પ્રાઈમ ઇન્ફૉ:
જામનગરના નાઘેડી GIDC માં સ્ટેટ મોનિટરિંગ સેલ (SMC)ના સપાટા બાદ જિલ્લા પોલીસવડા આકરાપાણીએ
પંચકોશી બીડીવીજન પોલીસ દફતરના પીએસઆઈ સહિત આઠ પોલીસકર્મીઓ સસ્પેન્ડ
બે દિવસ પૂર્વે smc એ 10,409 વિદેશી દારૂની બોટલો અને 5 વાહનો સહિત કુલ રૂ. 1.37 કરોડનો મુદ્દામાલ પકડી પાડ્યો હતો
સ્થાનિક પોલીસની બેદરકારી બદલ જિલ્લા પોલીસ વડા (SP) ડો. રવિમોહન સૈની દ્વારા કડક કાર્યવાહી
પંચકોશી બી ડિવિઝનના PSI એલ.બી. જાડેજા સહિત કુલ 8 પોલીસકર્મીઓ તાત્કાલિક અસરથી સસ્પેન્ડ
સસ્પેન્ડ કરાયેલા તમામ 8 પોલીસકર્મીઓની જિલ્લાફેર (સુરેન્દ્રનગર અને દેવભૂમિ દ્વારકા) બદલી કરી દેવાતા પોલીસ બેડામાં ભારે ખળભળાટ
જામનગર અપડેટ્સ: જામનગર તાલુકાના નાઘેડી ગામ નજીક આવેલી જીઆઇડીસી (GIDC) વિસ્તારમાં સ્ટેટ મોનિટરિંગ સેલ (SMC) ની ટીમે વહેલી સવારે દરોડો પાડીને મોટા પાયે ચાલતું વિદેશી દારૂનું કટિંગ પકડી પાડ્યું હતું. આ મોટી કાર્યવાહીને પગલે સ્થાનિક પોલીસની બેદરકારી સામે આવતા એસપીએ કડક પગલાં લીધા છે.
કરોડોનો મુદ્દામાલ અને દારૂ જપ્ત:
આ દરોડામાં રૂ. 37.21 લાખથી વધુની કિંમતની વિદેશી દારૂની કુલ 10,409 બોટલો જપ્ત કરવામાં આવી છે. સ્થળ પરથી બે ટ્રક અને મોટરસાઇકલ સહિત પાંચ વાહનો મળીને કુલ રૂ. 1,37,58,491 નો મુદ્દામાલ કબજે કરવામાં આવ્યો છે.
આરોપીઓની ધરપકડ અને શોધખોળ:
SMC ની ટીમે સ્થળ પરથી દીપક ઉર્ફે અટાપટુ જમનાદાસ જેઠવાણી અને યુવરાજસિંહ કાળુભા ચૂડાસમા નામના બે શખ્સોને ઝડપી લીધા હતા. જ્યારે રામકો, કાના મોઢવાડિયા, જીગો અને ઈરફાન કાસમ સહિત કુલ 9 શખ્સોને ફરાર જાહેર કરી તેમની શોધખોળ હાથ ધરવામાં આવી છે.
સ્થાનિક પોલીસ સામે કડક કાર્યવાહી:
પંચકોશી બી ડિવિઝનની હદમાં આટલો મોટો દારૂનો જથ્થો પકડાતાં જિલ્લા પોલીસ વડા (એસપી) ડો. રવિમોહન સૈની લાલઘૂમ થયા હતા. સ્થાનિક પોલીસની બેદરકારી સામે કડક વલણ અપનાવીને એસપીએ પંચકોશી બી ના પીએસઆઈ (PSI) એલ.બી. જાડેજા સહિત 8 પોલીસકર્મીઓને તાત્કાલિક અસરથી સસ્પેન્ડ કરી દીધા છે. સસ્પેન્ડ કરાયેલા અન્ય પોલીસ કર્મચારીઓમાં એએસઆઈ ધર્મેન્દ્રસિંહ (ધમલા) ઝાલા, પ્રદીપસિંહ જાડેજા, હેડ કોન્સ્ટેબલ રાજદીપસિંહ જાડેજા, નિર્મલસિંહ રાઠોડ, મેહુલભાઈ વિસાણી, પોલાભાઈ ઓડેદરા અને મયુરસિંહ જાડેજાનો સમાવેશ થાય છે.
સસ્પેન્ડ કરાયેલા પોલીસકર્મીઓની જિલ્લાફેર બદલી:
તમામ સસ્પેન્ડેડ કર્મચારીઓની અન્ય જિલ્લામાં બદલી કરી દેવામાં આવી છે. જેમાં ધર્મેન્દ્રસિંહ ઝાલાની દેવભૂમિ દ્વારકા અને બાકીના તમામ પોલીસકર્મીઓની સુરેન્દ્રનગર જિલ્લામાં બદલી કરાતાં સમગ્ર પોલીસ બેડામાં ભારે ખળભળાટ મચી ગયો છે.
બુટલેગરો અને પોલીસ બેડામાં ફફડાટ:
જામનગર શહેર-જિલ્લામાં વર્ષો પછી સ્ટેટ મોનિટરીંગ સેલની ટીમનો આ મોટો દરોડો પડ્યો છે. આ કડક કાર્યવાહીથી બુટલેગરોમાં ફફડાટ વ્યાપી ગયો છે. તો બીજી બાજુ પોલીસબેડામાં પણ ફફડાટ જોવા મળી રહ્યો છે અને અન્ય પોલીસે પોતાના વિસ્તારોમાં બુટલેગરો ઉપર વોચ ગોઠવી દીધી છે.
