જામનગર અપડેટ્સ: જામનગરની સરકારી ડેન્ટલ કોલેજ એન્ડ હોસ્પિટલ (Government Dental College & Hospital) માં ₹1 કરોડ 36 લાખ જેટલી માતબર રકમનું સરકારી નાણાં ઉચાપત કૌભાંડ સામે આવતા જ ભારે ચકચાર મચી ગઈ છે. કોલેજના ડીન ડો. નયના પટેલ દ્વારા આ સમગ્ર મામલે વિધિવત વિગતો આપતા જાહેર કરવામાં આવ્યું છે કે, હોસ્પિટલના દર્દીઓ માટે આવતા સરકારી ફંડમાં છેતરપિંડી આચરવામાં આવી છે અને આ અંગે પોલીસ મથકમાં સત્તાવાર ફરિયાદ પણ દાખલ કરી દેવાઈ છે.
દર્દીઓના રોગી કલ્યાણ સમિતિના ફંડમાં મોટું ગાબડું
કોલેજના ડીન ડો. નયના પટેલે વિગતો આપતા જણાવ્યું હતું કે, હોસ્પિટલમાં દર્દીઓની સુવિધા, સારવાર અને હોસ્પિટલને લગતી અન્ય તમામ કામગીરીઓ માટે ‘રોગી કલ્યાણ સમિતિ’ કાર્યરત છે. સરકારશ્રી દ્વારા આ સમિતિને અલગ-અલગ કામો માટે ફંડ પૂરું પાડવામાં આવે છે. આ ફંડના તમામ રેકોર્ડ કીપિંગ અને નાણાકીય વ્યવહારો સંભાળવાની જવાબદારી જે-તે સમયે શોભિત ગર્ગ નામના કર્મચારીને સોંપવામાં આવી હતી.
કાયમી સ્ટાફની અછતનો ઉઠાવાયો ફાયદો
ડીનના જણાવ્યા મુજબ, કોલેજમાં કાયમી સ્ટાફની અછત હોવાના કારણે શોભિત ગર્ગને આ કામગીરી સોંપાઈ હતી. તેની સાથે સંસ્થાના કાયમી એકાઉન્ટન્ટને પણ સૂચના આપવામાં આવી હતી કે તેઓ શોભિતની કામગીરી પર દેખરેખ રાખે અને સાથે મળીને કામ કરે.
કોણ છે શોભિત ગર્ગ? શોભિત ગર્ગ (AAH) નેશનલ હેલ્થ મિશન (NHM) અંતર્ગત સરકારશ્રી દ્વારા ૧૧ મહિનાના કરાર આધારિત નિમણૂક પામેલો કર્મચારી છે. છેલ્લા અઢી વર્ષથી તેનું જી.જી. હોસ્પિટલ (G.G. Hospital) ખાતેથી ડેન્ટલ કોલેજમાં ડેપ્યુટેશન કરવામાં આવ્યું હતું.
ચેકમાં છેડછાડ અને વિશ્વાસઘાતની આશંકા
ડો. નયના પટેલે જણાવ્યું કે, રોગી કલ્યાણ સમિતિમાં સહી કરવાની સત્તા (Signing Authority) અધ્યક્ષ તરીકે કોલેજના ડીન પાસે હોય છે. છેલ્લા ત્રણ મહિના દરમિયાન તેમની જાણ બહાર ચેકોમાં કઈ રીતે સહીઓ મેળવી લેવાઈ અથવા તો સાચા બિલો સાથે સહી કરાવ્યા બાદ ચેકોમાં અંદર શું છેડછાડ (ચેડાં) કરવામાં આવ્યા, તેની તપાસ ચાલી રહી છે. ડીન દ્વારા એવી આશંકા પણ વ્યક્ત કરવામાં આવી છે કે ઘણીવાર કામના ભારણને લીધે અથવા કર્મચારી પર મૂકેલા વિશ્વાસનો ગેરફાયદો ઉઠાવીને, હેડિંગ નાખ્યા વગર જ ચેકમાં સહી કરાવી લેવામાં આવી હોય તેવી પૂરેપૂરી શક્યતા છે. બેંક તરફથી જ્યારે ચેકની વધુ વિગતો અને રેકોર્ડ સામે આવશે, ત્યારે જ સ્પષ્ટ થશે કે આ સહીઓ કઈ રીતે અને કોની સંડોવણીથી થઈ છે.
ઉચાપત પ્રકરણની અગત્યના પાસાઓ :
કુલ ઉચાપત રકમ: આશરે ₹1,36,00,000 (એક કરોડ છત્રીસ લાખ).
સમયગાળો: આ સમગ્ર નાણાકીય ગોબાચારી છેલ્લા ૩ મહિનાના ગાળામાં આચરવામાં આવી છે.
ડીનની પ્રતિક્રિયા: “અમે કર્મચારી પર વિશ્વાસ મૂક્યો હતો, પરંતુ તે વિશ્વાસઘાત થયો હોય તેવી શક્યતા નકારી શકાય નહીં. આ સરકારી નાણાં છે, તેથી ગેરરીતિ સામે આવતા જ અમે તાત્કાલિક પોલીસ ફરિયાદ નોંધાવી છે.” આ સમગ્ર મસમોટા કૌભાંડની ગંભીરતાને ધ્યાને લઈને જામનગર પોલીસ દ્વારા આ મામલે સઘન તપાસ શરૂ કરી દેવામાં આવી છે. કરાર આધારિત કર્મચારી શોભિત ગર્ગ અને અન્ય કોઈ સ્થાનિક કાયમી સ્ટાફ કે એકાઉન્ટન્ટની આમાં સંડોવણી છે કે કેમ, તે પોલીસ તપાસ બાદ જ બહાર આવશે.
