જામનગર લોકલ ક્રાઈમ બ્રાંચ (LCB) ની ટીમ પર પડાણા ગામ નજીક એક લિસ્ટેડ મહિલા બુટલેગર અને તેના સાગરીતો દ્વારા હુમલો કરવાની અને સરકારી ફરજમાં રૂકાવટ ઊભી કરવાની સનસનાટીભરી ઘટના સામે આવી છે. રેઈડ દરમિયાન પકડાયેલો દારૂનો જથ્થો છોડાવવા માટે આરોપીઓએ પોલીસની ખાનગી કાર સાથે ફોર્ચ્યુનર ગાડી ભટકાડી અકસ્માત સર્જ્યો હતો અને પોલીસ સ્ટાફ સાથે ઝપાઝપી કરી હતી.
જામનગર જિલ્લામાં ચકચાર બનેલ પોલીસ પરના હુમલા અને ફરજમાં રૂકાવટની ફરિયાદની વિગત મુજબ, જામનગર LCBના પોલીસ હેડ કોન્સ્ટેબલ ક્રિપાલસિંહ ચંદ્રસિંહ જાડેજા અને તેમની ટીમ ગત તારીખ ૦૫/૦૭/૨૦૨૬ના રોજ સાંજે સાડા પાંચ વાગ્યાના અરસામાં પડાણાથી લખિયા જતા રોડ પર ખોડિયાર ઘુના પાસે પેટ્રોલીંગ અને રેઈડમાં હતા. આ દરમિયાન પોલીસે પડાણા ગામના ખારી વિસ્તારમાં રહેતી લિસ્ટેડ મહિલા પ્રોહિબિશન બુટલેગર ડાઈબેન રામાભાઈ સોરીયાનો દેશી દારૂનો મુદ્દામાલ ઝડપી પાડ્યો હતો. પોલીસે દારૂનો જથ્થો પકડી પાડતા ઉશ્કેરાયેલી મહિલા બુટલેગરે પોલીસ કેસ ન થાય અને દારૂનો જથ્થો છૂટી જાય તે માટે પોતાના સાગરીતો મેહુલસિંહ ઉર્ફે મુન્નાભાઈ મનુભા જાડેજા અને દશરથસિંહ તખુભા જાડેજાને પોલીસ પર હુમલો કરવા ઉશ્કેર્યા હતા. મહિલાની ઉશ્કેરણીથી મેહુલસિંહ ઉર્ફે મુન્નાભાઈ પોતાની ફોર્ચ્યુનર કાર (રજીસ્ટ્રેશન નંબર: GJ/11/DB/0999) લઈને ધસી આવ્યો હતો અને તેણે પોલીસની ખાનગી કારના પાછળના ભાગે પોતાની ગાડી જોરદાર રીતે ભટકાડી દીધી હતી. આ અકસ્માતમાં બંને ગાડીઓને મોટું નુકસાન થયું હતું. ત્યારબાદ આરોપીઓએ પોલીસ કર્મચારીઓ સાથે ઉગ્ર બોલાચાલી કરી, ઝપાઝપી કરી રાજ્યસેવક તરીકેની કાયદેસરની ફરજમાં રૂકાવટ ઊભી કરી હતી.
આ અંગે LCBના હેડ કોન્સ્ટેબલ ક્રિપાલસિંહ જાડેજાની ફરિયાદના આધારે મેઘપર (પડાણા) પોલીસ મથકમાં મહિલા બુટલેગર સહિત ત્રણેય આરોપીઓ વિરૂદ્ધ ભારતીય ન્યાય સંહિતા (BNS)-૨૦૨૩ની કલમ-૧૨૧(૧), ૨૨૧, ૩૨૪(૪), ૫૪ મુજબ ગુનો નોંધી કાયદેસરની કાર્યવાહી હાથ ધરવામાં આવી છે. આ કેસની વધુ તપાસ મેઘપર પોલીસ સ્ટેશનના પોલીસ ઇન્સ્પેક્ટર પી.ટી. જયસ્વાલ ચલાવી રહ્યા છે.
