કાલાવડ: યુવાનને એપ્લિકેશન ડાઉનલોડ કરવી ભારે પડી: ફોન હેક થયો, બે બેંક ખાતા સાફ

જામનગર અપડેટ્સ: કાલાવડ (જી. જામનગર):
આજના ડિજિટલ યુગમાં સાયબર ગુનેગારો અવનવા કીમિયા અપનાવીને નિર્દોષ લોકોને પોતાની જાળમાં ફસાવી રહ્યા છે. જામનગર જિલ્લાના કાલાવડ ટાઉનમાં ઓનલાઇન મૂવી જોવાની લાલચમાં એક યુવકે ભારે આર્થિક નુકસાન વેઠવાનો વારો આવ્યો છે. ઇન્સ્ટાગ્રામ પર જાહેરાત જોઈને એક અજાણી એપ્લિકેશન ડાઉનલોડ કરતા જ અજાણ્યા સાયબર ઠગે યુવકનો આખો ફોન હેક કરી લીધો હતો અને તેના બેંક ખાતાઓમાંથી કુલ રૂ. ૨,૦૯,૫૩૦ ની ઓનલાઇન છેતરપિંડી આચરી છે.

જાહેરાત જોઈ એપ્લિકેશન ડાઉનલોડ કરતા જ ફોન હેંગ થઈ ગયો

વિગતો મુજબ, કાલાવડના ખોડીયારપરા વિસ્તારમાં રહેતા અને સ્ટુડિયો ચલાવતા સાહીલભાઈ મનસુખભાઈ તરપદા (પટેલ) (ઉ.વ. ૨૯) પોતાના ઇન્સ્ટાગ્રામ આઇડીનો ઉપયોગ કરી રહ્યા હતા. તે દરમિયાન ઇન્સ્ટાગ્રામ પર એડ-ફ્રી મૂવી જોવા માટેની ‘CUBI’ નામની એપ્લિકેશનની એક જાહેરાત આવી હતી. સાહીલભાઈએ આ એપ્લિકેશન ડાઉનલોડ કરતાની સાથે જ તેમનો મોબાઈલ ફોન અચાનક હેંગ થઈ ગયો હતો. શંકા જતા તેમણે તુરંત જ આ એપ્લિકેશન અનઇન્સ્ટોલ (ડીલીટ) કરી નાખી હતી.

તમામ ડેટા ડીલીટ કરી બેંક ખાતામાંથી રકમ ઉપાડી લીધી

એપ્લિકેશન અનઇન્સ્ટોલ કરવા છતાં શાતિર અજાણ્યા આરોપીએ સાહીલભાઈનો મોબાઈલ ફોન કમ્પ્લીટ કંટ્રોલમાં (હેક) રાખી લીધો હતો. આરોપીએ ફોનમાં રહેલો તમામ ડેટા તેમજ અન્ય જરૂરી એપ્લિકેશનો ડીલીટ કરી નાખી હતી અને ત્યારબાદ બેંકોના એક્સેસ મેળવી ઓનલાઇન નાણાંની તારવણી શરૂ કરી હતી.

• બેંક ઓફ બરોડા એકાઉન્ટ: ફરિયાદીના આ ખાતામાંથી પહેલા રૂ. ૪૦,૦૦૦/- ઉપાડ્યા હતા. ત્યારબાદ રૂ. ૯૫,૦૦૦/- જમા કરી તેમાંથી થોડીવારમાં રૂ. ૯૮,૦૫૦/- ઉપાડી લઈ કુલ રૂ. ૪૩,૦૫૦/- નું ગેરકાયદેસર ટ્રાન્ઝેક્શન કર્યું હતું.
• ICICI બેંક એકાઉન્ટ: આ ખાતામાંથી જુદા જુદા ટ્રાન્ઝેક્શન દ્વારા રૂ. ૯૩,૫૮૦/-, રૂ. ૫૫,૦૦૦/- અને રૂ. ૧૭,૯૦૦/- મળી કુલ રૂ. ૧,૬૬,૪૮૦/- પોતાના ખાતામાં ટ્રાન્સફર કરી લીધા હતા.
  આમ, ડિજિટલ ગઠિયાએ સંદેશાવ્યવહારના સાધનો અને ઇલેક્ટ્રોનિક માધ્યમનો દુરુપયોગ કરીને અપ્રમાણિકતાથી યુવકના બંને ખાતામાંથી કુલ રૂ. ૨,૦૯,૫૩૦/- ની ઓનલાઇન છેતરપિંડી આચરી પોતાના ખાતામાં ટ્રાન્સફર કરી લીધા હતા.

કાલાવડ ટાઉન પોલીસ મથકે ગુનો દાખલ

આ ઓનલાઇન ફ્રોડ અંગે સાહીલભાઈ પટેલે કાલાવડ ટાઉન પોલીસ સ્ટેશનમાં સત્તાવાર ફરિયાદ નોંધાવી છે. જેના આધારે પોલીસે અજાણ્યા આરોપી વિરુદ્ધ ભારતીય ન્યાય સંહિતા (BNS) ૨૦૨૩ ની કલમ ૩૧૮(૪) (છેતરપિંડી) તથા ઇન્ફોર્મેશન ટેકનોલોજી (IT) એક્ટની કલમ ૬૬(સી) અને ૬૬(ડી) મુજબ ગુનો નોંધી આગળની તપાસ હાથ ધરી છે.
કાલાવડ ટાઉન પોલીસ સ્ટેશનના પોલીસ ઇન્સ્પેક્ટર એ.એલ. બારસીયાના માર્ગદર્શન હેઠળ સાયબર સેલની મદદથી અજાણ્યા ઠગ સુધી પહોંચવા માટે ચક્રો ગતિમાન કરવામાં આવ્યા છે.

જામનગર અપડેટ્સ તરફથી સાવચેતી સંદેશ: સોશિયલ મીડિયા પર આવતી લોભામણી જાહેરાતો કે અજાણી લિંક્સ પરથી ક્યારેય કોઈ શંકાસ્પદ એપ્લિકેશન ડાઉનલોડ કરવી નહીં, તે તમારા બેંક ખાતાને ક્ષણભરમાં ખાલી કરી શકે છે.