જામનગર અપડેટ્સ, ધ્રોલ: ધ્રોલ તાલુકાના લતીપર ગામે લાયસન્સ વિના નાણા ધીરધાર કરી ઊંચા વ્યાજે વસૂલાત કર્યાની ફરિયાદના આધારે ધ્રોલ પોલીસે બે શખ્સો સામે બી.એન.એસ. તથા ગુજરાત મનીલેન્ડર્સ એક્ટ હેઠળ ગુનો નોંધ્યો છે. ફરિયાદમાં કુલ રૂ.29 લાખની રકમ ધીરધાર આપી તેની સામે અલગ-અલગ સમયે રોકડ તથા Google Pay મારફતે કુલ રૂ.80.89 લાખ વ્યાજ પેટે વસૂલ્યા હોવાનો આક્ષેપ કરવામાં આવ્યો છે.
જશાપર ગામના 56 વર્ષીય ખેડૂત નરભેરામ ડાયાભાઈ પનારાએ ધ્રોલ પોલીસ મથકે નોંધાવેલી ફરિયાદ મુજબ, લતીપર ગામના જનકભાઈ જીલુભાઈ ડાંગર અને રાહુલભાઈ બચુભાઈ ડાંગર દ્વારા તેમને અલગ-અલગ સમયે નાણાં આપવામાં આવ્યા હતા.
ફરિયાદ મુજબ, આરોપી નં.1 જનકભાઈ ડાંગરે ફરિયાદીને રૂ.20 લાખ 3 ટકા માસિક વ્યાજે આપ્યા હતા. આ રકમની સિક્યુરિટી પેટે સેન્ટ્રલ બેંકના કોરા ચેક લેવામાં આવ્યા હોવાનો આક્ષેપ છે. ત્યારબાદ અલગ-અલગ સમયે રોકડ તથા Google Pay મારફતે વ્યાજ પેટે કુલ રૂ.60.89 લાખ વસૂલવામાં આવ્યા હોવાનો ફરિયાદમાં ઉલ્લેખ છે.
આ ઉપરાંત, નાણા પરત મેળવવા અંગે ધાકધમકી આપી ફરિયાદી પાસેથી ત્રણ સોનાની વીંટી તેમજ જમીનની ખાતાવહી લઈ લેવામાં આવી હોવાનો પણ આક્ષેપ કરવામાં આવ્યો છે.
બીજા આરોપી રાહુલભાઈ બચુભાઈ ડાંગર અંગે ફરિયાદમાં જણાવાયું છે કે તેમણે ફરિયાદીને રૂ.9 લાખ 3 ટકા માસિક વ્યાજે આપ્યા હતા. આ રકમની સિક્યુરિટી પેટે પણ સેન્ટ્રલ બેંકના કોરા ચેક લેવામાં આવ્યા હોવાનો આક્ષેપ છે. ત્યારબાદ રોકડ તથા Google Pay મારફતે વ્યાજ પેટે કુલ રૂ.20 લાખ વસૂલ્યા હોવાનો ફરિયાદમાં ઉલ્લેખ કરવામાં આવ્યો છે.
ફરિયાદમાં એવો પણ આક્ષેપ છે કે નાણાંની ઉઘરાણી દરમિયાન ફરિયાદીને ધાકધમકી આપવામાં આવતી હતી અને તેની પાસે અગાઉ હાથઉછીના રૂપિયા લીધા હોવાનું બળજબરીપૂર્વક લખાણ કરાવવામાં આવ્યું હતું. બંને આરોપીઓએ સાથે મળી ફરિયાદી પાસેથી વારંવાર વ્યાજ તથા મુદ્દલની રકમની ઉઘરાણી કરી હોવાનો પણ આક્ષેપ કરવામાં આવ્યો છે.
ફરિયાદીનો વધુ આક્ષેપ છે કે બંને આરોપીઓએ નાણા ધીરધારનું લાયસન્સ લીધા વગર વ્યાજે નાણાં આપ્યા હતા. સમગ્ર મામલે ધ્રોલ પોલીસ સ્ટેશનમાં બી.એન.એસ. કલમ 308(2), 351(1), 54 તથા ગુજરાત મનીલેન્ડર્સ એક્ટ-2011ની કલમ 5, 33, 40 અને 42 મુજબ ગુનો નોંધવામાં આવ્યો છે.
પોલીસે ફરિયાદના આધારે તપાસ હાથ ધરી છે. આ કેસમાં ફરિયાદમાં કરવામાં આવેલા આક્ષેપોની સત્યતા, નાણાકીય વ્યવહારો, ચેક, Google Pay ટ્રાન્ઝેક્શન તથા અન્ય દસ્તાવેજોની તપાસ બાદ સમગ્ર હકીકત વધુ સ્પષ્ટ થશે.
