જામનગર: જામનગર તાલુકાના ચેલા GIDC વિસ્તારમાં આવેલા એક મેટલ રિસાયકલ કારખાનામાં ઇલેક્ટ્રિક ભઠ્ઠીમાં અચાનક બ્લાસ્ટ થતાં એક નેપાળી શ્રમિકનું સારવાર દરમિયાન મોત નીપજ્યું છે, જ્યારે અન્ય બે કામદારો ઇજાગ્રસ્ત થયા છે. સમગ્ર બનાવ અંગે જામનગર પંચ ‘બી’ ડિવિઝન પોલીસે અકસ્માત મોત (એડી) નોંધી વધુ તપાસ હાથ ધરી છે.
પોલીસમાં નોંધાયેલી માહિતી મુજબ, 20 જુલાઈ, 2026ના રોજ સવારે આશરે 11:45 વાગ્યે ચેલા વિઝન ઈન્ડસ્ટ્રીઝ, પ્લોટ નં. 333 ખાતે આવેલા “એલાઈટ મેટલ રિસાયકલ” કારખાનામાં કામ દરમિયાન આ દુર્ઘટના સર્જાઈ હતી. જાહેર કરનાર મંતોષસિંહ શીલાસિંહ અને મૃતક દિલબહાદુર આઈટે સુનાર આઈટે (ઉ.વ. 43) તેમજ અન્ય કામદાર હરીઓમ રાજપૂત (ઉ.વ. 19) ઇલેક્ટ્રિક ભઠ્ઠીમાં પિત્તળનો માલ ઓગાળવાની કામગીરી કરી રહ્યા હતા. દરમિયાન ભઠ્ઠીમાં ગેસ બનવાથી ઉપર પડ જામી ગયો હતો. મૃતક દિલબહાદુરે સળિયાથી તે પડ હટાવવાનો પ્રયાસ કરતાં અચાનક જોરદાર બ્લાસ્ટ થયો હતો. બ્લાસ્ટ થતાં ગરમ પીગળેલું પિત્તળ ચારેબાજુ ઉડ્યું હતું. પોતાનો બચાવ કરવા જાહેર કરનાર ભઠ્ઠીના ઉપરના ભાગેથી નીચે કૂદી જતા તેમના જમણા પગની ઘૂંટીમાં ફ્રેક્ચર થયું હતું. જ્યારે હરીઓમ રાજપૂતના હાથ, પીઠ અને બંને પગના તળિયે દાઝવાની ઇજાઓ પહોંચી હતી.
દિલબહાદુરના શરીર પર પીગળેલું ગરમ પિત્તળ પડતાં તેઓ ગંભીર રીતે દાઝી ગયા હતા. તેમને તાત્કાલિક જી.જી. હોસ્પિટલમાં સારવાર માટે ખસેડવામાં આવ્યા હતા, પરંતુ સારવાર દરમિયાન તેમનું મોત નીપજ્યું હતું. આ બનાવ અંગે જામનગર પંચ ‘બી’ ડિવિઝન પોલીસે ભારતીય નાગરિક સુરક્ષા સંહિતા (BNSS)ની કલમ 194 હેઠળ અકસ્માત મોતનો દાખલો નોંધ્યો છે. પોલીસે સમગ્ર ઘટનાના કારણો, કારખાનામાં સલામતીના ધોરણોનું પાલન થયું હતું કે નહીં અને અન્ય સંજોગોની તપાસ શરૂ કરી છે.
