જામનગર અપડેટ્સ : લાલપુર, જામનગર–
જામનગર જિલ્લાના લાલપુર તાલુકામાં આવેલી પવનચક્કીઓને તસ્કરોએ નિશાન બનાવી હોવાની ચોંકાવનારી ઘટના સામે આવી છે. ખાયડી ગામની સીમમાં વિન્ડ વર્લ્ડ ઇન્ડિયા લિમિટેડ કંપનીની પવનચક્કીઓમાંથી કિંમતી કોપર કેબલ (તાંબાના વાયર)ની ચોરી થતાં પોલીસ મથકે સત્તાવાર ફરિયાદ નોંધાવવામાં આવી છે. અજાણ્યા તસ્કરો અંદાજે ૯૨ મીટર જેટલો વાયર ચોરી કરીને ફરાર થઈ ગયા છે.
અલગ-અલગ ૪ લોકેશન પર ત્રાટક્યા ચોર
પોલીસના સત્તાવાર અહેવાલ અનુસાર, આ ચોરી લાલપુર પોલીસ સ્ટેશનથી દક્ષિણ દિશામાં આશરે ૭ કિલોમીટર દૂર આવેલા ખાયડી ગામની સીમમાં બની હતી. વિન્ડ વર્લ્ડ ઇન્ડિયા લિમિટેડ કંપનીની પવનચક્કીના અલગ-અલગ ૪ લોકેશનો પર તસ્કરોએ એકસાથે હાથફેરો કર્યો હતો. પવનચક્કીના ટ્રાન્સફોર્મર પરથી અંદર જતો અર્થિંગનો કિંમતી કોપર કેબલ વાયર ચોરો કાપી ગયા હતા.
લાખોની કિંમતનો વાયર ચોરાયો
ફરિયાદમાં જણાવ્યા મુજબ, ચોરાયેલા વાયરની કિંમત પ્રતિ મીટર રૂ. ૬૦૦ જેટલી થાય છે. તસ્કરો કુલ ૯૨ મીટર લાંબો વાયર ચોરી ગયા છે, જેની કુલ કિંમત રૂ. ૫૫,૨૦૦/- આંકવામાં આવી છે. આ બનાવ અંગે ગણેશ સિક્યુરીટી એજન્સીમાં સાઇટ ઇન્ચાર્જ તરીકે ખાનગી નોકરી કરતા અને ગોવાણા ગામના વતની શ્રી કરશનભાઇ નાથાભાઇ પાથર (ઉ.વ. ૩૯, જાતે: સગર) એ લાલપુર પોલીસ મથકમાં રૂબરૂ હાજર થઈને ગુરૂવારે રાત્રે ૨૧:૩૦ વાગ્યે ફરિયાદ નોંધાવી છે.
નવા કાયદા (BNS) હેઠળ ગુન્હો દાખલ
લાલપુર પોલીસે આ મામલે પાર્ટ ગુ.ર.નં-૧૧૨૦૨૦૩૬２６０૪૦૮/૨૦૨૬ થી ભારતીય ન્યાય સંહિતા-૨૦૨૩ (BNS) ની કલમ- ૩૦૩(૨) મુજબ અજાણ્યા ચોર ઇસમો વિરૂદ્ધ ચોરીનો ગુન્હો દાખલ કર્યો છે.
આ કેસની આગળની તપાસ લાલપુર પોલીસ સ્ટેશનના પો.હેડ.કોન્સ. ડી.કે.બેરા ચલાવી રહ્યા છે, જ્યારે PSO તરીકે પો.કોન્સ. આર.જે.આંબલીયાએ ફરજ બજાવી હતી. સીમ વિસ્તારમાં થયેલી આ ચોરીને પગલે પોલીસે તસ્કરોને ઝડપી પાડવા ચક્રો ગતિમાન કર્યા છે.
