જામનગર અપડેટ્સ : શહેરની ભાગોળે આવેલા મસીતીયા રોડ પર ઉર્જા ઇન્ડસ્ટ્રીયલ પાર્ક-૧ વિસ્તારમાં એક કારખાનામાં કુટુંબીક વિવાદ હિંસક બન્યો હોવાનો બનાવ સામે આવ્યો છે. જન્મદિવસની ઉજવણી માટે કારખાનામાં પહોંચેલા પરિવારજનો વચ્ચે થયેલી તકરાર દરમિયાન ઝઘડો કરતા પતિને કારખાનેદારે સીડી પરથી ધક્કો મારતા તેને માથાના પાછળના ભાગે ઇજા પહોંચી હતી. પોલીસે કારખાનેદાર સામે ફરિયાદ નોંધી છે અને આગળની કાર્યવાહી હાથ ધરી છે. બીજી તરફ ઘવાયેલ યુવાનની હાલત સ્થિર હોવાનું જાણવા મળ્યું છે.
આ બનાવની પોલીસ દફતરમાં નોંધાયેલ ફરિયાદની માહિતી અનુસાર, મસીતીયા ગામના રસ્તે આવેલ ઉર્જા ઇન્ડસ્ટ્રીયલ પાર્ક-૧, શેરી નં.૦૨, પ્લોટ નં.૧૦ ખાતે આવેલ પવનપુત્ર પ્રોડક્ટ્સ (માલિક જયદીપભાઈ તાડા)ના કારખાનામાં ૨૭ વર્ષીય કિરણબેન પ્રકાશભાઈ ગણપતભાઈ મોખરા કામ કરતા હતા. તેમની દિકરીના જન્મદિવસની ઉજવણી નિમિત્તે તેમના પતિ પ્રકાશભાઈ, દિયર અને સાસુ કારખાનામાં આવ્યા હતા. કારખાનામાં પહોંચ્યા બાદ કિરણબેન અને તેમના પતિ વચ્ચે જૂના કુટુંબીક મામલાને લઈને બોલાચાલી શરૂ થઈ હતી. જાણવામાં આવ્યું છે કે કિરણબેન એકાદ વર્ષ પહેલા તેમના કુટુંબીક ભાઈ સાથે લગ્ન કરવા માટે ભાગી ગયા હતા, જેને લઈને બંને વચ્ચે અગાઉથી મનદુઃખ ચાલતું હતું. આ જ મુદ્દે જન્મ દિવસની ઉજવણીમાં આવેલ પતિ અને પત્ની વચ્ચે કારખાનામાં ઉગ્ર ઝઘડો શરૂ થયો હતો. કારખાનાના અન્ય મજૂરોએ બંનેને શાંતિ રાખવા સમજાવ્યા હતા, પરંતુ ઝઘડો ચાલુ જ રહ્યો. પરિસ્થિતિ બગડતા મજૂરોએ કારખાનાના માલિક જયદીપભાઈ તાડાને જાણ કરી હતી. માલિક સ્થળ પર આવી બંનેને સમજાવવાનો પ્રયાસ કર્યો હતો. છતાં વાત શમી નહોતી.
આ દરમિયાન કારખાનેદાર જયદીપ ગિરધરભાઈ તાળાએ ઉપરના માળેથી કિરણબેનના પતિનો હાથ ખેંચી સીડી પર ધક્કો માર્યો હતો, જેના કારણે પ્રકાશભાઈ સીડી પર પડી જતા તેમના માથાના પાછળના ભાગે ઇજા પહોંચી હતી. ઇજાગ્રસ્તને સારવાર માટે ખસેડવામાં આવ્યા હોવાનું જાણવા મળે છે. આ બનાવ અંગે પંચકોશી બી ડીવિઝન પોલીસ મથકે ફરિયાદ નોંધાઈ છે. પોલીસે મામલાની તપાસ હાથ ધરી આગળની કાર્યવાહી શરૂ કરી છે. કુટુંબીક વિવાદો હિંસક સ્વરૂપ ધારણ ન કરે તે માટે સમજૂતી અને સંવાદ જરૂરી હોવાનું સ્થાનિક સ્તરે ચર્ચાઈ રહ્યું છે.
