જામનગર અપડેટ્સ: જામનગર શહેરમાં જૂની માથાકૂટનો ખાર રાખીને પિતા-પુત્ર પર હુમલો કર્યાની ફરિયાદ સિટી એ ડિવિઝન પોલીસ સ્ટેશનમાં નોંધાઈ છે. સમગ્ર મામલે પોલીસે બે શખ્સો સામે ભારતીય ન્યાય સંહિતા (BNS)ની વિવિધ કલમો તેમજ ગુજરાત પોલીસ એક્ટની કલમ 135(1) હેઠળ ગુનો નોંધ્યો છે.
પોલીસ ફરિયાદ મુજબ, ફરિયાદી કિશનભાઈ મહેશભાઈ વશીયર, ઉંમર 22 વર્ષ, રહે. કિશાન ચોક, દ્વારકાપુરી મંદિર, જામનગર,ને અગાઉ આશરે ત્રણ મહિના પહેલાં આરોપી સાગર દિલીપભાઈ ગજરા સાથે માથાકૂટ થઈ હતી. આ જૂની અદાવતને લઈને સાગર ગજરાએ ફરિયાદી તથા તેમના પિતા મહેશભાઈને માર મારવા માટે કથિત રીતે ગુનાહિત કાવતરું રચ્યું હોવાનો ફરિયાદમાં આક્ષેપ કરવામાં આવ્યો છે.
ફરિયાદમાં જણાવ્યા અનુસાર, તા. 28 સપ્ટેમ્બર 2026ના રોજ સવારે આશરે 11 વાગ્યાના અરસામાં આરોપી સાગર ગજરાના કહેવાથી આરોપી ઇકબાલ યુસુફ ખફી, રહે. શંકરટેકરી પાણીના ટાંકા પાસે, જામનગર, ત્યાં પહોંચ્યો હતો. ત્યારબાદ ઇકબાલે ફરિયાદી તથા તેમના પિતાને ગાળો આપી લોખંડના પાઇપ વડે માર માર્યો હોવાનો આક્ષેપ છે.
હુમલામાં ફરિયાદીને શરીરના ભાગે મુંઢ ઈજાઓ તેમજ બંને પગમાં ઈજા થઈ હોવાની અને લોહી નીકળ્યું હોવાની ફરિયાદ નોંધાઈ છે. જ્યારે તેમના પિતા મહેશભાઈને પણ શરીરે માર મારવામાં આવ્યો હતો અને જમણા પગના ગોઠણના ભાગે પાઇપ વડે માર મારતાં ઈજા થઈ હોવાનો ફરિયાદમાં ઉલ્લેખ છે.
આ ઉપરાંત, જો ફરિયાદી સાગર ગજરા સાથે સમાધાન નહીં કરે તો તેને જાનથી મારી નાખવાની ધમકી આપવામાં આવી હોવાનો પણ ફરિયાદમાં આક્ષેપ કરવામાં આવ્યો છે. ફરિયાદના આધારે સિટી એ ડિવિઝન પોલીસ સ્ટેશને આરોપી સાગર દિલીપભાઈ ગજરા અને ઇકબાલ યુસુફ ખફી સામે BNS કલમ 115(2), 118(1), 352, 351(2), 61(2) તથા જી.પી. એક્ટ કલમ 135(1) મુજબ ગુનો નોંધ્યો છે. પોલીસ દ્વારા સમગ્ર ઘટનાની વધુ તપાસ હાથ ધરવામાં આવી છે.
