જામનગર અપડેટ્સ: રંગીલા જામનગરમાં વ્યાજખોરોનો આતંક અટકવાનું નામ નથી લઈ રહ્યો. શહેરના ગોકુલનગર વિસ્તારમાં એક સામાન્ય ખાનગી નોકરી કરતા યુવાનને વ્યાજના અજગરી ભરડામાં ફસાવી, તેની પાસેથી મૂળ રકમ કરતા સાત ગણી વધુ રકમ વસૂલ્યા બાદ પણ જેલની ધમકી આપી ખોટા કેસમાં ફસાવવાનો સનસનાટીભર્યો મામલો સામે આવ્યો છે. સીટી ‘સી’ ડિવિઝન પોલીસે આ મામલે કડક કાયદાકીય જોગવાઈઓ હેઠળ ગુનો નોંધી વ્યાજખોર સામે ગાળિયો કસ્યો છે.
લોહી ચૂસતું વ્યાજ: 500 રૂપિયા રોજનું ‘પઠાણી’ વ્યાજ વસૂલાયું
ઘટનાની વિગતો મુજબ, ખંભાળીયા નાકા બહાર રહેતા હીરેનભાઇ નટવરલાલ જોઇસર નામના યુવાને વર્ષ 2019માં પોતાની આર્થિક જરૂરિયાતને પહોંચી વળવા માટે ગોકુલનગરના અનિલભાઇ વિનોદભાઇ ઉમરાડીયા પાસેથી રૂ. 50,000 વ્યાજે લીધા હતા. વ્યાજખોર અનિલે આ રકમ સામે દરરોજના રૂ. 500 વ્યાજની શરત મૂકી હતી. હીરેનભાઈએ કાળી મજૂરી કરીને બે વર્ષ સુધી રોજનું 500 રૂપિયા લેખે કુલ રૂ. 3,60,000 વ્યાજ પેટે ચૂકવી દીધા હતા. તેમ છતાં, આરોપીની લાલચ ઓછી થઈ નહોતી.
ચેક રિટર્નની ધમકી અને કોર્ટમાં ખોટી કેસની સોગઠી
લાખો રૂપિયા વસૂલ્યા બાદ પણ આરોપી અનિલ ઉમરાડીયાએ હીરેનભાઈ પાસેથી લીધેલા સિક્યોરિટી ચેકનો દુરુપયોગ શરૂ કર્યો હતો. આરોપીએ હીરેનભાઈના બેંક એકાઉન્ટનો ચેક પોતાની મેળે રૂ. 1,20,000ની રકમ ભરીને બેંકમાં નાખ્યો હતો. ચેક બાઉન્સ થતા જ આરોપીએ હીરેનભાઈ પર કોર્ટમાં ખોટી ફરિયાદ કરી જેલ ભેગા કરવાની ધમકી આપી હતી. આખરે કંટાળીને ભાનુશાળી યુવાને સીટી ‘સી’ ડિવિઝન પોલીસના દ્વાર ખખડાવ્યા હતા. પીએસઆઈ એન.એમ. ઝાલાએ ‘ગુજરાત નાણાની ધીરધાર અધિનીયમ-2011’ ની વિવિધ કલમો હેઠળ ગુનો નોંધી તપાસનો ધમધમાટ તેજ કર્યો છે.
વ્યાજના વિષચક્ર સામે સમાજને સંદેશ
વ્યાજખોરી એ સામાજિક કેન્સર છે. કોઈ પણ આર્થિક મુસીબત સમયે ગેરકાયદેસર નાણાં ધીરનાર વ્યક્તિઓ પાસે જવાને બદલે સરકારી બેંક અથવા માન્ય સંસ્થાઓનો સંપર્ક કરવો જોઈએ. તમારી મજબૂરીનો કોઈ ફાયદો ઉઠાવે તો ડર્યા વગર પોલીસને જાણ કરો, કારણ કે તમારો મૌન વ્યાજખોરના મનોબળને વધારે છે. સરકારે અને સહકારી સંસ્થાઓ તેમજ બેંકોએ સાથે મળી જરૂરિયાત મંદ માટે સરળ પ્રક્રિયાથી લોનની વ્યવસ્થાઓ ઉભી કરવી જોઈએ જેથી આ બનાવો બનતા અટકે
વ્યાજખોરી ડામવા પોલીસના પ્રયાસો
લોક દરબાર: જામનગર પોલીસ દ્વારા સમયાંતરે લોક દરબાર યોજીને વ્યાજખોરીના પીડિતોની રજૂઆત સાંભળવામાં આવે છે.
સ્પેશિયલ ડ્રાઈવ: શંકાસ્પદ વ્યાજખોરોના લિસ્ટ બનાવી તેમના પર સતત વોચ રાખવામાં આવે છે.
સાઇબર હેલ્પલાઇન:સોશિયલ મીડિયા અને ફોન દ્વારા મળતી ધમકીઓ સામે તાત્કાલિક ટેકનિકલ તપાસ હાથ ધરવામાં આવે છે.
લોન મેળા: વ્યાજખોરોના ચુંગાલમાંથી બચાવવા માટે પોલીસના માધ્યમથી બેંક લોન અપાવવાના કેમ્પ યોજવામાં આવે છે.
તપાસની કમાન પીએસઆઈ એમવી દવેના હાથમાં
આ બનાવની નોંધાયેલ ફરિયાદના આધારે સીટી ‘સી’ ડિવિઝન પોલીસ સ્ટેશનના પીએસઆઈ એમ.વી. દવે અને તેમની ટીમે વ્યાજખોરો વિરુદ્ધ ‘ઝીરો ટોલરન્સ’ નીતિ અપનાવી છે. પોલીસની આ કડક કાર્યવાહીથી અન્ય વ્યાજખોરોમાં ફફડાટ ફેલાયો છે. હવે જોવાનું એ રહે છે કે, કાયદાના સકંજામાં ફસાયેલ આ અનિલ ઉમરાડીયાને ન્યાયતંત્ર કેવો પાઠ ભણાવે છે.
આઈજી નિર્લિપ્ત રાયના દરબારમાં ફરિયાદીએ ન્યાય માંગ્યો અને…
તાજેતરમાં નિયુક્તિ થયા બાદ રાજકોટ રેંજ આઈજી નિર્લિપ્ત રાય દ્વારા ગુનેગારો ફરતે કાયદાનો મજબુત સકંજો તાણવા જામનગરમાં રીઢા સખ્સોને એસપી કચેરીએ બોલાવી ફેસ ટુ ફેસ વાર્તાલાપ કરી સાનમાં સમજાવ્યા હતા. ત્યારબાદ તમામ જિલ્લાઓનો અભ્યાસ કરી રાજકોટ રેંજના તમામ જીલ્લાઓમાંથી વ્યાજખોરી ડામવા આઈજીએ લોક દરબારનું આહ્વવાન કર્યું હતું ત્યાર બાદ રેંજના દરેક જિલ્લાઓમાં તબક્કાવાર ફરિયાદોનો સિલસિલો શરુ થયો છે.
