જામનગર અપડેટ્સ: પ્રેમમાં લીધેલા એક નિર્ણયએ આખા જીવનને પ્રશ્નચિહ્નમાં મૂકી દીધું… અને પરિવારની નારાજગીના શબ્દો ૧૮ વર્ષની કુમળી ઉંમરને સહન ન થયા. જામનગર જિલ્લાના કાલાવડ તાલુકાના કૃષ્ણપુર ગામે બનેલી આ હૃદયદ્રાવક ઘટનાએ સમાજને વિચારવા મજબૂર કરી દીધો છે. છેક મધ્યપ્રદેશથી પ્રેમ લગ્ન કરી પેટ્યું રડવા અત્રે આવેલ યુગલના સંસારનો કરુણ અંત આવ્યો છે. પોતાને ગમતા પાત્ર સાથે સંસાર માંડતા પરિવારના સભ્યોને પસંદ ન પડ્યું અને માતાપિતા સહિતનાઓ તેણીને આવકારવાના બદલે જાકારો આપતા આ ઘટના ઘટી છે.
મળતી માહિતી મુજબ, મધ્યપ્રદેશના અલીરાજપુર જિલ્લાના રીંગોલ ગામેથી આવેલા ૧૮ વર્ષીય લતાબેન અંકલેશભાઈ ગણાવા કૃષ્ણપુર ગામે વિપુલભાઈ સખીયાની વાડી ખાતે રહેતા હતા. લતાબેને અંકલેશભાઈ સાથે ભાગીને લગ્ન કર્યા હતા. પરંતુ આ લગ્નથી તેમના માતા-પિતા અને પરિવારજનો નારાજ હતા. ઘટનાના દિવસે લતાબેને પોતાના માતા-પિતાને ફોન કરી વાતચીત કરવાનો પ્રયાસ કર્યો હતો. પરંતુ માતા-પિતાએ લગ્ન મુદ્દે ઠપકો આપતા અને સંબંધ ન રાખવા તથા ફરી ફોન ન કરવા જણાવ્યું હોવાનું જાણવા મળે છે. આ શબ્દો યુવતીના હૃદયને ઘેરી વેદના આપી ગયા. માનસિક રીતે આઘાત પામેલી લતાબેને પોતાની રહેણાંક વાડીએ ઓઢણી (ચુદંડી) ગળામાં બાંધી છાપરાના પાઇપ સાથે લટકી ગળાફાંસો ખાઈ આપઘાતનો પ્રયાસ કર્યો હતો.
આ બનાવની જાણ થતા પતિ અંકલેશભાઈએ તાત્કાલિક પત્નીને નીચે ઉતારી હોસ્પિટલ ખસેડી હતી. ગળાના ભાગે ગંભીર ઇજા પહોંચતા સારવાર દરમિયાન લતાબેન બેભાન હાલતમાં જ મોતને ભેટ્યા હતા. આ ઘટનાએ બંને પરિવારોમાં શોકની લાગણી છવાઈ ગઈ છે.કાલાવડ પોલીસ સમક્ષ મૃતકના પતિએ ઉપરોક્ત હકીકત મુજબ નિવેદન આપ્યું છે. કાલાવડ ગ્રામ્ય પોલીસે વધુ તપાસ હાથ ધરી છે.
આવો બનાવ માત્ર એક પરિવારની દુર્ઘટના નથી, પરંતુ સમગ્ર સમાજ માટે ચેતવણી સમાન છે. યુવાનોના જીવનના નિર્ણયો પ્રત્યે સંવેદનશીલતા અને સંવાદનો અભાવ અનેક વખત દુર્ભાગ્યપૂર્ણ પરિણામો લાવે છે. પરિવારે સંતાનો સાથે ખુલ્લી ચર્ચા, સમજણ અને સહાનુભૂતિથી વાત કરવી જરૂરી છે.સમાજે પણ આવી પરિસ્થિતિમાં દોષારોપણ કરતા માર્ગદર્શન અને માનસિક સહાય પૂરી પાડવી જોઈએ. પ્રેમ અને સંબંધો અંગે મતભેદ હોઈ શકે, પરંતુ જીવનથી મોટું કંઈ નથી — આ સમજણ જ આવા કરૂણ બનાવોને અટકાવવાનો સાચો માર્ગ બની શકે છે.
