પ્રાઈમ ઇન્ફૉ
- ખંભાળિયા: તુલસી પાર્ક-2માં દિવસ દરમિયાન ચોરી
- રૂ.2.85 લાખ: સોનાના દાગીના ચોરી કરી તસ્કર ફરાર
- ડેલી અને દરવાજાનું તાળું તોડી ઘરમાં પ્રવેશ
- કબાટનું લોકર તોડી દાગીના લઈ જવાયા
- ખંભાળિયા પોલીસે અજાણ્યા શખ્સ સામે ગુનો નોંધ્યો
જામનગર અપડેટ્સ: ખંભાળિયામાં ચોરીની એક ઘટના સામે આવી છે. તુલસી પાર્ક-2 વિસ્તારમાં રહેતા પરિવારના મકાનને અજાણ્યા તસ્કરે નિશાન બનાવી દિવસ દરમિયાન ઘરમાં પ્રવેશ કરી રૂ.2.85 લાખથી વધુ કિંમતના સોનાના દાગીનાની ચોરી કરી હોવાની ફરિયાદ ખંભાળિયા પોલીસ મથકમાં નોંધાઈ છે.
મળતી વિગતો મુજબ, 29 સપ્ટેમ્બર 2026ના બપોરે 1:15થી 2:15 વાગ્યા દરમિયાન ખંભાળિયા પોલીસ મથકથી આશરે ચાર કિલોમીટર ઉત્તર તરફ આવેલા તુલસી પાર્ક-2, રેલવે સ્ટેશન પાછળના વિસ્તારમાં આ બનાવ બન્યો હતો. ફરિયાદી નીરાલીબેન વા/ઓ જગદીશભાઈ બાલુભાઈ જોષી, ઉંમર 25 વર્ષ, પોતાના રહેણાંક મકાનમાં ચોરી થયાની ફરિયાદ નોંધાવી છે.
ફરિયાદમાં જણાવ્યા મુજબ, અજાણ્યા ચોર ઈસમે મકાનની ડેલી અને દરવાજાનું તાળું તોડી ઘરમાં પ્રવેશ કર્યો હતો. ત્યારબાદ રૂમમાં રહેલા કબાટનું લોકર પણ તોડી તેમાં રાખવામાં આવેલા સોનાના દાગીનાની ચોરી કરી તસ્કર ફરાર થઈ ગયો હતો.
ચોરાયેલા દાગીનામાં બે તોલાનો સાદા પેડલવાળો સોનાનો ચેઇન, આશરે બે તોલાનો કૃષ્ણ ભગવાનના પેડલવાળો સોનાનો ચેઇન, આશરે બે તોલાની એક જોડી સોનાની બંગડીઓ, 5.410 ગ્રામની સોનાની ઝુમરની જોડી સર સાથે તથા આશરે દોઢ તોલાની સોનાની પાંચ વીંટીનો સમાવેશ થાય છે.
પોલીસ ફરિયાદ મુજબ ચોરાયેલા દાગીનાની કુલ કિંમત રૂ.2,85,828 જેટલી થાય છે. ઘટનાની જાણ થતાં ખંભાળિયા પોલીસ દ્વારા ગુનો દાખલ કરી તપાસ હાથ ધરવામાં આવી છે. હાલ ચોરીના ગુનામાં આરોપી તરીકે કોઈ અજાણ્યા શખ્સનું નામ નોંધાયું છે અને આરોપીની ધરપકડ બાકી છે. ફરિયાદ મોડેથી નોંધાવા અંગે જણાવાયું છે કે ફરિયાદી પરિવાર દ્વારા પોતાની રીતે આસપાસના વિસ્તારમાં તપાસ કરવામાં આવી હતી, પરંતુ બનાવ અંગે કોઈ હકીકત જાણવા ન મળતાં અંતે પોલીસનો સંપર્ક કરી ફરિયાદ નોંધાવવામાં આવી હતી.
ખંભાળિયા પોલીસ મથકમાં આ અંગે ભારતીય ન્યાય સંહિતા-2023ની કલમ 305(A) અને 331(3) મુજબ ગુનો નોંધાયો છે. સમગ્ર મામલાની તપાસ સી.આર. રાણા, પોલીસ ઇન્સ્પેક્ટર, ખંભાળિયા પોલીસ સ્ટેશન દ્વારા કરવામાં આવી રહી છે.
બનાવની જાણ 30 સપ્ટેમ્બર 2026ના રોજ રાત્રે 8:25 વાગ્યે મદદનીશ પોલીસ અધિક્ષક, ખંભાળિયા વિભાગને કરવામાં આવી હતી અને 8:30 વાગ્યે વિઝીટેશન માટે રવાના થયા હતા. તપાસ દરમિયાન ચોરી ગયેલા દાગીના અને આરોપી અંગે પોલીસ દ્વારા વધુ તપાસ હાથ ધરવામાં આવી છે.
