જામનગર અપડેટ્સ, દ્વારકા : દેવભૂમિ દ્વારકા જિલ્લામાં જુગારની પ્રવૃત્તિ સામે પોલીસ દ્વારા કાર્યવાહી કરવામાં આવી રહી છે. ત્યારે દ્વારકા પોલીસ સ્ટેશન વિસ્તારમાં બરડીયા ગામના હાઈવે રોડ પર આવેલા THE SKY IMPERIAL BAPU’S RESORTના ત્રીજા માળે પોલીસે દરોડો પાડી તીનપત્તીનો જુગાર રમતા છ શખ્સોને ઝડપી પાડ્યા હતા.
મળતી માહિતી મુજબ, 1 સપ્ટેમ્બર 2026ના રોજ રાત્રે આશરે 1:10 વાગ્યાના સમયે બરડીયા ગામ હાઈવે રોડ પર આવેલા રિસોર્ટના ત્રીજા માળે જુગાર રમાતો હોવાની માહિતીના આધારે પોલીસ ટીમે દરોડો પાડ્યો હતો. દરોડા દરમિયાન ગંજીપત્તાના પાના અને રોકડ રકમ વડે નસીબ આધારિત પૈસાની હાર-જીતનો તીનપત્તીનો જુગાર રમતા શખ્સો પોલીસના હાથે ઝડપાઈ ગયા હતા.
પોલીસ ફરિયાદ મુજબ, આરોપી નંબર-1 **નીર્ભય મુકેશભાઈ અપાણી (ઉંમર 29)**એ રિસોર્ટમાં ઓનલાઈન રૂમ ભાડે કર્યો હતો. ત્યારબાદ તેની સાથે આવેલા આરોપી નંબર 2થી 6 સુધીના શખ્સો સાથે મળી તીનપત્તીનો જુગાર રમતા હોવાનું પોલીસ તપાસમાં સામે આવ્યું છે.
પોલીસે 6 શખ્સોને ઝડપી પાડ્યા
આ કાર્યવાહી દરમિયાન પોલીસે ગાંધીનગરના રહેવાસી છ શખ્સોને ઝડપી પાડ્યા હતા. જેમાં નીર્ભય મુકેશભાઈ અપાણી (29), જયદીપ બાબુભાઈ કુકડીયા (32), ઉદયસિંહ ભરતસિંહ ગોહિલ (36), કાર્તિક હર્ષદભાઈ પડસાણા (29), ફરીકૃષ્ણભાઈ રમેશભાઈ ગઢીયા (29) અને **ભરતસિંહ ફતેસિંહ ગોહિલ (64)**નો સમાવેશ થાય છે.
આરોપીઓમાંથી પાંચ શખ્સો વ્યવસાયે સિવિલ એન્જિનિયર હોવાનું અને એક શખ્સ નિવૃત્ત હોવાનું પોલીસ ફરિયાદમાં નોંધાયું છે.
₹1.10 લાખથી વધુનો મુદ્દામાલ જપ્ત
દરોડા દરમિયાન પોલીસે સ્થળ પરથી ₹65,250ની રોકડ રકમ, 6 મોબાઈલ ફોન, કિંમત આશરે ₹45,000, તેમજ ગંજીપત્તાના પાના અને એક કેટ મળી કુલ ₹1,10,250નો મુદ્દામાલ કબજે કર્યો હતો.
આ મામલે દ્વારકા પોલીસ સ્ટેશનમાં ગુજરાત જુગારધારા કલમ 4 અને 5 મુજબ ગુનો નોંધવામાં આવ્યો છે. આ કેસમાં ફરિયાદ LCB દેવભૂમિ દ્વારકાના પોલીસ હેડ કોન્સ્ટેબલ ખીમાણંદભાઈ પબાભાઈ આંબલીયા દ્વારા કરવામાં આવી છે. ફરિયાદની રૂબરૂ નોંધ LCBના PSI એમ.આર. સવસેટા દ્વારા કરવામાં આવી હતી.
પોલીસે આરોપીઓ વિરુદ્ધ કાયદેસરની કાર્યવાહી હાથ ધરી છે અને સમગ્ર મામલે વધુ તપાસ દ્વારકા પોલીસ સ્ટેશનના ASI દેવેન્દ્રસિંહ જગદીશસિંહ જાડેજા દ્વારા કરવામાં આવી રહી છે. નોંધનીય છે કે આરોપી નંબર-6ને પોલીસ દ્વારા નોટિસ આપવામાં આવી હોવાનું પણ ફરિયાદમાં દર્શાવવામાં આવ્યું છે.
