે ઉશ્કેરાઈને ગાળાગાળી કરી હતી.
આક્ષેપ મુજબ, પ્રકાશ મહેતા, સાગર મહેતા અને કેયુર સંઘવીએ ભેગા મળીને પારુલબેનને ધક્કો મારી નીચે પાડી દીધા હતા અને તેમના પતિ હાર્દિક તથા ભાઈ ઋષિને ઢીકાપાટુનો માર માર્યો હતો. વધુમાં, આરોપી પ્રકાશ મહેતાએ ઋષિને કપાળના ભાગે બટકું ભરી લીધું હોવાનું અને જાનથી મારી નાખવાની ધમકી આપી હોવાનું ફરિયાદમાં જણાવ્યું છે.
આ બંને ફરિયાદોના આધારે સીટી એ ડિવિઝન પોલીસે ભારતીય ન્યાય સંહિતા (BNS) ની વિવિધ કલમો હેઠળ ગુના દાખલ કર્યા છે. પથ્થરમારો અને હથિયારો વડે થયેલા હુમલાને પગલે વિસ્તારમાં ચકચાર મચી ગઈ છે. વધુ તપાસ પી.એસ.આઈ. એમ.એન. રાઠોડ અને પોલીસ હેડ કોન્સ્ટેબલ પી.ટી. જાડેજા ચલાવી રહ્યા છે.
