જામનગર અપડેટ્સ: જામનગર નજીકના સંચાણા ગામમાં પારિવારિક મામલાને લઈને બે ભાઈઓ પર હુમલો થયાની ઘટના સામે આવી છે. ફરિયાદી પરિવારના જણાવ્યા મુજબ, છૂટાછેડા અંગે ચાલી રહેલા કેસની બાબતને લઈને સગા બનેવી સહિતના શખ્સોએ હુમલો કર્યો હતો. આ દરમિયાન સમીર કક્કલ અને તેના ભાઈ અપસાર કક્કલ પર એસિડ ફેંકવામાં આવ્યું હોવાનો પણ આક્ષેપ કરવામાં આવ્યો છે.
પ્રાપ્ત વિગતો મુજબ, સંચાણા ગામના સમીર કક્કલની બહેનના લગ્ન બાદ પતિ સાથે છૂટાછેડાને લઈને કોર્ટમાં કેસ ચાલી રહ્યો છે. આ મામલાને લઈને અગાઉ પણ બંને પક્ષ વચ્ચે બોલાચાલી અને તકરાર થઈ હોવાનો પરિવાર દ્વારા આક્ષેપ કરવામાં આવ્યો છે.
ફરિયાદી પરિવારના આક્ષેપ મુજબ, આ જ બાબતને લઈને સગા બનેવી અને તેની સાથે આવેલા સાથીદારોએ સમીર કક્કલ તથા તેના ભાઈ અપસાર કક્કલ સાથે ઝઘડો કરી હુમલો કર્યો હતો. હુમલા દરમિયાન એસિડ જેવા પ્રવાહીનો ઉપયોગ કરવામાં આવ્યો હોવાનો આક્ષેપ થતાં મામલો વધુ ગંભીર બન્યો છે.
ઘટનાની જાણ થતાં સ્થાનિક પોલીસ સ્થળ પર પહોંચી હતી અને સમગ્ર બનાવ અંગે તપાસ હાથ ધરી છે. એસિડ એટેકના આક્ષેપને લઈને પોલીસ દ્વારા ઘટના સ્થળની વિગતો, ઈજાગ્રસ્તોના નિવેદનો તેમજ હુમલામાં વપરાયેલા પ્રવાહી અંગે તપાસ કરવામાં આવી રહી છે.
પોલીસ દ્વારા હાલ સમગ્ર મામલે તપાસ શરૂ કરવામાં આવી છે અને ફરિયાદ તથા તપાસના આધારે આગળની કાયદેસરની કાર્યવાહી હાથ ધરવામાં આવશે.
