જામનગર અપડેટ્સ: જામનગરની સરકારી જી.જી. હોસ્પિટલમાં ક્લાસ-૧ ના ઉચ્ચ તબીબી અધિકારીની ઓફિસમાં ઘૂસી, ગેરવર્તન કરી અને સરકારી કામકાજમાં અડચણ ઊભી કરવાના મામલે એક શખ્સ સામે સીટી બી ડિવિઝન પોલીસ સ્ટેશનમાં ગુનો દાખલ કરવામાં આવ્યો છે. આરોપીએ તબીબને ધાક-ધમકી આપી મોબાઈલમાં વિડીયો ઉતારી ખોટા આક્ષેપો કર્યા હોવાની વિગતો સામે આવી છે.
ઓફિસમાં ઘૂસી વિડીયો ઉતાર્યો અને ખોટા આક્ષેપો કર્યા
આ બનાવની પોલીસમાં નોંધાયેલ ફરિયાદની માહિતી મુજબ, જી.જી. હોસ્પિટલની ૭૦૦ બેડની બિલ્ડિંગના ગ્રાઉન્ડ ફ્લોર પર આવેલી ઓફિસમાં નિવાસી તબીબી અધિકારી (RMO) વર્ગ-૧ તરીકે ફરજ બજાવતા ડોક્ટર પ્રમોદકુમાર આર. સક્સેના પોતાની સરકારી ફરજ પર હતા. આ દરમિયાન સુરેશભાઈ વાલજીભાઈ ચૌહાણ નામનો શખ્સ અચાનક તેમની ઓફિસમાં ઘૂસી ગયો હતો અને ગેરવર્તન કરવા લાગ્યો હતો.
આરોપી સુરેશે પોતાના મોબાઈલ ફોનમાં વિડીયો ઉતારવાનું શરૂ કરી ડોક્ટર પર ‘તમો સ્ત્રીઓ સાથે ગેરવર્તન કરો છો’ તેવા પાયાવિહોણા અને ખોટા આક્ષેપો કરી ધાક-ધમકી આપવા લાગ્યો હતો.
આરોપીએ શા માટે કર્યો હોબાળો?
પોલીસ ફરિયાદમાં જણાવ્યા અનુસાર, આરોપી સુરેશભાઈની માતા જી.જી. હોસ્પિટલમાં સારવાર હેઠળ દાખલ છે. તેમની સારવાર સંદર્ભે આરોપીએ અગાઉ ૧૦૪ હેલ્પલાઈનમાં ફોન કર્યો હતો અને તે બાબતે તે ડોક્ટર પાસે જવાબ માંગી રહ્યો હતો. તબીબે તેને શાંતિથી સમજાવતા કહ્યું હતું કે, “અમે તમારી ફરિયાદ અંગેનો અહેવાલ વડી કચેરીને મોકલી આપ્યો છે.”
આ સાંભળીને ઉશ્કેરાયેલા આરોપીએ જૂની અદાવતનો રાગ આલાપતા કહ્યું કે, “મારી બહેન જયાબેન અગાઉ જી.જી. હોસ્પિટલમાં કામ કરતા હતા, તેઓને કેમ ફરી કામ પર લેતા નથી?” તેમ કહી ફરજ પરના તબીબને ગંભીર પરિણામો ભોગવવાની ધમકીઓ આપવા લાગ્યો હતો.
બનાવના પગલે અગત્યની દર્દીલક્ષી મીટિંગ ખોરવાઈ ગઈ
આરોપીના આ હંગામા અને ગેરવર્તનને કારણે હોસ્પિટલના સરકારી કામકાજમાં ભારે વિક્ષેપ પડ્યો હતો. ખાસ કરીને તે જ સમયે ડોક્ટર સક્સેના દ્વારા દર્દીઓની સેવાઓ અને સુવિધાઓ અંગેની એક અત્યંત અગત્યની તબીબી મીટિંગ રાખવામાં આવી હતી, જે આ હોબાળાના કારણે ખોરવાઈ ગઈ હતી.
સિટી બી ડિવિઝન પોલીસ દ્વારા કરાઈ કાર્યવાહી
આ મામલે ડોક્ટર પ્રમોદકુમાર સક્સેનાની ફરિયાદના આધારે જામનગર સીટી બી ડિવિઝન પોલીસે આરોપી સુરેશભાઈ વાલજીભાઈ ચૌહાણ વિરુદ્ધ ભારતીય ન્યાય સંહિતા (BNS) સને-૨૦૨૩ ની કલમ ૨૨૧ (સરકારી કર્મચારીની ફરજમાં અડચણ) તથા કલમ ૩૫૧(૨) (ગુનાહિત ધમકી) મુજબ ગુનો દાખલ કર્યો છે. આ કેસની વધુ તપાસ સીટી બી ડિવિઝન પોલીસ સ્ટેશનના પી.એસ.આઈ. એમ.એચ. મહેતા ચલાવી રહ્યા છે.
