જામનગર જિલ્લામાં સ્પેશિયલ ઓપરેશન ગ્રુપ (SOG) દ્વારા મેઘપર ગામમાં મોટી કાર્યવાહી હાથ ધરી માદક પદાર્થોના જથ્થા સાથે બે આરોપીઓને ઝડપી પાડવામાં આવ્યા છે. પોલીસે કુલ ₹6.93 લાખના મુદામાલ સાથે આરોપીઓને કાબૂમાં લીધા છે.
મળતી માહિતી મુજબ, તા. 1 મે 2026ના રોજ સાંજે અંદાજે 6:35 વાગ્યે લાલપુર તાલુકાના મેઘપર ગામે રામદૂતનગર વિસ્તારમાં મચ્છી માર્કેટ પાછળ, રવિવારી માર્કેટના પટમાં SOGની ટીમે રેડ કરી હતી. આ દરમિયાન હરપાલસિંઘ સ્વર્ણસિંઘ (ઉ.વ. 30) અને રમનદિપસિંઘ સુલ્લાખાન (ઉ.વ. 28) નામના બે શખ્સોને ઝડપવામાં આવ્યા હતા. બંને મૂળ પંજાબના અમૃતસર જિલ્લાના રહેવાસી હોવાનું સામે આવ્યું છે અને હાલ મેઘપર વિસ્તારમાં ભાડાના મકાનમાં રહેતા હતા.
પોલીસ તપાસ મુજબ આરોપીઓ પોતાના વતનમાંથી ગેરકાયદેસર રીતે હેરોઇન, મોફીન અને કોડેટ જેવા ઓપીએડ પ્રકારના માદક પદાર્થો પરમીટ વિના લાવી મેઘપર વિસ્તારમાં વેચાણ કરવા માટે સંગ્રહ કરી રહ્યા હતા. રેડ દરમિયાન આરોપીઓ પાસેથી કુલ 33 ગ્રામ માદક પદાર્થ (કિંમત આશરે ₹6.60 લાખ), બે મોબાઇલ ફોન (₹30,000), એક વજન કાંટો (₹500) અને રોકડ ₹3,100 મળી આવ્યા હતા.
આ કાર્યવાહી પોલીસ સબ ઇન્સ્પેક્ટર એ.વી. ખેર તથા ઇન્ચાર્જ પોલીસ ઇન્સ્પેક્ટર વી.બી. ચૌધરીના માર્ગદર્શન હેઠળ હાથ ધરવામાં આવી હતી. બંને આરોપીઓ સામે N.D.P.S. એક્ટની કલમ 8(C), 22(B) અને 29 મુજબ ગુનો નોંધવામાં આવ્યો છે. હાલ પોલીસે આરોપીઓ પાસેથી મળેલા માદક પદાર્થનો સ્ત્રોત શોધવા તેમજ અન્ય સંડોવાયેલા આરોપીઓને પકડવા વધુ તપાસ હાથ ધરી છે.
