જામનગર અપડેટ્સ: જામનગર શહેરમાં વધુ એક ‘ગુજસીટોક’ સંબંધિત ગંભીર ગુનો નોંધાતા પોલીસ બેડામાં ભારે ખળભળાટ મચી ગયો છે. શહેરના બેડી વિસ્તારમાં સક્રિય સાઈચા ગેંગ સામે સીટી “બી” ડિવિઝન પોલીસ મથકે ગુજસીટોક નો ગુનો નોંધવામાં આવ્યો છે. ગુનામાં કુલ અગિયાર આરોપીઓના નામ જાહેર કરવામાં આવ્યા હોવાનું જાણવા મળ્યું છે.
મળતી માહિતી મુજબ ગત મધરાત્રી દરમિયાન સ્થાનિક ગુનાખોરી શાખાની ટીમ દ્વારા બેડી સહિત વિવિધ વિસ્તારોમાં સઘન કાર્યવાહી હાથ ધરવામાં આવી હતી. કાર્યવાહી દરમિયાન ગેંગ સાથે સંકળાયેલા આઠ આરોપીઓને ઝડપી લેવામાં આવ્યા હોવાનું જાણવા મળ્યું છે. હાલ તમામ આરોપીઓની ઉંડાણપૂર્વક પૂછપરછ ચાલી રહી છે અને ગુનામાં અન્ય કોની સંડોવણી છે તે દિશામાં પણ તપાસ આગળ ધપાવવામાં આવી રહી છે.
પોલીસ સૂત્રોના જણાવ્યા મુજબ લાંબા સમયથી બેડી વિસ્તાર અને આસપાસના વિસ્તારોમાં ગેંગની ગતિવિધિઓ અંગે ગુપ્ત રીતે માહિતી એકત્ર કરવામાં આવી રહી હતી. ત્યારબાદ પુરાવા અને પ્રાથમિક તપાસના આધારે ગુજસીટોકનો ગુનો નોંધવામાં આવ્યો હોવાનું સામે આવ્યું છે.
ગુનામાં નામજોગ થયેલા અગિયાર આરોપીઓ પૈકી આઠ આરોપીઓને પોલીસે કસ્ટડીમાં લઇ પૂછપરછ શરૂ કરી છે, જ્યારે બાકીના આરોપીઓને ઝડપી પાડવા અલગ અલગ ટીમો કામે લાગી હોવાનું જાણવા મળ્યું છે. સમગ્ર મામલે સીટી “બી” ડિવિઝન પોલીસ તથા સ્થાનિક ગુનાખોરી શાખા દ્વારા સંયુક્ત તપાસ ચલાવવામાં આવી રહી છે.
શહેરમાં ચર્ચાસ્પદ બનેલા આ કેસને લઈને પોલીસ આગામી દિવસોમાં વધુ ખુલાસા કરે તેવી શક્યતા વ્યક્ત કરવામાં આવી રહી છે.
પ્રાથમિક તપાસ દરમિયાન બેડી વિસ્તારના એજાજ સાઇચા, હનીફ સાઇચા, મહેબૂબ સાઇચા, ગુલામ સાઇચા, રજાક સોપારી, હુસેન સોપારી,અમીન નોતીયાર અને મોઈન સુમરા સહિતના ૧૧ આરોપીઓ સામે પોલીસ દ્વારા કડક કાર્યવાહી કરવામાં આવી હોવાનું ધ્યાનમાં આવ્યું છે. રાજકોટ રેન્જના આઈજીપી નિરલિપ્ત રાયના સીધા માર્ગદર્શનમાં જામનગર જિલ્લાના એસ.પી. ડો. રવિ મોહન સૈનિ, તેમજ શહેર વિભાગના ડી.વાય.એસ.પી. જે એન ઝાલાની રાહબરીમાં સમગ્ર પ્રકરણની ઊંડાણપૂર્વકની તપાસ ચલાવવામાં આવી રહી છે.
અત્રે એ ઉલ્લેખનીય છે કે જામનગરમાં નગરપાલિકાની ચૂંટણી પહેલા સિટી એ. ડિવિઝન પોલીસ મથકમાં ગુજસીટોક અંગેના બે અપરાધો નોંધવામાં આવ્યા હતા. અને તેમાં અલ્તાફ ખફી તેમજ અસલમ ખીલજી બંનેની ગેંગવોર લાંબા સમયથી ચાલે છે, જેના આધારે બે ગુના નોંધવામાં આવ્યા હતા, અને જે પ્રકરણની હજુ તપાસ ચાલુ છે, ત્યાં જ જામનગર શહેરમાં ગુજસીટોકનો વધુ એક ગુનો નોંધાતા ભારે ખળભળાટ મચી ગયો છે.
