જામનગર અપડેટ્સ, દ્વારકા: યાત્રાધામ દ્વારકામાં જન્માષ્ટમીના પાવન પર્વ નિમિત્તે ઉમટી પડેલી ભાવિકોની ભારે ભીડનો ગેરલાભ ઉઠાવી ચોરી કરતી એક સંગઠિત ગેંગ સામે દેવભૂમિ દ્વારકા પોલીસના સ્પેશ્યલ ઓપરેશન ગૃપ (SOG) દ્વારા કડક કાયદેસરની કાર્યવાહી હાથ ધરવામાં આવી છે.
જન્માષ્ટમી દરમિયાન જગતમંદિર પરિસર અને તેની આસપાસ દર્શનાર્થીઓની ભારે ભીડ એકત્રિત થતી હોય છે. આ ભીડભાડ અને ધક્કામુક્કીનો ફાયદો ઉઠાવીને કેટલાક અસામાજિક તત્વોએ સંગઠિત જૂથ (ગેંગ) બનાવી ગુનાહિત ષડયંત્ર રચ્યું હતું. આ ગેંગના સભ્યો ભીડમાં ચોક્કસ ટાર્ગેટ નક્કી કરી, દર્શનાર્થીઓની આગળ-પાછળ ગોઠવાઈ જતા હતા અને કટરની મદદથી કે નજર ચૂકવીને ખિસ્સા તથા પર્સમાંથી રોકડ અને કિંમતી સામાનની ચોરી કરતા હતા.
આ મામલે દેવભૂમિ દ્વારકા SOGના અનાર્મ ASI રાજેન્દ્રસિંહ મોતીભા જાડેજાની ફરિયાદના આધારે દ્વારકા પોલીસ મથકે ભારતીય ન્યાય સંહિતા (BNS) ૨૦૨૩ની કલમ ૧૧૨(૨), ૩૦૩(૨), ૬૧(૨) અને ૫૪ હેઠળ ગુનો નોંધવામાં આવ્યો છે.
પોલીસે કાર્યવાહી દરમિયાન આરોપીઓ પાસેથી:
રોકડા ₹૩૨,૦૪૦/-
૭ નંગ એન્ડ્રોઇડ/મોબાઇલ ફોન (કિંમત આશરે ₹૪૦,૦૦૦/-)
પર્સ-ખીસ્સા કાપવા માટે વપરાતું નાનું કટર
મળીને કુલ ₹૭૨,૦૪૦/-નો મુદ્દામાલ કબજે કર્યો છે. આ મામલે દ્વારકા પોલીસ સ્ટેશનના PSI આર. એલ. ચોપડા દ્વારા આગળની કાયદેસરની તપાસ અને આરોપીઓની અટકાયત માટેની તજવીજ હાથ ધરવામાં આવી છે.
