જામનગર અપડેટ્સ: કાયદો ક્યારેક માત્ર કલમો અને કાગળો પર જ સીમિત રહી જાય છે, પરંતુ તેની પાછળ છુપાયેલી સંવેદનાઓ સમાજને હચમચાવી દેતી હોય છે. ભારતીય નાગરિક સુરક્ષા સંહિતા (BNSS) ની કલમ-૧૯૪ મુજબ અકસ્માત મોતનો ગુનો તો નોંધાયો છે, પણ એક ૨૧ વર્ષના યુવાનના જીવનનો અંત જે રીતે આવ્યો છે, તે જોતા ‘કાયદો’ પણ કદાચ સ્તબ્ધ હશે. માત્ર જમવા જેવી સામાન્ય બાબતે થયેલો મનદુઃખ એક આશાસ્પદ યુવાનને મોત સુધી ખેંચી જશે એવી કલ્પના તેના પરિવારે પણ કરી નહોતી.
જામનગરના ટી.બી. હોસ્પિટલ વિસ્તારમાં આવેલા પાંચ બંગલા પાસેના રાદલનગરમાં રહેતા ૨૧ વર્ષીય હર્ષભાઇ ભરતભાઇ ડાગર (આહીર) ના લગ્ન હજુ માંડ એકાદ માસ પહેલા જ થયા હતા. ઘરમાં નવી વહુના આગમનની ખુશીઓ હજુ શમી નહોતી ત્યાં જ ૨૧ માર્ચ ૨૦૨૬ના રોજ બપોરે ૧૨:૪૫ વાગ્યાના અરસામાં કાળનો પંજો ત્રાટક્યો હતો. મૃતક હર્ષભાઈને તેની માતાએ બહારગામ ‘રોટલા ખાવા’ (સામાજિક જમણવાર) જવા માટે કહ્યું હતું. જોકે, હર્ષભાઈને જવાની ઈચ્છા નહોતી. માતાના આ આગ્રહથી હર્ષભાઈને મનમાં ઓચિંતું લાગી આવ્યું હતું. ક્ષણિક આવેશમાં આવી જઈ તેઓ જામનગરથી હાપા જતા રેલવે ટ્રેક પર પહોંચી ગયા હતા અને ત્યાંથી પસાર થતી માલગાડી સામે ઉભા રહી જતા ગંભીર ઈજાઓ થવાથી તેમનું ઘટનાસ્થળે જ કમકમાટીભર્યું મોત નીપજ્યું હતું.
તપાસનો ધમધમાટ
આ બનાવ અંગે મૃતકના પિતા અને ચાની દુકાન ચલાવતા ભરતભાઇ કરશનભાઇ ડાગરે પોલીસને જાણ કરી હતી. બેડી મરીન પોલીસ સ્ટેશનના પોલીસ હેડ કોન્સ્ટેબલ એસ.કે. જાડેજા દ્વારા આ મામલે કાયદેસરની કાર્યવાહી હાથ ધરવામાં આવી છે. એક મહિનાના લગ્નગાળામાં જ પત્નીએ અકાળે વિધવા બનવાનો વારો આવ્યો છે.
આવા બનાવો અટકાવવા શું કરવું જોઈએ?
આવા બનાવો સમાજ માટે ખૂબ જ ચિંતાજનક છે. જ્યારે સામાન્ય પારિવારિક ચર્ચાઓ આત્મહત્યા જેવા અંતિમ પગલામાં પરિણમે છે, ત્યારે સમજવું જોઈએ કે આજની પેઢીમાં માનસિક મક્કમતા અને સહનશક્તિનો અભાવ વધી રહ્યો છે.
- સંવાદ વધારો: પરિવારમાં નાની-નાની વાતોમાં જિદ કરવાને બદલે મુક્ત મને ચર્ચા કરવાની આદત પાડવી જોઈએ.
- ધીરજની કેળવણી: ક્ષણિક આવેશ હંમેશા વિનાશ નોંતરે છે. યુવા પેઢીએ સમજવું પડશે કે સમસ્યાનું સમાધાન મોત નથી.
- કાઉન્સેલિંગ: જો કોઈ વ્યક્તિ નાની વાતોમાં વધુ પડતું સંવેદનશીલ બની જતું હોય, તો તેને માનસિક હૂંફ અને જરૂર પડે તો નિષ્ણાતની સલાહ અપાવવી જોઈએ.
એક મહિના પહેલા જે આંગણે શરણાઈઓ વાગી હતી, આજે ત્યાં મરશિયા ગવાય રહ્યા છે. આ ઘટના ફરી એકવાર આપણને શીખવે છે કે ‘જીવન’ એ માત્ર આપણું નથી, આપણા પરિવારનું પણ છે.
